Գլխավոր » Լրահոս, Հարցազրույցներ, Քաղաքականություն

Անհրաժեշտ է  երկրում հաստատել համերաշխության մթնոլորտ, և ներհայաստանյան թշնամանքի էջը փակել 

Ապրիլ 30, 2018թ. 17:31
Նիկոլ Փաշինյան 1

«Հիմա մեր խնդիրը համերաշխության, նորմալ, աշխատանքային մթնոլորտի ձևավորումն է, և բոլոր հարցերին մենք կմոտենանք հենց այդ տեսանկյունից», – հայտարարեց Հայաստանի երրորդ նախագահ Սերժ Սարգսյանի և Հանրապետական կուսակցության հետագա իշխանավարման դեմ պայքարը գլխավորող Նիկոլ Փաշինյանը «Ելք» խմբակցության այսօրվա նիստից հետո, որի ժամանակ նա առաջադրվեց վարչապետի թեկնածու:

«Հանրապետական խմբակցության հետ հանդիպման արդյունքներով պարզ կդառնա հարցի պատասխանը»

«Ազատություն»․ – Արդեն իսկ առաջադրել է «Ելք»-ը Ձեր թեկնածությունը վարչապետի պաշտոնում, սակայն գլխավոր խնդիրը՝ արդյո՞ք հանրապետականներից կքվեարկեն Ձեր օգտին, դրանից է կախված Ձեր ընտրությունը: Դուք այս հարցում խնդիրներ տեսնո՞ւմ եք, թե՞ կարծում եք՝ այս հարցը արդեն իսկ լուծված է:

Նիկոլ Փաշինյան․ – Մենք այսօր Հանրապետական խմբակցության ներկայացուցիչների կամ ամբողջ խմբակցության հետ հանդիպում կունենանք, և այդ հանդիպման արդյունքներով պարզ կդառնա հարցի պատասխանը:

«Ազատություն»․ – Դեռևս խնդրահարույց ինչ-որ իրավիճակ կա՞, Ձեր կարծիքով: Նկատի ունեմ՝ դեռ պետք է համոզե՞ք նրանց, թե՞ արդեն որոշված է այս հարցը:

Փաշինյան․ – Ոչ որոշված է, ոչ էլ պետք է համոզեմ, այսինքն՝ կա քաղաքական իրավիճակ, և, էլի եմ ասում, խնդիրը այն մասին չէ, որ ինչ-որ մեկին նշանակել կամ չնշանակել, ընտրել կամ չընտրել վարչապետ, խնդիրը ճգնաժամը հանգուցալուծելու մասին է, խնդիրն այն մասին է, թե հանգուցալուծվո՞ւմ է վաղը այս քաղաքական իրավիճակը, թե՞ չի հանգուցալուծվում:

«Ազատություն»․ – Կգտնվի՞ այդ անհրաժեշտ վեց հոգին, կարծում եք:

Փաշինյան․ – Այս հարցի պատասխանը, կարծում եմ, Հանրապետական խմբակցության ներկայացուցիչները իրենք կտան:

«Ժամանակ չեմ ունեցել Ռոբերտ Քոչարյանի հայտարարությանը ծանոթանալու»

«Ազատություն»․ – Ռոբերտ Քոչարյանն ասել է, որ ճամպրուկ չէ իշխանությունը, որ վերցնեն ու տան Նիկոլ Փաշինյանին, և Դուք ուլտիմատումներ ներկայացնելով անգամ մարդկանց ինքնասիրության հետ եք խաղում՝ ստիպելով նրանց գնալ իրենց սկզբունքների, համոզմունքնհերի դեմ: Ինչպե՞ս կարձագանքեք:

Փաշինյան․ – Ճիշտն ասած, ժամանակ չեմ ունեցել Ռոբերտ Քոչարյանի հայտարարությանը ծանոթանալու:

«Պետք է հենց առաջին օրվանից սկսենք երաշխիքների ձևավորումը ազատ, արդար և օրինական ընտրություններ անցկացնելու համար»

«Ազատություն»․ – Ընտրվելու դեպքում Դուք կարո՞ղ եք երաշխավորել, որ բոլոր այն Ձեր կողմից մատնանշված խնդիրները՝ օլիգարխիան, իշխանությունը և բիզնեսը իրարից տարանջատելու, դատարանների անկախություն, այս ամենը լուծվելու են: Ի վերջո, Դուք էլ եք ընդունել, որ այս ամբողջ շարժման նպատակը ոչ թե մի վարչապետին մյուսով փոխարինելն է, այլ իրական արժեքների հեղափոխություն անելը: Դուք կարո՞ղ եք վստահեցնել, որ Ձեր ընտրության դեպքում Դուք իսկապես քայլ առ քայլ բոլոր այդ խնդիրները լուծելու եք, որոնց համար և ժողովուրդը դուրս է եկել փողոց:

Փաշինյան․ – Իհարկե, հակառակ դեպքում էս պրոցեսը իսկապես իմաստ չի ունենա, որովհետև մեր բոլորի խնդիրը իրական և դրական փոփոխություններ բերելն է, հակառակ դեպքում՝ ինչի՞ համար այս ամեն ինչը:

«Ազատություն»․ – Նկատի ունեմ՝ Դուք կկարողանա՞ք իսկապես համակա՛րգը կազմալուծել, այս դեպքում արդեն անձերի խնդիրը չէ՝ համակարգը:

Փաշինյան․ – Եթե Դուք նկատի ունեք կոռուպցիան, եթե Դուք նկատի ունեք մնացած նեգատիվ երևույթները, այո, ես համոզված եմ, որ կկարողանամ:

«Ազատություն»․ – Ո՞ւմ միջոցով եք Դուք դա անելու, ինչպե՞ս եք պատկերացնում:

Փաշինյան․ – Ինչ որ արել ենք մինչև հիմա՝ ամեն ինչ արել ենք ժողովրդի միջոցով և շարունակելու ենք անել [ժողովրդի միջոցով]:

«Ազատություն»․ – Չե՞ն լինելու Ձեր շրջապատում այն անձինք, ում տեսել է հանրությունը և ում նաև մեղավոր է համարել այդ ամենում:

Փաշինյան․ – Գիտե՞ք, ես լավ չհասկացա՝ Դուք ում նկատի ունեք, բայց իմ շրջապատը հայտնի է, և, նկատի ունեմ, մենք խոսում ենք էլի, Դուք ասում եք համակարգը, նեգատիվ երևույթները վերացնելու մասին, և ես համոզված եմ, որ բոլոր էդ նեգատիվ երևույթները կվերացվի: Ես հիմա չեմ ուզում հարցերը քննարկել անուն-ազգանունների մակարդակով և ընդհանրապես ճիշտ էլ չի հիմա ու ընդհանրապես անուն-ազգանուններ քննարկել, պետք է սկզբունքներ քննարկել և այդ սկզբունքները կիրառել:

Վարչապետի պաշտոնում իր առաջին քայլերի մասին լրագրողների հարցին ընդդիմադիր գործիչը պատասխանեց․ – «Առաջին քայլերը պետք է լինեն հենց նշված խնդիրների շուծմանն ուղղված քայլերը, և մենք, քանի որ ժամանակի խնդիր կա և լուծելու խնդիր կա, պետք է հենց առաջին օրվանից սկսենք երաշխիքների ձևավորումը ազատ, արդար և օրինական ընտրություններ անցկացնելու համար»:

«Ազատություն»․ – Մոտավորապես ի՞նչ ժամկետներում եք Դուք դա տեսնում:

Փաշինյան․ – Տրամաբանական, հնարավորինս կարճ, բայց՝ տրամաբանական ժամկետներում: Ես չեմ կարող հիմա ժամկետներ նշել, որովհետև այս կապակցությամբ պետք է նաև քննարկումներ ունենանք, այլ ուժերի պատկերացումները նաև իմանանք և պետք է մաքսիմալն անենք, որպեսզի իրապես հավասար հնարավորություններ ստեղծենք:

«ԵՏՄ-ից դուրս գալու խնդիր չենք դնում»

«Ազատություն»․ – Երեկ հանդիպել էիք նաև Ռուսաստանի Պետդումայի ներկայացուցիչներին, Դուք ասացիք, որ վստահեցրել եք, որ հետքայլ չի լինելու հարաբերություններից․․․

Փաշինյան․ – Հետքայլ․․․ ասել եմ, որ ռևերս չի լինելու:

«Ազատություն»․ – Այո, և ավելի խորացնելու եք հարաբերությունները: Ես ուզում եմ հասկանալ՝ արդյո՞ք Դուք հրաժարվել եք Եվրասիական տնտեսական միությունից դուրս գալու Ձեր ցանկությունից: Ի վերջո, այդ հարցով նաև «Ելք»-ը, մենք հիշում ենք, լսումներ կազմակերպեց: Ինչ-որ բան փոխվե՞լ է այս հարցում, թե՞ ուժի մեջ է:

Փաշինյան․ – Երբ որ դու ընդդիմություն ես, և ընդդիմությունը հնարավորություն չունի պրոբլեմները, որոնք կան այս կամ այն կառույցում, քննարկել այդ կառույցի գործադիր մակարդակում, այսինքն՝ իշխանությունների հետ համապատասխան երկրների, և ընդդիմության պարագայում դա տարբերակներից մեկն է, որպեսզի էդ պրոբլեմները բարձրաձայնվեն և համապատասխան արձագանք ստանան: Երբ որ դու իշխանություն ես, իշխանություն ես ներկայացնում, հնարավորություն ունես էդ բոլոր պրոբլեմները համապատասխան փաստաթղթավորել, գնալ և քննարկել գործընկեր երկրների հետ և համբերատար, երկխոսության մթնոլորտում բոլոր խնդիրները լուծել: Եվ ես համոզված եմ, որ մեր քննարկումների արդյունքում մենք դրական, պոզիտիվ արդյունքներ կունենանք:

«Ազատություն»․ – Հիմա այդ հարցը առկախվա՞ծ է, թե՞ փոխել եք Դուք ԵՏՄ-ից դուրս գալու․․․

Փաշինյան․ – Ես հայտարարել եմ, ու քանի որ ես հայտարարել եմ, որ մենք ԵՏՄ-ից դուրս գալու խնդիր չենք դնում, չենք դնելու, բայց դա չի նշանակում, թե մենք ասում ենք, որ ԵՏՄ-ում խնդիրներ չկան, և մենք բոլոր էդ խնդիրները Եվրասիական տնտեսական միության գործընկեր երկրների հետ կքննարկենք:

«Ազատություն»․ – Այսինքն, դիրքորոշման փոփոխությո՞ւն է տեղի ունեցել, կարո՞ղ ենք դա արձանագրել:

Փաշինյան․ – Ո՞ւմ դիրքորոշման փոփոխություն:

«Ազատություն»․ – «Ելք» խմբակցության:

Փաշինյան․ – «Ելք» խմբակցության դիրքորոշման մասին չի խոսքը, Հայաստանի հնարավոր, պոտենցիալ նոր կառավարության դիրքորոշման մասին է խոսքը:

«Կարող եմ երաշխավորել, որ ամբողջական օրինականություն կհաստատվի»

«Ես կարող եմ երաշխավորել, որ վարչապետ ընտրվելու դեպքում Հայաստանի Հանրապետությունում ամբողջական օրինականություն կհաստատվի», – հայտարարեց ընդդիմադիր գործիչը: Վարչապետ ընտրվելու դեպքում իր երկրորդ քայլը, նշեց նա, «պետք է լինի կառավարության ձևավորումը, որի համար սահմանված է 15-օրյա ժամկետ, որից հետո 20-օրյա ժամկետում պետք է տեղի ունենա կառավարության ծրագրի քննարկումը»:

«Մարտի 1»-ը՝ մեր պատմության այդ էջը պետք է ամբողջական բացահայտվի»

Հարցին՝ շարունակո՞ւմ է պնդել, որ «Մարտի 1»-ի գործով Հայաստանի երկրորդ նախագահ Ռոբերտ Քոչարյանը պետք է անպայման հարցաքննվի, և վարչապետ դառնալուց հետո ձեռնամուխ կլինի՞ դրան, Փաշինյանը արձագանքեց․ – «Ես կարծում եմ, որ «Մարտի 1»-ի գործի բացահայտումը կարևորագույն խնդիրներից է, և մեր պատմության այդ էջը պետք է ամբողջական բացահայտվի: Ես հիմա իմ այսօրվա կարգավիճակի բերումով չեմ կարող այլ հայտարարություններ անել, բայց իմ տեսակետները դուք գիտեք: Ես պնդում եմ, որ պետք է նորմալ նախաքննություն ընթանա»:

«Ազատություն»․ – Անհանգստացա՞ծ է Ռոբերտ Քոչարյանը, դրանո՞վ է պայմանավորված այս հարցազրույցը:

Փաշինյան․ – Չեմ կարող ասել:

«Անհրաժեշտ է ստեղծել աշխատանքային մթնոլորտ և երկրում հաստատել համերաշխության մթնոլորտ»

Խորհրդարանական մեծամասնության՝ Հանրապետական խմբակցության հետ, Փաշինյանի խոսքով, «էս պահին ոչ մի համաձայնություն չկա, որովհետև տեղի է ունեցելաշխատանքային նախնական քննարկում, որի հիմնական նպատակը եղել է արդեն բուն հանդիպումը և մեխանիզմը խոսակցության քննարկելը»: «Էսօր կլինի հանդիպում՝ կա՛մ կլինի համաձայնություն, կա՛մ չի լինի համաձայնություն», – նշեց նա:

«Ազատություն»․ – Ընտրական օրենսգրքում ռեյտինգային ընտրակարգը Դուք նախատեսում եք ընդհանրապես վերացնե՞լ, հանե՞լ:

Փաշինյան․ – Այո, կա այդպիսի գաղափար:

«Ազատություն»․ – Եվ Դուք կարծում եք, որ իշխող մեծամասնությունը խորհրդարանում բոլոր Ձեր այդ փոփոխություններին քվեարկելո՞ւ է, և Դուք ունենալո՞ւ եք բավարար ձայներ:

Փաշինյան․ – Ես չեմ կարող էդպիսի պնդում անել, որովհետև, ասում եմ, դեռևս քննարկումներ չկան: Կլինեն քննարկումները՝ քննարկումների արդյունքում կգանք ընդհանուր եզրակացության և կտեսնենք, թե ինչ է լինում: Ես խնդիրը այլ կերպ եմ ձևակերպում՝ ես ասում եմ, որ անհրաժեշտ է ստեղծել աշխատանքային մթնոլորտ և երկրում հաստատել համերաշխության մթնոլորտ, և ընդհանրապես ներհայաստանյան թշնամանքի էջը փակել և բոլոր հարցերի քննարկման համար բավարար անհրաժեշտ նորմալ պայմաններ ստեղծել:

<…>

Մենք հիմա պետք է հասկանանք, որ կանգնած ենք ներքաղաքական ճգնաժամը հանգուցալուծելու անհրաժեշտության առաջ, և մենք պետք է հանգուցալուծենք այդ ներքաղաքական ճգնաժամը: Եվ բոլոր այն խելամիտ քայլերը, որոնք անհրաժեշտ կլինի անել ներքաղաքական ճգնաժամը հանգուցալուծելու համար, այդ քայլերը կարվեն: Դա չի նշանակում, որ հիմա ես խոսում են որևէ կոնկրետ սցենարի մասին: Քննարկումների արդյունքներով կկայացվեն որոշումներ, և ի վերջո, ասում եմ՝ վաղը, առաջին հերթին, պետք է տեղի ունենան վարչապետի ընտրություններ, և ես ասել եմ, որ հույս ունեմ և կարծում եմ, որ վարչապետի ընտրությունները պետք է տեղի ունենան առանց նախապայմանների: Այսինքն՝ դա է կարևորը աշխատանքային մթնոլորտ ձևավորելու համար:

«Ազատություն»․ – Հանրապետական խմբակցության հետ հանդիպման ժամանակ Դուք ի՞նչ եք հորդորելու նրանց՝ որ Ձեզ կո՞ղմ քվեարկեն: Այսինքն, ո՞րն է լինելու Ձեր հորդորը, Ձեր խոսքը այս հանդիպմանը:

Փաշինյան․ – Ես արդեն ասաց, որ քննարկման թեման, ընդհանրապես բոլորի հետ քննարկման թեման ներքաղաքական ճգնաժամի հանգուցալուծումն է: Այսինքն՝ էլի եմ ասում, էստեղ խնդիր չի գնում ինձ վարչապետ ընտրել-չընտրելու մասին, խնդրի բովանդակությունը ներքաղաքական ճգնաժամը հանգուցալուծելն է, և մենք պետք է մտածենք դրա մասին: Որովհետև եթե չի տեղի ունենում ընտրությունը, ներքաղաքական ճգնաժամը խորանում է:

Տպելու տարբերակ Տպելու տարբերակ

Դիտել Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն