Գլխավոր » TOP, Լրահոս, Հարցազրույցներ, Քաղաքականություն

Մենք ՀՅԴ-ի հետ երկար ճանապարհ ունենք գնալու

Մայիս 16, 2017թ. 23:52
Վահրամ Բաղդասարյան

Հարցազրույց ՀՀԿ խմբակցության ղեկավար ՎԱՀՐԱՄ ԲԱՂԴԱՍԱՐՅԱՆԻ հետ

-Դեռ մեկ տարի  առաջ ՀՀԿ-ի ու ՀՅԴ-ի միջև ստորագրված փաստաթուղթը կոչվեց համագործակցության համաձայնագիր: Այս անգամ, սակայն, հստակ շեշտվեց, որ  ստորագրվում է քաղաքական կոալիցիա կազմելու մասին հուշագիր: Ի՞նչ տարբերություն նախորդ ու ներկա քաղաքական փաստաթղթերի մեջ:

-Ընդհանուր առմամբ, ես էական մեծ տարբերություն չեմ տեսնում: Իրողությունն այն է, որ այսօր մենք՝ ի դեմս Դաշնակցության, ունենք կոալիցիոն գործընկեր,  որի հետ կայացված քաղաքական որոշման հիմքում դրված են կարևորագույն ծրագրեր:

Կոալիցիոն հուշագրով մենք վերահաստատում ենք մեր հավատարմությունը մեկ տարի առաջ երկու կուսակցությունների միջև կնքված քաղաքական համագործակցության համաձայնագրին, ու հայտարարում, որ  պատասախանատու ենք դրանում ամրագրված դրույթների կատարմանը:

   Բայց դրանով հանդերձ քաղաքական կոալիցիան սահմանում է նոր առաջնահերթություններ, ինչպիսիք են՝  հակակոռուպցիոն պայքարին նոր թափ հաղորդելը, ազգ-բանակ հայեցակարգի ամբողաջացումը, կայուն զարգացում ապահովող սոցիալական շուկայական տնտեսական համակարգի ձևավարումը:  Անցում ենք կատարել կառավարման խորհրդարանական համակարգի և այս փուլում մեծ աշխատանք ունենք անելու մեր երկրի Սահմանադրությանը համահունչ օրենսդրական դաշտ  մշակելու ուղղությամբ:

 Կալիցիոն համաձայնագրով առավել հստակեցվեցին ու ընգրկուն դարձան ՀՀԿ-ՀՅԴ   գործընկերային հարաբերությունները: Քաղաքական կոալիցիոն համագործակցությունը վերաբերում է կառավարության ողջ գործունեությանը: Բացառությամբ մեկ դեպքից, երբ  վարչապետի առաջադրման իրավունքը պատկանում է Հայաստանի Հանրապետական կուսակցությանը, մնացած բոլոր հարցերը մենք պետք է կյանքի կոչենք միասնաբար՝ խորհրդակցելով, բանակցելով բոլոր խնդիրների շուրջ՝ նոր օրենքներից սկսած մինչև Հայաստանի ու Արցախի անվտանգության խնդիրը: Քաղաքական կոալիցիայի այդ հսկայածավալ  աշխատանքը արդյունավետ իրականացնելու նպատակով կձևավորենք նաև կոալիցիոն խորհուրդ:

  –Իսկ այս կամ այն հարցի շուրջ ներկոալիցիոն հնարավոր  տարակարծությունների դեպքում որոշումներն  ինչպե՞ս են կայացվելու՝ կոնսենսուսի սկզբունքո՞վ: 

-Նախ, ես չեմ կարծում, որ երկու կուսակցությունները կարող են հայտնվենք այնպիսի հակասական  իրավիճակներում, որ չգտնեն հարցերը լուծելու ուղիներ: Մենք պետք է աշխատենք գտնել ոսկե միջինը: Եթե նման իրավիճակ լինի, իհարկե, ՀՀԿ-ն որպես մեծամասնություն, առաջատար ուժ կունենա իր առաջնահերթ կարծիքը: Բայց ես չեմ կարծում, որ չկարողանանք գտնել համատեղ լուծման տարբերակներ մեր կոալիցիոն գործընկերոջ հետ: Հուշագրում արձանագրված է՝ կողմերը պետք է ձգտեն այլ հարցերի շուրջ որոշումներ ընդունել համախոհությամբ՝ պահպանելով փոխադարձ հարգանք, հանդուրժողականություն: Ինչպես նաև ազատ են հրաապարակայնորեն ներկայացնել սեփական դիրքորոշումները:

Ընդհանրապես, քաղաքականության մեջ որևէ մեկը չի կարող ասել՝ երբեք: Նույնիսկ ընտանիքներում են լինում ապուհարզաններ, ուր մնաց, որ չլինեն քաղաքական բաժանումներ: Բայց ՀՀԿ-ՀՅԴ հուշագիրը, որը կգործի մինչև 6-րդ գումարման Ազգային ժողովի լիազորությունների ավարտը, այսինքն, մինչև 2022 թվականը, իր մեջ ներառում է նաև նման իրավիճակներից ելքեր: Ի վերջո, ուժերը մեկը մյուսին պարտադրանքով չեն պահում կոալիցիայի մեջ: Այնպես որ, եթե այդ տարիներին կլինեն գաղափարական  հակասություններ, սկզբունքային տարաձայնություններ ու, եթե  բանակցությունները չեն տա ցանկալի արդյունք, ապա կոալիցիայից հեռացող կուսակցությունը պարզապես գրավոր  կտեղեկացնի իր գործընկերոջը ու դուրս կգա կոալիցիայից:

-Շատ  կարևոր է պատասխանատվության հարցը, ինչը մշտապես համարվել է նախկին կոալիցիաների աքիլլեսյան գարշապարը. կողմերից մեկը նախընտրել է սահմանափակվել  միայն իր ունեցած պորտֆելների համար պատասխանատվություն կրելով, ինչը  խոցելի է դարձրել այդ  համագործակցությունը:  Մինչդեռ այս կոալիցիայում պատասխանատվությունը, կարծես թե, կախված չի լինի պորտֆելների քանակից:

Դեռևս նախընտրական շրջանում, ու մինչ ՀՀԿ-ՀՅԴ կոալիցիոն հուշագրի ստորագրումը, ես բազմիցս հայտարարել եմ՝ չկա կիսատ կամ ընդամենը մեկ ոլորտի պատասխանատվություն,  կա ամբողջական քաղաքական պատասխանատվություն: Սա նշանակում է, որ  կոալիցիոն քաղաքական ուժերը պատասխանատվություն պետք է ստանձնեն հավասարապես: Ինձ համար անընդունելի է այս հարցում կիսատ- պռատությունը, որը տանում է պառակտման, և խոցելի է դարձնում այդ համագործակցությունը: Մենք ՀՅԴ-ի հետ երկար ճանապարհ ունենք գնալու, հետևաբար, այդ ամբողջ բեռն էլ միասին պետք է տանենք: Այս երկու ուժերը ունեն գաղափարան լուրջ ընդհանրություններ, ու միասնաբար պետք է իրականացնենք մեր ծրագրերը և կրենք քաղաքական  պատասխանատվությունը: Այնպես որ ՀՀԿ-ՀՅԴ քաղաքական կոալիցիան հիմնված է  ամբողջական պատասխանատվության  ստանձնման վրա՝ անկախ պորտֆելների քանակից: Ինչպես գրված է հուշագրում՝ ձևավորում ենք քաղաքական կոալիցիա և քաղաքական պատասխանատվություն ենք ստանձնում կառավարության ողջ գործունեության համար:

-Ընտրություների արդյունքում ՀՀԿ-ն խորհրդարանում կազմեց մեծամասնություն, ու  կարող էր միայնակ ձևավորել կառավարություն,  ինչո՞ւ, այնուհանդերձ, գնացիք կոալիցիայի ստեղծման ճանապարհով: Արդյո՞ք պատճառներից մեկն այն չէ՞, որ կարևորագույն օրենքների ընդունման համար կպահանջվի պատգամավորների ընդհանուր թվի 3/5-րդի աջակցությունը, ու այստեղ  ՀՅԴ-իօգնության կարիքը կլինի:

 -Վերջին  տարիներին մենք  բազմիցս հայտարարել ենք, որ չենք ձգտում միահեծան իշխանության: Մենք երբեք չենք խուսափել  քաղաքական համագործակցություններից: Իսկ ՀՅԴ-ի հետ ունենք գաղափարական ընդհանրություններ: Սա երկու ուժերի միջև առաջին կոալիցիոն քայլը չէ, ունենք երկար տարիների համատեղ աշխատանքային  փորձ: Եվ այդ տարիներին համոզվել ենք, որ դրանից միայն  դրական արդյունք ենք ստացել: Ինչ վերաբերում է   հարցադրմանը, թե կլինի պատգամավորների ընդհանուր թվի 3/5-րդի աջակցության անհրաժեշտություն, ապա հիշեք, որ չնայած նախորդ խորհրդարանում նման խնդիր չկար, բայց մենք  դարձյալ գնացինք ՀՅԴ-ի հետ համագործակցության: Այնպես որ, ճիշտ չեմ համարում դրանով պայմանավորել երկու ուժերի գաղափարական համագործակցությունը: Պետք է նաև նշեմ, որ բացի մեր կոալիցիոն գործընկերոջ հետ աշխատելուց, ՀՀԿ-ն համագործակցելու է նաև ընդդիմադիր գործընկերների հետ: Ես կարծում եմ, որ այս խորհրդարանում իշխանությունն ու ընդդիմությունը շատ հարցերում կհամագործակցեն: Առանց նման համագործակցության մենք չենք կարող երկրի համար կարևոր օրենքները կյանքի կոչել:  Հիշեցնեմ  նախագահ Սերժ Սարգսյանի հայտնի ելույթը, ուր նա խոսեց ազգային համաձայնության իշխանության  ձևավորման մասին, նշելով՝ լուծումների իրականացումը կլինի լայն համաձայնության դաշտի պատասխանատվության ներքո:  Այնպես որ, սա մեր սկզբունքն է: Քաղաքական համագործակցության մասին է վկայում նաև ՀՀԿ խմբակցության կազմը, այն բազմակուսակցական է, նրանում ընդգրկված են 5, 6 կուսակցությունների անդամներ, ինչպես նաև բավական թվով անկուսակցականներ  կան: Կարծում եմ, ույն ոգով կկազմվի նաև մեր նոր  կառավարությունը:

Անցած տարվա համաձայնությունների շրջանակում ՀՅԴ-ն ուներ երեք   նախարարական և երկու՝ մարզպետի պորտֆելներ: Այս անգամ ի՞նչ պատկեր կարող է լինել, եթե նկատի ունենաք, որ ՀՅԴ-ն ավելին ստանալու  ակնկալիքներ ունի ու դա չի թաքցնում:

-Նման ձգտումները բնական են, ո՞ր քաղաքական ուժը չի ցանկանում ավելի շատ  լծակներ, ավելի շատ ազդեցություն ունենալ: Բայց մենք դեռ պորտֆելների շուրջ բանակցություններ չենք սկսել: Լուրջ քաղաքական ուժերի համար բանակցություններում առաջնայինը գաղափարական է ու երկրի համար կարևոր  հարցերի շուրջ համաձայնության գալը: Իսկ պորտֆելները՝ կլինեն մեկը, թե երկուսը, անկեղծ ասած, դրանց շուրջ դեռ  չկան բանակցություններ: Համբերեք ևս երկու օր, ամեն ինչ պարզ կլինի ու մենք կհրապարակենք վերջնական արդյունքերը:

-Կա՞ որոշակիություն, թե ովքե՞ր կլինեն խորհրդարանի ղեկավար կազմում՝ ԱԺ նախագահի  տեղեկալների պաշտոններում, քանի որ  մամուլում արդեն տարբեր անուններ են շրջանառվում: Ի դեպ, օրենքի պահանջ է՝ փոխնախագահներից մեկը  պետք է ընդդիմադիր ուժի ներկայացուցիչ լինի:

-Այստեղ ևս դեռ քննարկումները չենք սկսել, մոտակա երեք օրերին այս հարցը ևս կպարզվի: Մենք չենք շտապում, ժամանակ ունենք: Դրա փոխարեն պատգամավորների տեղերն ենք բաշխել խորհրդարանում,  ամեն մեկը գիտի, թե դահլիճում ո՞րն է իր տեղը: Աշխատասենյակների բաշխումը դեռ ավարտված չէ, քանի որ դեռ պարզ չէ, թե ովքե՞ր կլինեն  հանձնաժողովի նախագահներ, տեղակալներ: Բայց ամեն ինչ ժամանակին կհասցնենք: Արդեն հայտնի է, թե ո՞վ է վարելու մայիսի 18-ին մեկնարկելիք Ազգային ժողովի անդրանիկ նիստը: Մինչ ԱԺ նախագահ ընտրվելը, ընդունած կարգի համաձայն, այն կվարի պատգամավորներից ամենատարեցը՝ ՀՀԿ կուսակցությունից պատգամավոր դարձած քրդական համայնքի ներկայացուցիչ Կնյազ Հասանովը:

Սահմանադրական նորմ է, որ Աժ փոխնախագահներից մեկը պետք է լինի ընդդիմությունից, տվյալ դեպքում նրա թեկնածությունը պետք է ներկայացնի ՙ՚Ծառուկյան դաշինք՚՚-ը: Մենք տեղյակ չենք, թե այդ խմբակցության ներսում ի՞նչ քննարկումներ են գնում. թող խորհրդակցեն ու ներկայացնեն  իրենց թեկանածուին,  դեռ ժամանակ ունեն:

-Պարոն Բաղդասարյան, ինչպե՞ս կարձագանքեք հաճախ շրջանառվող այն մտքին, թե մինչև 2018-ը կունենանք ժամանակավոր կառավարություն՝ ժամանակավոր վարչապետով: Եվ ինչպե՞ս կմեկնաբանեք վարչապետ Կարեն Կարապետյանի հետևյալ խոսքը, թե պատրաստ է 2018-ից հետո էլ լինել Հայաստանի Հանրապետության վարչապետ և ղեկավարել երկիրը:

-Կյանում ոչինչ հավերժական չէ, ամեն ինչ է ժամանակավոր:  Բնականաբար, երբ  2018-ին նոր Սահմանադրությունն ամբողջությամբ կմտնի ուժի  մեջ,  այդ ժամանակ ևս  կառավարությունը կտա  հրաժարական ու կձևավորվի նորը: Ինչ վերաբերվում է վարչապետի ժամանակավոր լինելուն, երբ Կարեն Կարապետյանը նշանակվեց վարչապետ կրկին ասվում էր, թե ժամանակավոր է: Բայց մենք հայտարարեցինք՝ ամեն ինչ կախված է կառավարության աշխատանքից: Կառավարության հիմնադրույթները քննարկվել են կուսակցությունում ու հավանության արժանացրել, իհարկե մենք աշխատանքին չենք տվել գնահատական չենք տվել, այլ դրված հիմքերն ենք դրական գնահատել: ՀՀԿ համագումարում  հայտարեցինք, եթե հաղթենք ընտրություններում կառավարությունը՝ վարչապետի գլխավարությամբ կշարունակի իր գործունեությունը: Իսկ այժմ մենք ունենք մեկ տարի ժամանակ, եթե այդ հիմքերը կյանքի կկորչվեն ու կլինեն երկրի համար արդյունավետ, բնականաբար,  կառավարությունը հետագայում ևս կշարունակի իր աշխատանքը:

Իսկ Կարեն Կարապետյանի հայտարարությունը շատ դրական եմ գնահատում:  Ուրախ եմ, որ իմ երկրի վարչապետը վստահ է իր ուժերի վրա ու համոզված, որ կառավարությունը կարող է կյանքի կոչել իր առաջ դրված խնդիրները:

ԱՐՄԻՆԵ ՍԻՄՈՆՅԱՆ

Տպելու տարբերակ Տպելու տարբերակ

Դիտել TOP, Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն