Գլխավոր » Politics, Լրահոս, Ռուսաստան, Վերլուծական, Տարածաշրջան, Քաղաքականություն

Հայաստանում հակառուսական ու հակաեվրասիական տրամադրությունների շիկացման մեթոդները

Հոկտեմբեր 6, 2017թ. 09:36
Ավագ Հարությունյան

Վերջին մի քանի ամիսների ընթացքում Հայաստանի քաղաքական օրակարգում հայտնվեցին թեմաներ, որոնք.

  1. պետք է գնահատել արհեստածին,
  2. որևէ աղերս չունեցող ՀՀ բնակչության համար կենսական նշանակություն ունեցող խնդիրների և դրանց լուծումների հետ,
  3. ուղղակի և անուղղակի կերպով դրանց արծարծումը սպառնում է ՀՀ ազգային անվտանգությանը:

Տեղեկատվական այդ հոսքերը խմբավորելով, կարելի է գնահատել, որ գործ ունենք տեղեկատվական պատերազմի վարման օրենքների, մեթոդաբանության և գործիքակազմի հետ: Այն կարելի է խմբավորել հետևյալ կերպ.

  1. Ժողովրդի կյանքում կարևորագույն խնդիրների վերաբերյալ ձևավորվում է կեղծ օրակարգ, տեղեկատվական և քարոզչական դաշտում բարձրացվում են արհեստական խնդիրներ և առաջարկվում դրանց լուծումները: Այդ օրակարգում ներառված են.
    • Հայաստանի առաջին և երկրորդ հանրապետությունների պետական, կուսակցական գործիչների գործունեության գնահատականները և միմյանց հակադրելը,
    • շուրջ երկու հարյուր տարի մեր ժողովրդի մոտիկ և հեռու հարևանների հետ ազգամիջյան շփման լեզվի անհրաժեշտության կասկածի տակ դնելը,
    • ՀՀ ազգաբնակչության, ՀՀ ազգային անվտանգության ապահովման համար ռազմավարական դաշնակիցներից հրաժարվելը,
    • ՀՀ-ում խիստ վտանգավոր և ծանր հետևանքներով հղի հակառուսականության և հակաեվրասիականության քարոզչության իրականացումը,
    • ՀՀ տնտեսական կայությունը ապահովող և զարգացման համար նպաստավոր իրական պայմաններ ստեղծող վերպետական կառույցներից Հայաստանի հրաժարումը,
    • Իշխանության տարբեր կառույցների, անձանց միջև իբր հակասությունների գոյության բացահայտումը, բարձրաձայնումը և լուծումների առաջարկումը,
    • Հայոց ոսկեղենիկ լեզվի դիլետանտական և թշնամական գնահատականը:
  1. Ընտրվում է հայ ժողովրդի և պետականության պատմության որոշակի ժամանակահատված, որի պետական, կուսակցական գործիչների գործունեության վերաբերյալ տրվում են դիլետանտական մակարդակով միակողմանի և կողմնակալ գնահատական և փաստերի կեղծմամբ իրականացվում է քարոզչություն: Այսպես.
  • Կատարվում է խորհրդային անցյալի պատմական իրողությունների կեղծում, փաստերի աղավաղում, անգամ՝ այդ ժամանակի փաստաթղթերի խեղաթյուրմամբ,
  • Ներկայացվում է այդ տարիների կուսակցական-պետական գործիչների գործունեության, դերակատարության վերաբերյալ միակողմանի, կողմնակալ, և փաստազուրկ քննադատություն, նսեմացվում և սևացվում Հայաստանի և հայության համար նրանց ունեցած մեծ վաստակը,
  • Փորձ է արվում նույնացնել խորհրդային տարիների հայ պետական գործիչների գործունեությունը և նպատակները երիտթուրքերի հետ, ցինիկաբար մոռանալով, որ երիտթուրքերի կառավարման տարիներին Արևմտյան Հայաստանի տարածքում ցեղասպանության հետևանքով համարյա հայ չմնած, իսկ խորհրդային տարիների ընթացքում Հայաստանի բնակչությունը 700 հազարից դարձավ շուրջ 3 միլիոն 700 հազար:
  • Փորձ է արվում նսեմացնել Հայ առաքելական եկեղեցու և Մայր Աթոռի, ժամանակին որպես հոգևոր-պետական-ազգային, իսկ այսօր հոգևոր-ազգային ամենակարևոր ինստիտուտի դերակատարությունը:
  1. Իբր մասնագիտորեն կատարված սոցիոլոգիական հարցումների միջոցով կատարվում է իրականության խեղաթյուրված ներկայացում, կեղծելով արդյունքները և եզրահանգումները: Ընդհանրապես, սոցիոլոգիական հարցումները` հիմքում որպես կանոն պատվիրված և իրականում ոչ հավաստի լինելով հանդերձ, միշտ էլ հետապնդել են քողարկված քաղաքական նպատակներ: Ավելին, հենց ծպտյալ կեղծիքը, տվյալների չհիմնավորված և թռուցիկ ներկայացումն ակնհայտ է դարձնում նման հարցում կատարողի ինչպես մասնագիտական անկարողությունը, այնպես էլ՝ պատվիրատուին: Նշյալի ցայտուն օրինակ է 2017թ. հունիսի 1-ից սեպտեմբերի 1-ը Գլոբալիզացիայի և տարածաշրջանային հետազոտությունների վերլուծական կենտրոնի ղեկավար Ստեփան Գրիգորյանի իրականացրած սոցիոլոգիական հարցման արդյունքները: Փաստեմ միայն, որ Ստեփան Գրիգորյանի ղեկավարած կենտրոնը Սորոսի հիմնադրամից ստացել է ընդհանուր առմամբ 148 հազար 530 դոլար գումար:

Նախ ներկայացնեմ, որ հարցման վերաբերյալ զեկույցի մեթոդաբանության, գործիքակազմի, հարցվածների տարիքային և սոցիալական խմբերի, հարցումը պատրաստող գլխավոր հետազոտողների, մասնակիցների, ուսումնասիրող խմբի անդամների, հարցումն իրականացնելիս մասնագիտական պատրաստվածության և կարգավիճակի, խմբագրական, գրաֆիկական, կոմունիկացիոն տվյալների վերաբերյալ անհրաժեշտ համապատասխան տեղեկատվությունը բացակայում է: Չկա որևէ կայք, ներառյալ այդ կենտրոնի պաշտոնական կայքը, որտեղ պետք է տեղադրված լիներ անհրաժեշտ տեղեկատվությունը:

Ընդամենը տեղի է ունեցել մամուլի ասուլիս «Կոնգրես» հյուրանոցում, Ստեփան Գրիգորյանը լրագրողներին իրազեկել է շուրջ երեք ամիս տևած և իբր իրականացված հարցման թվերը, որոնք էլ ԵԱՏՄ-ին, ՌԴ-ին, ՀԱՊԿ-ին և ԵՄ-ին ՀՀ բնակչության վերաբերմունքի գնահատման հիմք են հանդիսացել և ապագայում հանդիսանալու են: Քարոզչական դաշտում Սորոսի ֆինանսավորմամբ կառույցներն այդ մասին կարծում եմ կհոգան լավագույնս:

Ձեր ուշադրությունն եմ հրավիրում գրեթե նույն շեշտադրումներով նմանատիպ մի հարցման վերաբերյալ տեղեկատվություն, որն իրականացրել է ամերիկյան հայտնի Պյու հետազոտական կենտրոնը շուրջ երկու տարի՝ 2015-2016թթ., կենտրոնական և արևելյան Եվրոպայի երկրներում, ներառյալ՝ Հայաստանի Հանրապետությունում: Հիշեցնեմ, որ այդ տարիներին Հայաստանում տեղի ունեցան իրադարձություններ, որոնց խեղաթյուրված ներկայացումը ԶԼՄ-ներով բնակչության մոտ առաջացրեցին հակառուսականության լուրջ ալիք: Այսպես. Պերմյակովի դեպքը, Արցախում ապրիլյան ռազմական գործողությունները և Երևանում ՊՊԾ գնդի գրավմանը հաջորդած իրադարձությունները:

Ամերիկյան այդ հետազոտական կենտրոնի անաչառության վրա չկասկածելով, փաստենք միայն, որ այդ հարցման մասին անհրաժեշտ ամբողջ տեղեկատվությունը տեղադրված է հետազոտական կենտրոնի պաշտոնական կայքէջում:

Եվ այսպես ներկայացնեմ համեմատական զուգահեռներ Ս. Գրիգորյանի և ամերիկյան Պյու հետազոտական կենտրոնի կատարած հարցումների վերաբերյալ:

Ըստ Ս. Գրիգորյանի կենտրոնի հարցման՝ ՀՀ քաղաքացիների 58 տոկոսը ՀՀ ապագան կապում է ԵՄ անդամակցության հետ, և միայն 38 տոկոսն է դեմ: ՀՀ-ի՝ 2013թ. ԵՄ-ի հետ Ասոցացման համաձայնագրի ստորագրումից հրաժարվելը քաղաքացիների 78 տոկոսը գնահատում է բացասական, 20.5 տոկոսը՝ դրական: ՀՀ-ԵՄ հարաբերությունների ակտիվացումը քաղաքացիների 88.6 տոկոսը գնահատում է դրական, 10 տոկոսը՝ բացասական: Այս հարցումներից երևում է, որ իբր ՀՀ բնակչության ճնշող մեծամասնությունը Հայաստանի ապագան կապում է Եվրամիության անդամակցության հետ:

Իսկ ինչպիսի՞ն են ամերիկյան հետազոտական կենտրոնի իրականացրած հարցման ցուցանիշները:

Փաստենք, որ Եվրամիությունը ՀՀ բնակչության մոտ ուղղակի ասոցացվում է որպես ավանդական հոգևոր և ընտանեկան արժեքներին նետված սպառնալիքի աղբյուր, որով փորձ է արվում Հայաստանի Հանրապետության իրավական դաշտում ամրագրել այլասերվածների և պղծվածների իրավունքերը:

«Համասեռամոլությունը համարվո՞ւմ է բարոյապես անթույլատրելի» հարցմանն ի պատասխան հարցման մասնակցած 20 երկրների շարքում ՀՀ-ն զբաղեցնում է առաջին տեղը 98% արդյունքով, իսկ «Կո՞ղմ եք միասեռականների ամուսնություններին» հարցին առաջին երկու տեղերը զբաղեցնում են Հայաստանը և Վրաստանը 3% արդյունքով: «Բնակչությունը կո՞ղմ է, որպեսզի պետությունն օժանդակի կրոնական արժեքների տարածմանը» հարցին ի պատասխան, Հայաստանը 59%-ով գտնվում է առաջին տեղում:

Համաձայն Ս. Գրիգորյանի կենտրոնի իրականացրած հարցման այն հարցին, թե արդյո՞ք Ռուսաստանի Դաշնությանը համարում եք Հայաստանի դաշնակից, հարցվածների 34.33 տոկոսը դրական է պատասխանել, 30.56 տոկոսը՝ բացասական, իսկ 35.11 տոկոսը՝ համարել է մասամբ: Հարցվածների 40 տոկոսը կարծում է, որ ՌԴ-ի հետ սերտ հարաբերությունները խոչընդոտ են ՀՀ-ի՝ ԵՄ-ի հետ հարաբերություններում, 29.6 տոկոսը՝ ոչ, իսկ 29 տոկոսը՝ մասամբ:

Այս առումով հետաքրքրական է ամերիկյան հետազոտական կենտրոնի կատարած երկու հարցման պատասխանը:

Հարցին, թե արդյո՞ք «Ռուսաստանը պետք է դիմագրավի Արևմուտքին, թե ոչ», Հայաստանը «այո» պատասխանով 83%-ով ՌԴ-ից հետո գտնվում է երկրորդ տեղում: «Ռուսաստանին դիտո՞ւմ եք արդյոք որպես բուֆեր Ձեր և Արևմուտքի միջև» հարցին, այսինքն՝ «Հզոր Ռուսաստանը հանդիսանո՞ւմ է արդյոք հակակշիռ Արևմուտքի ազդեցությանը, թե ոչ» հարցին՝ Հայաստանը 83% դրական պատասխանով գտնվում է հարցված երկրների շարքում 2-րդ տեղում, ՌԴ-ից հետո: Սա է ՀՀ բնակչության վերաբերմունքը ՌԴ նկատմամբ ըստ ամերիկյան հետազոտական կենտրոնի կատարած հարցումների:

Ըստ Ստեփան Գրիգորյանի ղեկավարած կառույցի հարցման, թե ՀԱՊԿ-ն ապահովո՞ւմ է Հայաստանի անվտանգությունը հարցին 15 տոկոսը տվել է դրական պատասխան, իսկ 41 տոկոսը՝ բացասական: Հարցին, թե ՀԱՊԿ-ը կաջակցի՞ Հայաստանին, եթե Ադրբեջանի հետ պատերազմ սկսվի, 31 տոկոսը նշել է, որ կաջակցի, իսկ 63.4 տոկոսը՝ ոչ:

Իսկ ինչպիսի՞ն է ամերիկյան Պյու հետազոտական կենտրոնի գնահատականը: Հարցին, թե «Ռուսաստանը պարտավոր է պաշտպանել ուղղափառ քրիստոնեաներին», Հայաստանում հարցվածների 79%-ը դրական է պատասխանել, հարցված երկրների մեջ գտնվելով 1-ին տեղում: Պետք է հաշվի առնել, որ ընդհանուր առմամբ ՀԱՊԿ ասելով, Հայաստանի բնակչությունն առաջին հերթին այն ասոցացնում է Ռուսաստանի հետ:

Որո՞նք են Ստեփան Գրիգորյանի ղեկավարած Կենտրոնի հրապարակած այսպես կոչված հարցումների նպատակը: Դա ԶԼՄ-ներով ապատեղեկատվության տարածման միջոցով քարոզչության իրականացումն է, հայ ժողովրդի, ՀՀ քաղաքացիների ֆիզիկական և հոգևոր անվտանգության ապահովման համար գոյություն ունեցող պետությունների, ռազմա-քաղաքական և տնտեսական դաշինքների թուլացումը, այդ պետությունների և ժողովուրդների նկատմամբ թշնամանքի սերմանումը, սպասարկելով առաջին հերթին աշխարհաքաղաքական այլ կենտրոնների, պետությունների և միջազգային որոշակի կառույցների շահերը, իսկ որպես հետևանք՝ ՀՀ ազգային անվտանգության համար իրական սպառնալիք հանդիսացող Ադրբեջանի և Թուրքիայի պետական և ազգային շահերի սպասարկումը:

Հայաստանի Հանրապետությունում հակառուսական և հակաեվրասիական տրամադրությունների շիկացման փորձերն իրականում առաջին հերթին, ըստ էության, ունեն հենց հակահայկական ուղղվածություն, քանզի միտված են հայության հոգևոր, ռազմա-քաղաքական և աշխարհաքաղաքական կենսական շահերի խարխլմանը:

Ինչպե՞ս պայքարել այս ամեն կեղծիքի, ստի, մարդկանց ապակողմնորոշելու դեմ: Լուծումը մեկն է՝ ասել ճշմարտությունը փաստարկված, մասնագիտական հիմնավորմամբ, անշահախնդիր, ելնելով միմիայն Հայաստանի Հանրապետության և հայության ազգային-պետական շահերից: Ասել և գործել ամենուր, հասանելի բոլոր միջոցներով, կազմակերպված և համակարգված ձևով:

Ավագ Հարությունյան

Պատմական գիտությունների թեկնածու

Տպելու տարբերակ Տպելու տարբերակ

Դիտել Politics, Լրահոս, Ռուսաստան, Վերլուծական, Տարածաշրջան, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն