Գլխավոր » Politics, Լրահոս, Հարցազրույցներ, Քաղաքականություն

Ի՞նչը կարող է մեզանում դառնալ ներքին անկայունության պատճառ

Հունվար 10, 2018թ. 23:36
Կարեն Քոչարյան

Հարցազրույց քաղաքական տեխնոլոգ ԿԱՐԵՆ ՔՈՉԱՐՅԱՆԻ հետ

Քաղաքական ուժերը, սովորաբար, որսում են քաղաքական ակտիվության ՙՙհարմար պահը՚՚,  ու քանի որ ԱԺ ընտրություններից հետո բավական երկար ձգվեց որոշների լռությունը, կարող ե՞նք ենթադրել, որ առաջիկա զարգացումները՝ նախագահի ընտրություն, նոր վարչապետի նշանակում, կլինեն այն նպաստավոր իրավիճակները, երբ անգամ լուսանցք մղված ուժերը կսկսեն ակտիվանալ:
-Լուսանցքում գտնվողները՝ ոչ, չեն կարող, նրանց ակտիվանալը ոչ այնքան ներկուսակցական, որքան շատ նեղ ՙՙկռուգի՚՚, այդ ուժերի քաղբյուրոների կողմից որոշվելիք, լուծվելիք հարց է: Այս ու մնացած ուժերն ընդամենը կողքից կնայեն այդ գործընթացներին, որոշները դրանից հաճույք կստանան, որոշները՝ տհաճություն, բայց մեկ է, իրենք կլինեն միայն կողքից նայողներ:
Իսկ սպասվող ընտրությունը համապետական չէ, այսինքն, մեր քաղաքացիները նախագահի, վարչապետի ընտրության հարցում որևէ դերակատարություն չեն ունենալու, հետևաբար, այն չի կարող ակտիվացնել քաղաքական ուժերին:
Բայց քանի դեռ քաղաքական ուժն ունի քաղաքականության մեջ մնալու հույս ու ցանկություն, պետք է գոնե փորձի օգտվել նպաստավոր պահերից, այդպես չէ՞:
– Բայց սա ի՞նչ պահ է, ի՞նչ նպաստավոր իրավիճակ է, որ իրենք էլ փորձեն օգտվել, և կամ ո՞նց պիտի օգտվեն:
Գոնե կարծիք հայտնել կարո՞ղ են, քաղաքական ուժեր են, չէ՞, Արդարադատության նախարարությունում տարիներով գրանցված, ինչ-որ կերպ պիտի փորձե՞ն ժողովրդին հիշեցնել իրենց գոյության մասին:
-Կարծիք կարող են հայտնել, բայց նրանք այլևս հետաքրքիր էլ չեն ժողովրդի համար: Իսկ ինչ վերաբերում է ձեր ասած՝ ՙՙնպաստավոր պահին՚՚, ապա այսօր մեզանում չկա այդ քաղաքական ակտիվության պահը: Քաղաքական ակտիվությունը փոքր-ինչ այլ բան է, քան մենք հասկանում ենք, ու այդպիսի քաղաքական ակտիվություն մեզանում չի լինելու: Գուցեև սոցիալական ֆոնի վրա լինի հասարակական ընդվզում, այն, ինչ ուզում է անել ՙՙԵլք՚՚-ը՝ անընդհատ խոսելով սոցիալական խնդիրներից, սոցիալական բունտերից: Ի դեպ, ՙՙԵլքՙՙ խմբակցության պատգամավոր Գևորգ Գորգիսյանն էր ասել, թե այսօրվա իրավիճակը սոցիալական ընդվզման համար շատ հարմար է: Այս դեպքում, գուցեև, քաղաքական բոլոր ուժերը ակտիվանան: Բայց դա այլևս ո՛չ նախագահի, ո՛չ վարչապետի ընտրությունների հետ որևէ կապ չի ունենա ու պայմանավորված չի լինի դրանցով:
Օգտվելով երկրում առկա սոցիալական լարվածությունից, որն իր հետ բերեց գնաճը,  ՙՙԵլք՚՚-ը առաջ է անցնում մյուս ընդդիմադիրներից՝ պատրաստվում է երթով փողոց դուրս գալ: Բայց տարօրինակ չէ՞, որ փողոցային պայքարի տարբերակ է նախընտրում խորհրդարանական ուժը, որը իշխանության վրա ներազդելու տարբեր գործիքակազմեր ունի. կարող են օրենսդրական նախաձեռնություններով հանդես գալ, վերջապես, կա ԱԺ ամբիոն, ուրեմն ինչո՞ւ նախընտրել փողոցը:
-Ինը հոգանոց ՙՙԵլք՚՚-ը օրենսդրական նախաձեռնություններով հանդես է եկել, բայց դրանք չեն ընդունվել կառավարության կողմից:
Զուտ քաղաքական տեխնոլոգիայի տեսանկյունից երթ նախաձեռնելով՝  ՙՙԵլք՚՚-ը ճիշտ քայլ է անում, որովհետև հանրահավաքը կամ միտինգն արդեն հնացած մեթոդ է և չի կարող անհրաժեշտ մասսա հավաքել: Մինչդեռ երթը թամաշա է, որին կարող են մարդիկ հընթացս միանալ, այսինքն, երթն իր մեջ ունի դինամիկա: Ու քանի որ ՙՙԵլք՚՚-ը խնդիր ունի, ինչպես բոլոր ընդդիմադիրները, դառնալ ընդդիմադիր հատվածի առաջատար ուժ, նա ուզում է և կարող է ստեղծված քաղաքական նոր իրականության մեջ դառնալ ընդդիմության լիդերը: Այս հարցում ՙՙԵլք՚՚-ն ամենալավ վիճակում է գտնվում, քանի որ որպես խորհրդարանական ուժ նա ինքնադրսևորման  տարբեր ամբիոններ ունի:

Եվ հետո, ՙՙԵլք՚՚-ին անընդհատ մեղադրում են, թե իշխանությունների հետ ինչ-որ առումով համագործակցում է՝ սա է անում, նա է անում, և ՙՙԵլք՚՚-ն այստեղ էլ խնդիր ունի, պիտի փաստի, որ նախ ինքը ընդդիմությունն է ու որպես այդպիսին՝ ընդդիմության լիդեր ուժն է:
Այսինքն՝ հունվարի 19-ին սպասվող ՙՙԵլք՚՚-ի փողոցային երթն ընդամենը տեխնոլոգիական հնարք է՞:
-Իհարկե, դա նրա համար հնարավորություն է արձանագրելու մոտակա չորս տարիներին ընդդիմության լիդեր լինելը, իսկ այդպիսին լինելու մասին ՙՙԵլք՚՚-ն անընդհատ է մտածում, փորձում է կոնկրետ քայլեր անել: Առաջին քայլը եղավ այն, որ Արտակ Զեյնալյանին առաջադրեցին որպես նախագահի թեկնածու: Բայց քանի որ Գագիկ Ծառուկյանը հայտարարեց, թե իրենք նախագահի թեկնածու չեն առաջադրելու, ՙՙԵլք՚՚-ը մնաց միայնակ, առանց ՙՙԾառուկյան՚՚ խմբակցության ՙՙԵլք՚՚-ը չի կարող այդ քայլին գնա, քանի որ թվաքանակի խնդիր ունի: Դրա համար ՙՙԵլք՚՚-ի այդ նախաձեռնությունը, այսպես ասած, ՙՙթոզմիշ եղավ՚՚: Եվ իրենք մեկ այլ նախաձեռնություն ձեռնարկեցին. դա հունվարի 19-ին սպասվող սոցիալական երթն է:
Փաստորեն, խորհրդարանական ընդդիմության տիտղոսին արժանալու հարցում բավական անհարմար վիճակում է հայտնվում ՙՙԾառուկյան՚՚ դաշինքը: Իսկ գուցե իրականությունն էլ հենց այն է, որ այդ ուժը կար ու մնաց ՙՙայլընտրանք՚՚, որքան էլ որ այլընտրանք ասվածը ամենևին քաղաքական կատեգորիա չէ:
-Իրենք կան ու մնացին ոչ թե քաղաքական, այլ բիզնես ՙՙայլընտրանք՚՚: ԲՀԿ-ն հիմա էլ մեծ հաճույքով կհայտարարի, որ ինքը քաղաքական ՙՙայլընտրանք՚՚ է, պարզապես, նոր Սահմանադրությունն այդ հնարավորությունը նրան չի տալիս, այլ պարտադրում է ԱԺ անցած ուժերին ամրագրել, որ կա՛մ իշխանություն է, կա՛մ ընդդիմություն:

Նախօրեին ՙՙԾառուկյան՚՚ խմբակցության պատգամավոր Գևորգ Պետրոսյանն ասել էր, եթե նոր նախագահն ու նոր վարչապետը ընդունեն ՙՙԾառուկյան՚՚ դաշինքի ծրագրերը, ապա իրենց նրանց կողքին կկանգնեն: Ես էլ հարց ուղղեցի, իսկ հիմա ո՞ւմ կողքին եք:
ԲՀԿ-ին ոչ ոք որպես ընդդիմություն երբեք չի ընկալել, բացառությամբ թերևս 2015-ի փետրվարյան օրերի: Դրա համար էլ ՙՙԾառուկյան՚՚ խմբակցության համար ստեղծված վիճակն ամենևին էլ անհարմար չէ:
Դառնալով ՙՙԵլք՚՚-ի երթին՝ չե՞ք կարծում, որ փողոցն ՙՙիրենով՚՚ անելով, ՙՙԵլք՚՚-ը փակում է այլ, օրինակ, հեղափոխությունների կողմնակից ուժերի ճանապարհը: Մանավանդ որ, մեզանում հնչում են ակնարկներ, թե Իրանում էլ ցույցերը սկսվեցին սոցիալական լոզունգ-բողոքներով, իսկ ընթացքում քաղաքականացվեցին:
-Ես այդ կարծիքին չեմ, թե ՙՙԵլք՚՚-ը երթի է դուրս գալիս այլ ուժերի դիմացը փակելու համար, ինչու, որովհետև քաղաքական դաշտում նման մտադրություն ունեցող արմատական ուժերի ես չեմ տեսնում: Իսկ դուք տեսնո՞ւմ եք. այդ ո՞ր մեկը՝ ՀԱԿ-ը՞, ՕՐՕ-ն, թե՞ ՙՙՕրինաց երկիրն՚՚ է այդ ուժը, ո՞ր մեկն է, որ գոնե մի փոքր ակտիվություն է ցուցաբերել, ու հիմա ՙՙԵլք՚՚-ը նրա դիմաց փակել է ուզում:

Ես առհասարակ մեր քաղաքական դաշտում ոչ մի արմատական ուժ չեմ տեսնում: Եթե լինի սոցիալական բում, կարող են ծնվել ընդդիմադիր լիդերներ, կարող են ակտիվանալ արմատականները: Նաև չեմ բացառում, որ նրանք գուցեև երեք տարի կամ վեց ամիս անց ի հայտ գան, բայց այսօր այդպիսիք չկան: Իսկ քաղաքականությունը ՙՙեթե՚՚-ներ չի սիրում, կա ռեալ պոլիտիկ, որը չի սիրում պատասխանել ՙՙեթե լիներ այսպես, ապա կլիներ այնպես՚՚ հարցադրումներին: Ուրեմն, խոսել այն մասին, թե ՙՙԵլք՚՚-ը փողոցում երթ է անելու, որպեսզի իրենով փակի այլ ընդդիմադիր ուժերի առաջը՝ դա Կիկոսի մահի պատմությունն է ստացվում: ՙՙԵլք՚՚-ն ինքն է ուզում երթը որպես զենք իրացնել, որովհետև խնդիր ունի, ինչպես ասացի, ընդդիմության լիդերը դառնալու:
Ի՞նչ կասեք ՙՙԵրկիր Ծիրանի՚՚-ի մասին. Զարուհի Փոստանջյանը համահայկական ընդվզման նախապատրաստական եռանդուն աշխատանքների մեջ է. գնաց Լոս Անջելոս, հետո Մոսկվա, հիմա էլ Բեյրութում է, ձեռքի հետ էլ հեղափոխական լապտերիկներ է բաժանում մարդկանց:
-Գիտեք, ՙՙԵրկիր Ծիրանին՚՚ կամ ենթադենք՝ ՙՙԿույս կանանց միությունը՚՚ (որպիսին գոյություն չունի) ինձ համար իրարից ոչնչով չեն տարբերվում: Ես կարող եմ խոսել միայն լուրջ քաղաքական ուժերից, իսկ նմանների քայլերը ես ոչ պատրաստ եմ մեկնաբանել, ոչ էլ քննարկել: ՙԵրկիր Ծիրանի՚-ին կարող է դառնալ միայն երկիծաբանների քննարկման առարկա: Հեղափոխական լապտերիկների մասին էլ տեղյակ չեմ, որովհետև անլուրջ բաներին չեմ հետևում:
-Հայաստանի ներքին մարտահրավերը կոռուպցիան է, և այսօր կա  անհանգստություն, եթե այդ ախտի դեմ պայքարում իշխանությունը նկատելի հաջողություններ չգրանցի, ապա այն կարող է վերաճել ներքին անկայունացման լուրջ պատճառի: Սա հնարավոր համարո՞ւմ եք:
-Կոռուպցիա կա ամբողջ աշխարհում, ԱՄՆ-ում,արևմտյան զարգացած տարբեր երկրներում, Ռուսաստանում, ամեն տեղ կա և կա շատ ավելի մեծ չափերով: Խոսքս մեծ տենդերների, ատկատների մասին է, որոնք նկատելի չեն հասարակության համար: Ինչ վերաբերում է մեզ տեսանելի հայաստանյան կոռուպցիային, ապա պետք է ասեմ մի բան, ինչին կարող են նաև ոմանք չհամաձայնել: Վերջին շրջանում նկատել եմ, որ կոռուպցիան մեզանում զգալիորեն պակասել է: Մտեք անձնագրային բաժիններ, պետռեգիստոր, կադաստոր, ու կտեսնեք, որ այդ երևույթը չկա: Այսինքն, այնպես չէ, որ Հայաստանի քաղաքացին ամեն քայլափոխի կոռուպցիոն երևույթների հետ է շփվում: Մեզ մոտ հիմա ոչ այնքան կոռուպցիան է սուր արտահայտվում, որքան անարդարությունը, այն, որ օրենքի առաջ բոլորը հավասար չեն: Այսօր սա ավելի մեծ չարիք է դարձել, դրա վառ ապացույցը ՙՃվՃվ Արոյի՚ տղերքի օրինակն է: Նրանք շատ վաղուց պետք է նստած լինեին ճաղերի հետևում, ավելին, նրանք պետք է բանտից դուրս չգային, այդպիսիններին չի կարելի բերդից բաց թողնել: Բայց նրանք մարդ են սպանում, մարդ են թալանում ու չգիտես ինչու միշտ մնում են դրսում, որովհետև նրանց համար օրենքը չի գործում: Դրա համար, կրկնում եմ, կոռուպցիայից առավել այսօր վտանգ է դարձել անարդարությունը, անօրինությունը: Ու սա նաև արտագաղթի հիմնական պատճառն է: Եթե այս վիճակը չփոխվի, այո, կարող է դառնալ ներքին անկայունության լուրջ պատճառ:
ԱՐՄԻՆԵ ՍԻՄՈՆՅԱՆ

Տպելու տարբերակ Տպելու տարբերակ

Դիտել Politics, Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն