Գլխավոր » Analitika, TOP, Լրահոս, Հասարակություն, Վերլուծական, Քաղաքականություն

Վճարովի խաղաղասիրությունն ու սեռականությունը կարող են թանկ նստել բոլորիս վրա

Փետրվար 15, 2018թ. 13:49
փող

Գաղտնիք չէ, որ հասարակական սեկտորում բազմաթիվ կազմակերպություններ գործում են դրամաշնորհներով: Նաեւ՝ հանուն դրամաշնորհների, գերազանցապես օտարերկրյա:
Տրամադրված դրամաշնորհը սովորաբար կանխորոշում է այն ստացած կազմակերպության գործունեության ուղղվածությունը, նպատակները, քայլերը, հաճախ գործելակերպն ու հրապարակային հարթակներում դիրքավորումն ու դրսեւորման եղանակները:

Լինում է՝ կազմակերպություններն են «հարմարվում» այս կամ այն դրամաշնորհային ծրագրին: Իսկ ով վճարում է, նա էլ պատվիրում է երաժշտությունը, այս դեպքում՝ որեւէ ՀԿ գործունեության ուղղվածությունը, ընթացիկ նպատակային թիրախները, հաճախ նաեւ՝ հանրային վարքը:
Հայաստանի հասարակական սեկտորին դրամաշնորհներ տրամադրելու առումով ակտիվների շարքում է «Բաց հասարակության հիմնադրամներ» կազմակերպությունը, որ հասարակությանը ավելի շատ հայտնի է որպես Սորոսի ֆոնդ կամ Սորոսի հիմնադրամ:

Այս հիմնադրամը, ինչպես այդ մասին գրվել է մամուլում, ակտիվորեն էր արձագանքել «Ազգ-բանակ» հայեցակարգին: Շրջանառված փաստերի համաձայն, Սորոսի հիմնադրամն արագորեն 20 հազար դոլար էր հատկացրել «Հանրային օրակարգ» ՀԿ-ին՝ «Ազգ-բանակ» հայեցակարգը քննադատելու համար:
Ընդհանուր առմամբ, միայն 2016 եւ 2017 թվականներին Սորոսի հիմնադրամը Հայաստանի ամենատարբեր հասարակական կազմակերպությունների տրամադրել է մոտ 2 միլիոն 700 հազար ԱՄՆ դոլարի դրամաշնորհներ: Հատկացումներն ու ծրագրերը բազմաթիվ են: Գործունեության ոլորտները՝ եւս: Օրինակ, ֆեմինիստական ուղղվածության ծրագրեր, որոնք կարող են զուգահեռվել խաղաղասիրական (պացիֆիստական) գործունեության հետ:
Փաստն այն է, որ 2017 թվականին, օրինակ, «Կանանց ռեսուրսային կենտրոն» ՀԿ-ն «Բաց հասարակություն հիմնադրամներ-Հայաստանից» ստացել է 55 հազար դոլար դրամաշնորհ: Ըստ ծրագրի՝ դրամաշնորհի նպատակն է Հայաստանի հանրակրթական դպրոցներում սեռական դաստիարակության բարելավումը՝ դեռահասների ծնողների ուսուցանման եւ դպրոցներում սեռական դաստիարակության գործընթացի քարոզը ուժեղացնելու ճանապարհով:
Կազմակերպությունն, իհարկե, այդ ուղղությամբ գործունեություն վաղուց է ծավալում, վերջին տարիներին տարբեր դպրոցներում հանդիպումներ կամ դասընթացներ են եղել, սեմինարներ, սեռականության վերաբերյալ կայք են գործարկել, ըստ մտահղացման՝ կրթաճանաչողական հոլովակներ են պատրաստել ու զետեղել համացանցում եւ այլն:
Կոնկրետ այս՝ դեռահասների սեռական դաստիարակության հիմնախնդրին անդրադառնալով, տարակուսանք է հարուցում այն, որ ԿԳ նախարարությունը թույլ է տալիս հասարակական սեկտորի ինչ-որ կազմակերպության մտնել «իր բոստանը»:
«Կանանց ռեսուրսային կենտրոն» ՀԿ-ի դեպքում միգուցե ազնիվ չէ գործածել «ինչ-որ կազմակերպություն» արտահայտությունը: Սա կոնկրետ ֆեմինիստական կազմակերպություն է, որն առանձին դեպքերում հանդես է գալիս նաեւ սեռական փոքրամասնությունների իրավունքների պաշտպանության դիրքերից:

Կազմակերպության համանախագահն ու ղեկավարը Լարա Ահարոնյանն է, որը վերջին տարիներին նշված դիապազոնում դրսեւորել է որոշակի հրապարակային ակտիվություն:
Որպես ի գիտություն, նշենք, որ Լարա Ահարոնյանի ամուսինը կանադահայ գործարար Րաֆֆի Նիզիբլյանն է, որը «Deem Communicationes» մարքետինգային եւ PR կազմակերպության հիմնադիրն է եւ ստեղծագործական տնօրենը: Այս կազմակերպությունն, ի դեպ, իր գործունեության պրոֆիլով, տարբեր ժամանակներում համագործակցել է Հայաստանի պետական մարմինների հետ, ստացել որոշակի պատվերներ, նաեւ շնորհակալագրեր:
Սակայն դառնանք «Կանանց ռեսուրսային կենտրոնի» գործունեությանը: Այս ՀԿ նախաձեռնած վերջին միջոցառումներից մեկի՝ 2017 թվականի դեկտեմբերի 21-ին «Հայ արտ»-ում անցկացրած «Ան.կոչ.նակ» խորագրով ֆեմինիստական ցուցահանդեսի ընթացքում, օրինակ, եղել են այս կարգի կարգախոսներ. «Արգանդի հեղափոխությունը սկսելա՛» (կարգախոսը պաստառին արտահայտված է նկարով ու տեքստով, բժշկական կամ անատոմիական տարբերակով պատկերված է կանացի սեռական օրգան, եւ «հեղափոխությունը սկսելա» արտահայտությունը), «Իմ հեշտոցը՝ իմ կանոնները», «Հայրիշխանությունդ տանձիս չի՛» եւ այլն, եւ այլն:
Բայց դրանից բացի, եղել են նաեւ որոշակիորեն հակապատերազմական, հակաբանակային, գաղափարներ քարոզող ցուցապաստառներ: Մասնավորապես. «Իմ արգանդը գործարք չէ քո ռազմական բիզնեսի հետ», «Ոչ պատերազմի բիզնեսին», «Ես չեմ ամուսնացել պետության բանակի հետ» եւ այլն:
Դե՝ «իրենց մարմինն, իրենց իրավունքը»: Քի՞չ «հեղափոխություններ» են մեր հանրության գլխով անցել: Այս մեկն էլ թող «արգանդի» կամ, եթե ինչ-որ մեկին ավելի հաճո է, «հեշտոցի» լինի:
Բայց արդյոք նման մոտեցումներ դավանող կազմակերպությո՞ւնն է ամենալավ թեկնածուն դպրոցներում սեռական դաստիարակության չափազանց զգայուն եւ նուրբ խնդրով ակտիվորեն զբաղվելու համար: Կազմակերպություն, որի դաստիարակչական կայքում մանրամասն նկարագրված են սեռական հարաբերությունների ամենատարբեր տեսակներ ու դրանց «տեխնիկան»՝ անալ, օրալ, սեռական օրգանների շոյում: Ավելի մանրամասն երեւի միայն պոռնո «գրականության» մեջ կամ կայքերում է լինում: Դա սեռականության մասնագետները կասեն: Երեւի պետք է գոհ լինել, որ զոոֆիլիայի կամ նեկրոֆիլիայի նկարագրություններն էլ չկան:
Դեռահասները, բարձր դասարանցիները, իհարկե, սեռական դաստիարակության տեսանկյունից չպետք է անգրագետ մնան ու անտաշ մեծանան: Մեր հասարակության դեպքում, այո, կա նման խնդիր: Բայց դրանով պետք է զբաղվի կրթության նախարարությունը. համապատասխան մասնագետները պետք է զբաղվեն հղկված մեթոդաբանությամբ:
Մտահոգիչ է նաեւ իբր խաղաղասիրական քարոզի տակ վատ քողարկված հակաբանակային կարգախոսների տարածումը: Արդեն հիշատակված «Հանրային օրակարգ» ՀԿ-ից բացի, եղած մի քանիսի շարքում կարելի է հիշատակել նաեւ «Սեւազգեստ կանայք, Հայաստան» նախաձեռնությունը: Այն, որպես առանձին գործող հասարակական կազմակերպություն, պետական ռեգիստրում գրանցվել է՝ «Սեւազգեստ կանայք» խաղաղաշինական ՀԿ» անվանումով:
Չնայած նախաձեռնությունը հանրային դաշտում ավելի վաղ է սկսել գործել, բայց ոմանք միգուցե խորհրդանշական կհամարեն նաեւ գրանցման տարեթիվը՝ 2016 թվական: Ապրիլյան պատերազմի տարին: Իսկ կոնկրետ «Սեւազգեստ կանայք, Հայաստան»-ը, ըստ ինքնանկարագրի՝ հակառազմական, ֆեմինիստական, խաղաղաշինական նախաձեռնություն է, որը պայքարում է պատերազմի, ռազմականության, բռնության եւ խտրականության դեմ:
Ասվածից ինքնաբերաբար հասկանալի է, որ այս նախաձեռնությունը քննադատական կեցվածք ունի «Ազգ-բանակ» հայեցակարգի նկատմամբ, այն համարում հասարակության հավելյալ ռազմականացման խթան: Եվ չնայած նման ձեւակերպումը լիովին համահունչ է, օրինակ, Սորոսի հիմնադրամի՝ հիշատակված դրամաշնորհը տրամադրելու նպատակային մոտեցումներին, «Սեւազգեստ կանայք, Հայաստան» նախաձեռնությունը ֆինանսական սնուցման այլ աղբյուրներ ունի:
Համենայն դեպս «Մամա Քաշ» (Mama Cash) միջազգային ֆեմինիստական հիմնադրամի պաշտոնական էլեկտրոնային կայքում հրապարակված հաշվետվության մեջ արտացոլված են տեղեկություններ նաեւ «Սեւազգեստ կանայք, Հայաստան» նախաձեռնությանը 2016 թվականի ընթացքում տրամադրված դրամաշնորհի մասին: Նշված է, որ 2016թ. ընթացքում հիմնադրամի կողմից «Սեւազգեստ կանայք, Հայաստան» նախաձեռնությանը տրամադրվել է 25 հազար եվրո դրամաշնորհ, որը նախաձեռնությունն օգտագործել է հակառազմական, ֆեմինիստական գործունեության ծավալման եւ նոր անդամներ ներգրավելու համար:
Թվերն ու փաստերը «խոսուն» են: Նաեւ՝ մտահոգիչ: Իսկ երբ նկատի ենք առնում, որ նշվածները օտարերկրյա տարբեր հիմնադրամների ֆինանսական աջակցությամբ գործող եւ այդօրինակ ուղղվածություն ունեցող եզակի ՀԿ-ներ չեն, այսինքն՝ այլ ՀԿ-ներ էլ կան, ապա մտահոգությունը սաստկանում է:
Ի՞նչ է ստացվում. հարեւան Ադրբեջանը սպառազինվում է, դա ուղեկցելով ագրեսիվ հռետորաբանությամբ եւ իր հասարակությանը նախապատրաստելով ու մղելով ռազմական ագրեսիայի՝ չհաշված ակնհայտ ֆաշիստական, հակահայկական տրամադրությունների սերմանումը: Հարեւան Ադրբեջանը լայնածավալ ռազմական ագրեսիայի է դիմում (ապրիլյան պատերազմը):
Եվ ահա հենց այդ նույն ընթացքում Հայաստանում գործող մի քանի ՀԿ-ներ դրսից փող են ստանում՝ ռազմականացման դեմ, նաեւ՝ մեր բանակի, նաեւ՝ «Ազգ բանակի» դեմ քարոզ ծավալելու համար: Սեռականությունն ու ֆեմինիստությունն էլ՝ բոնուս: Իսկ ինչո՞ւ, օրինակ, ակնհայտ ագրեսոր Ադրբեջանում օտարերկրյա ֆինանսավորողներն ու դրամաշնորհողները նման քարոզչություն չեն ծավալում:

Հարցը, իհարկե, հռետորական է: Ինչպես հռետորական է եւ այն հարցը, թե որքանո՞վ տրամաբանական, հիմնավորված ու նաեւ բարոյական կարելի է համարել «խաղաղաշինական, հակառազմական» գործունեությունը մի երկրում եւ հասարակության մեջ, որը հրամայական անհրաժեշտություն ունի պաշտպանվելու նախահարձակ ու թշնամաբար տրամադրված հակառակորդից:
Ողջամտությունը հուշում է, որ նման ՀԿ-ների վճարովի խաղաղասիրությունն ու սեռականությունը կարող են թանկ նստել մեր հասարակության վրա:

ԱՐՄԵՆ ՀԱԿՈԲՅԱՆ

Տպելու տարբերակ Տպելու տարբերակ

Դիտել Analitika, TOP, Լրահոս, Հասարակություն, Վերլուծական, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն