Գլխավոր » Politics, Ադրբեջան, Լրահոս, Հարցազրույցներ, Տարածաշրջան, Քաղաքականություն

ՀԱԿ-ն անվերջ ասում էր՝ սա ընտրություն չէ, այլ խաղաղության հանրաքվե, ուրեմն,  արձանագրենք՝ այդ հանրաքվեում իրենց տեսակետը ջախջախիչ պարտություն կրեց

Ապրիլ 6, 2017թ. 12:23
Միհրան ՀԱկոբյան

Հետընտրական գործընթացի բացակայությունը պայմանավորված է լավ ընտրություններով
Հարցազրույց ՀՀԿ նորընտիր պատգամավոր ՄԻՀՐԱՆ ՀԱԿՈԲՅԱՆԻ հետ
Այս խորհրդարանական ընտրություններն առաջինն էին, որ տեղի ունեցան նոր Սահմանադրության, նոր ընտրական օրենսգրքի ընդունումից և մեր երկրում խորհրդարանական համակարգի հաստատումից հետո, անգամ ԱՊՀ դիտորդներն անկեղծորեն նկատեցին, որ անհամբեր սպասել են, թե ի՞նչ փորձության կենթարկվի ՀՀ ընտրական նոր օրենսդրությունը: Եվ հիմա, ինչպես ասում են, գնահատման պահն է:
-Իմ գնահատմամբ մենք ունեցանք շատ լավ ընտրություններ, և դրանք ոչ թե ինչպես ընդունված է ասել մեկ, այլ մի քանի քայլ առաջ էին: Այս ընտրություններում բացառվեցին կրկնաքվեարկությունները, լցոնումները, հրապարակվեցին մասնակից քաղաքացիների ցուցակները: Ընտրությունները կազմակերպվեցին շատ բարձր մակարդակով և ես ուրախ ու հպարտ եմ մեր պետության և հասարակության համար, որ կարողացանք պատվով կազմակերպել նման որակի ընտրություններ: Բարձր էին նաև դիտորդական առաքելությունների գնահատականները: Իսկ ԱՊՀ դիտորդներն առավել ուշի-ուշով էին հետևում, որովհետև ուզում էին համոզվել, և համոզվեցի, որ Հայաստանն անցում կատարելով խորհրդարանական համակարգի՝ մեծ թռիչք կատարեց հենց ժողովրդավարության հարցում:
Այս ամենով հանդերձ նաև գաղտնիք չէ, որ այս ընտրություններում լուրջ գործոն դարձավ ընտրակաշառքը, կայացավ երկկողմ գործարք ընտրողի ու ընտրվողի միջև:
– Ընտրակաշառքի մասին խոսակցությունները երեկ չեն սկսվել, 10 տարուց ավելի է, որ դրա մասին խոսում է, և հատկապես խոսում են այն ուժերը, որոնք ձախողվում են ընտրություններում կամ իրենց չեն բավարարում արդյունքները: Անհաջողություն կրած քաղաքական ուժերը երկար տարիներ նույն մեթոդաբանությամբ փորձում են բացատրել իրենց ձախողման պատճառը: Ամենավատն այն է, որ այդ ուժերի մի մասը փորձում է առանց լուրջ հիմնավորումների պնդել, թե ընտրություններում հաղթում է ընտրակաշառքը: Նրանք այդ կերպ փորձում են ջրից մաքուր դուրս գալ, հեշտ է սեփական անհաջողությունը պայմանավորել ընտրակաշառքով, խոսել վախի մթնոլորտից, վարչական ռեսուրսից: Եթե ընտրակաշառքն է որոշում ընտությունների ելքը, կնշանակի ընտրողների մեծամասնությունը ծախված մարդիկ են, ինչո՞ւ եք վիրավորում մեր ժողովրդին, խորհուրդ կտամ այդչափ վատ կարծիք չունենալ մեր ժողովրդի մասին: Դա շատ վտանգավոր երևույթ է: Մի մոռաեցեք, որ կա նաև մեդալի հակառակ երեսը. ասում են՝ 10 000 վերցրեցին, գնացին, քվեարկեցին. ստացվում է, որ նման խոսք ասողները 10000-ից էլ էժան են, որ ժողովուրդը իրենց փոխարեն նախընտրեց այդ գումարը: Հիշեք պարոնայք, երբ բացվում է պանդորայի արկղը նաև նման փաստարկներ են դուրս գալիս:
-Հետաքրքիր պատկեր է ռեյտինգայինների դաշտում: Սկզբից ևեթ կանխատեսվեց, որ ռեյտինգային թեկնածուները իրար ՙկգզեն՚, մեծ գումարներ կծախսեն, բայց նրանցից շատերը չեն հայտնվի խորհրդարանում: Եվ իրոք, ՀՀԿ ցուցակին նայելիս համոզվում ենք, նախկին օդիոզ դեմքերը չկան, փաստորեն, հեղափոխություն կատարվեց շնորհիվ ընտրական նոր օրենսգրքի:
-Ես չգիտեմ, օդիոզ դեմքեր ասելով ո՞ւմ նկատի ունեք, բայց կարող ենք արձանագրել, որ այս ռեյտինգային ընտրակարգն ավելի սրեց մրցակցությունը՝ ինչը շատ լավ է: Եթե մենք ընտրել ենք ժողովրդավարության զարգացման ճանապարհը ու հայտարարում ենք, որ չունենք այլընտրանք, ապա պետք է գործենք խիստ մրցակցային պայմաններում: Ռեյտինգային ընտրակարգը հենց դրա ապահովման լավագույն մեխանիզմներից մեկն է: Ընտրությունների արդյունքներով էլ տեսնում ենք, որ ընտրապայքարում հաղթեցին նրանք, ովքեր ավելի մրցունակ ծրագրերով հանդես եկան, հաղթեցին նրանք, ովքեր ավելի մեծ հեղինակություն ունեն շրջաններում, ընտրատարածքներում: Երբ մրցակցությունը մեծանում է՝ հաղթում են արժանիները. սա ես շատ եմ կարևորում մեր երկրի համար:
– Կարծում եք մարզերում ծավալվեց գաղափարների պայքա՞ր:
-Չի կարող չլինել գաղափարների, ծրագրերի պայքար: Հասկանում եմ, որ կան ազգակցական, ընկերական հարաբերություններ, կա ուժեղ, ազդեցիկ մարդու գործոնը, բայց այդ ամենով մեկտեղ, տեսեք, թե ովքե՞ր են ռեյտինգային կարգով ընտրվածները, մարդիկ են, որոնք ունեն անցած ճանապարհ, ունեն արած գործեր և դա ներկայացնում են հասարակությանը: Այն թեզերը, որ տարբեր քաղաքական ուժեր կամ հասարակական կառույցներ պտտում են լրատվական դաշտում, դրանք համոզիչ չլինելով՝ ծիծաղելի են: Խոսենք փաստով. հաղթած կուսակցությունը ՀՀԿ-ն է, կարդացեք ՀՀԿ-ի ու պարտված կուսակցությունների ծրագրերը և պարզ կլինի, թե դրանցից ո՞րն է ավելի մրցունակը, ո՞րն է իրատեսական խնդիրներ առաջարկում: Եթե պետք է խնամի, ծանոթ, բարեկամով կամ ընտրակաշառքով ընտրություններում հաղթես, ուրեմն, ինչի՞դ է պետք նման խորքային ծրագրեր ունենալը: Նորից ուզում եմ ասել՝ չի կարելի մեր հասարակությանը վիրավորել ու հոտի տեղ դնել՝ շրջանառելով ընտրակաշառքի ու թաղային հեղինակությունների թեման: Մարդիկ ընտրում են նաև ծրագրերով ու գաղափարներով, և դա մեր հասարակության մեծամասնությունն է:
ՀՀԿ-ին հաջողվեց ներկայանալ նոր դեմքերով, ներկայանալ սերանդափոխված: Մնում է տեսնել, արդյոք այս փոփոխությունը որակյա՞լ է, այսինքն, նորացված իշխանությունն ի զորու կլինի՞ Հայաստանը դուրս բերել ստեղծված դժվարին վիճակից:
-Նայեք ՀՀԿ ցուցակը ու կհամոզվեք, որ սերնդափոխություն ասվածը չի նշանակում, թե եկել են նորելուկներ: Եկել են մարդիկ, որոնք ունեն անցած լուրջ ճանապարհ, ունեն փորձառություն, ունեն հմտություններ: Այսինքն՝ կատարված սերնդափոխությունը մեխանիկական չէ, այն շատ լուրջ, մտածված գործընթաց է: ՀՀԿ ցուցակում այնպիսի մարդիկ չեն, որոնք մինչ այս զբաղված են եղել այլ գործերով ու այսօրվանից պետք է սկսեն քաղաքականությամբ կամ պետական կառավարմամբ զբաղվել: Եկել են երիտասարդ մարդիկ, որոնք ունեն կառավարման փորձ, ունեն լավ կրթություն ունեն կայուն գաղափարներ:
-Դուք ևս ՀՀԿ-ի երիտասարդ կադրերից եք, նոր խորհրդարանում որտե՞ղ եք տեսնում ձեզ, ո՞ր հանձնաժողովում, քանի որ, ըստ լուրերի, ՀՀԿ-ում արդեն իսկ սկսվել են ներքին քննարկումները, թե ինչպիսի՞ն է լինելու խորհրդարանի ղեկավար կազմը՝ նախագահ-տեղակալները, և ո՞վ, որտե՞ղ, ո՞ր հանձնաժողովում է տեղ գրավելու:
-Ես թիմային աշխատանքի կողմնակից եմ ու կլինեմ այնտեղ, որտեղ իմ կարիքը կլինի, որտեղ կարող եմ արդյունավետ աշխատել և մեծ ծառայություն մատուցել մեր պետությանն ու հասարակությանը: Ինչ վերաբերում է լուրերին ՀՀԿ-ում սկսված ներքին քննարկումների մասին, անկեղծ ասած, տեղյակ չեմ: Եվ կարծում եմ, այս պահին դեռ ժամանակավրեպ է այդ մասին խոսելը, որոշ ժամանակ անց ամեն ինչ պարզ կլինի:
-Ընտրություններում հաղթած ՀՀԿ-ն ունի հնարավորություն միայնակ ձևավորելու նոր կառավարություն. այս անգամ ևս կնախընտրեք կոալիցիոն կառավարության ստեղծումը՞, թե՞ միայնակ կստանձնել կառավարության գործունեության պատասխանատվությունը: Եվ առհասարակ, ո՞ր տարբերակը առավել նպաստավոր կլինի պետության համար:
-Նախ ասեմ, որ դեռ քարոզարշավի մեկնակից առաջ ու ընթացքում հայտարարվեց, որ հաղթանակի դեպքում կառավարությունը գլխավորելու է վարչապետ Կարեն Կարապետյանը: Ես սա ամենից կարևորն եմ համարում: Իսկ կոալիցիա կլինի՞, թե՞ չի լինի՝ ցույց կտա ժամանակը: ՀՀԿ-ն երբեք չի խուսափել պատասխանատվության ստանձնումից, քավ լիցի, այս տարիներին ՀՀԿ-ն ապացուցեց, որ վախեցողներից ու փախչողներից չէ: Խնդիրն այլ է, որքան շատ ուժեր ներգրավված լինեն պետականաշինության գործընթացում և պատասխանատվություն ստանձնեն, այդքան լավ կլինի մեր պետության ու ժողովրդի համար: ՀՅԴ-ի ծրագրերը, մոտեցումները մեծամասամբ համընկնում են ՀՀԿ-ի պատկերացրած մոտեցումներին ու տեսլականներին, այնպես որ, եթե ՀՀԿ-ն որոշի գնալ կոալիցիոն պատասխանատվության ճանապարհով, ապա գործընկեր ուժը կլինի Դաշնակցությունը:
Այս ընտրությունների բացառիկությունը նաև հետևյալում է. եղան ուժեր, որոնք մի կողմ դնելով ամբիցիաները շնորհավորեցին հաղթողին, արմատական ընդդիմադիրները պարտության մեջ տեսան իրենց մեղքը և ժողովրդին հրապարակ չտարան, քաղաքացիական բախումներ չհրահրեցին, հասարակությանը ճամբարների չբաժանեցին, ինչի ականատեսը եղել ենք նախկինում: Ընդդիմության որա՞կն է նաև փոխվել:
-Նախ նկատեմ, որ խորհրդարանական ընդդիմադիրները հետընտրական շրջանում հնչեցրին տղամարդավարի գնահատական, առանց մեծ-մեծ խոսքերի, թե ընտրությունները կեղծվել են, ասացին՝ մենք մեր ձայները հավաքել ենք, պահել ենք ու մեր մանդատները վերցրած գնալու ենք խորհրդարան և պայքարելու ենք որպես ընդդիմադիր ուժեր: Իրոք, մեկմեկու հաղթանակ ճանաչելը, մեկմեկու շնորհավորելը բացառիկ իրադրություն է ու շատ կարևոր է քաղաքական մշակույթի տեսանկյունից: Այդ առումով, պետք է շնորհավորել և՛ մեր պետությանը, և՛ մեր ժողովրդին:

Ինչ վերաբերում է պարտվածներին, մի մասն ասացին, որ չեն բողոքարկելու արդյունքերը, չեն գնալու հետընտրական գործընթացների, սա ևս ողջունելի է, մարդիկ հասկացել են, որ իրենք թերացել են, սխալվել են, պետք է վերլուծեն ու հասկանան սեփական բացերը: Ի վերջո, կյանքն ընտրություններով կամ խորհրդարան մտնել-չմտնելով չի ավարտվում: Բայց մյուս կողմից արմատական ընդդիմությունը լավ հասկանում է, որ չկա փողոց դուրս գալու հասարակական պատվեր, և դա պայմանավորված է ընտրությունների որակով, լավ կազմակերպված լինելով: Նա, ով գնացել ու քվեարկել է, գիտի, որ իր ձայնը տեղ է հասել, ամեն ոք կարող է մտնել ԿԸՀ-ի կայքէջ ու պարզ տեսնել, թե ո՞վ է գնացել ընտրության, ո՞վ՝ ոչ, ուրեմն, ինչո՞ւ փողոց դուրս գալ: Խորհրդարան չանցած արմատական ընդդիմությունը շատ լավ է հասկանում, որ մարդկանց չի կարող փողոց հանել: Եթե կարողանային՝ մեկ վայրկյան չէին մտածի: Մենք այնքան լավ ընտրություններ իրականացրինք, որ որևէ մեկի մոտ չի մնացել կասկած, որ դրանք կեղծված են, հետևաբար, հետընտրական գործընթացների բացակայությունը պայմանավորված է ընտրական գործընթացների որակով:
Պարտված ուժերը հայտարարություններ են անում, թե շատ շուտով խորհրդարան կմտնի Արցախի տրոհման փաստաթուղթը. կ՞ա նման վտանգ:
-Այդ ուժերի նմանատիպ խոսակցությունները նոր չեն, նորից սկսել են հանդես գալ հող պահողների դիրքերից, իբրև թե իշխանությունը հողերն հանձնում է, իրենք էլ պահպանողներն են: Ում մոտ ավտոմատ են գտնում ասում է՝ վերցրել էի, որ հենց հողերն ուզենան հանձնել՝ պաշտպանեմ: Ծիծաղելի է : Լավ, որքա՞ն կարելի է ասել, որ Լավրովի պլան չկա: Երևի այդ ուժերը հաճույք են ստանում հակառակը պնդելուց, կամ ինքնահաստատման խնդիր ունեն: Բազմաթիվ անգամ Հայաստանի ղեկավարությունը ամենաբարձր մակարդակով ասել է, որ նման բան չկա, հիմա ժողովուրդը ո՞ւմ պետք է հավատա, ղեկավարության հայտարարությունների՞ն, թե՞ մարդկանց, որոնք օրը մեջ փոխում են իրենց քաղաքական հայացքները՝ մի բևեռից մեկ այլ բևեռում հայտնվելով: Դե, հիմա էլ որոշել են հող պաշտպանողների դիրքերից հանդես գալ:
-<<Ի՞նչ գործ ունեն հայ զինվորները ադրբեջանական հողում: Ձեր երեխաներին մի թուլատրեք զավթողական քաղաքականության զոհը դառնալ, մի աջակցեք օկուպացիոն քաղաքականությանը: Լեռնային Ղարաբաղը Ադրբեջանի հնամենի հողն է>>. Մեհրիբան Ալիևայի՝ հայ մայրերին ուղղված այս աբսուրդ հայտարարությունը հետևանք չէ՞ ՀԱԿ-ի խաղաղության քարոզի:
-Իհլամ Ալիևն ու Մեհրիբան Ալիևան առաջին անգամ չէ, որ նման հայտարարություններ են անում, անցած տարիներին էլ են նույն խոսքերն ասել ու դեռ ասելու են: Ռազմական, քաղաքական ճանապարհով խնդիրը չեն կարողանում լուծել, ստիպված նման հայտարարություններ են անում: Կարծում եմ, պետք չէ այդ անհեթեթությունները պայմանավորել Կանգրես-ՀԺԿ դիրքորոշման հետ:

Ամեն դեպքում, ընտրությունները ցույց տվեցին, որ առաջին նախագահ Լևոն Տեր- Պետրոսյանի մոտեցումներն ընդունված չեն մեր երկրում: ՀԱԿ-ն անվերջ հայտարարում էր, թե սա ընտրություն չեն համարում, այլ խաղաղության հանրաքվե, ուրեմն, այդ դեպքում մենք էլ պետք է արձանագրենք, որ այդ հանրաքվեում իրենց տեսակետները ջախջախիչ պարտություն կրեցին:
ԱՐՄԻՆԵ ՍԻՄՈՆՅԱՆ

 

Տպելու տարբերակ Տպելու տարբերակ

Դիտել Politics, Ադրբեջան, Լրահոս, Հարցազրույցներ, Տարածաշրջան, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն