Գլխավոր » Լրահոս, Հարցազրույցներ, Քաղաքականություն

Պայթյունավտանգ իրավիճակ մեր երկրում չի կարող լինել

Ապրիլ 13, 2018թ. 21:30

Հարցազրույց ԱԺ ՀՀԿ խմբակցության պատգամավոր ԳԱԳԻԿ ՄԻՆԱՍՅԱՆԻ հետ

Սերժ Սարգսյանի վարչապետության դեմ պայքար նախաձեռնած ուժերը  հայտարարել են խաղաղ անհնազանդության բազմաթիվ գործիքներ կիրառելու մասին՝ գործադուլ- դասադուլներ, շուրջօրյա բողոքի ակացիաներ,  փողոցներ կփակեն, ցանցային  հանրահավաքներ կանցկացնեն, հնարավորություն չեն տա, որ համակագը որևէ շարժում անի: Այս ամենին ինչպե՞ս եք վերաբերում, նման զարգացումները  չեն անհանգստացնո՞ւմ իշխանությանը:

-Ցանկացած գործընթաց, եթե այն սկզբից մինչև վերջ կատարվում է օրենքի շրջանակներում, չի կարող անհագստացնել իշխանությանը: Հակառակը, մենք նման քայլերը նաև համարում ենք բնական, ինչո՞ւ, որովհետև իշխանությունների բոլոր քայլերից հնարավոր չէ, որ ողջ ժողովուրդը լինի գոհ: Այսինքն, կան ու կլինեն դժգոհողներ, որոնք էլ կարող են նման ակցիրաներով իրենց դիրքորոշումն արտահայտել, ինչը ժողովրդավարական երկրի պարագայում շատ բնական երևույթ է: Ժողովրդավարական երկրներում հենց այդպես էլ լինում է: Սակայն նման ակցիաները, ցույցերը կլինեն ընդունելի այնքան ժամանակ, քանի դեռ կմնան օրենքի շրջանակներում: Այն պահից, երբ կազմակերպիչների քայլերը կլինեն ոչ օրինական, բնականաբար, կհամարվեն անթույլատրելի ու դատապարտելի: Եվ ես  համոզված եմ, որ այդ ժամանակ իշխանությունը պետք է օրենքով սահմանված կարգով հակազդի ընդդիմության անօրինական քայլերին: Ի դեպ, սա ոչ միայն Հայաստանում պետք է լինի կիրառելի, այլև աշխարհի բոլոր ժողովորդավարական երկրներում, և այնպես էլ կա:

Նիկոլ Փաշինյանը մի կողմից հայտարարում է, թե անօրինական գործողություններ չեն անելու, բայց մյուս կողմից, քամահրանքով է վերաբերվում  քաղաքապետարանի որոշմանը, որով արգելվել է շուրջօրյա հավաքների անցկացումը: Սա ինչի՞ մասին է հուշում:

– Չենթարկվել քաղաքապետարանի որոշմանը, բնականաբար նշանակում է իրականացնել օրենքից դուրս գործողություններ: Եվ եթե իրենք կանեն քայլեր, որոնք դուրս կլինեն օրենքի դաշտից,  ուրեմն պետք է նաև պատրաստ լինեն  իշխանությունների քայլերին, որոնք իրենց կարգի հրավիրելու նպատակ կհետապնդեն:

-Ըստ ձեզ, մինչ հիմա ակցիաների մասնակիցների կողմից եղե՞լ են օրենքի խախատման դեպքեր:

-Եղել են, մի քանի հոգի քաղաքի բանուկ հատվածում ճանապարհն էին փակել, կամ փողոցի մեջտեղում վրան էին բացել, ու կաթվածահար արել Երևանի տրանսպորտային երթևեկությունը: Մեր շատ քաղաքացիներ արդեն իսկ իրենց դժգոհությունն արատահայտել են: Ոստականները կարողացան հանգիստ գործողություններով բացել ճանապարհը, ու մեղմել լարվածությունը:

-Ի դեպ, ոստիկանների զուսպ քայլերից անգամ ակցիայի կազմակերպիչներին են զարմացած:

– Մեր ոստիկանների զուսպ, հավասարակշված քայլերը ողջունելի են: Ինձ շատ ուրախացնում է, որ ցուցարարների կողմից իրականացվող խախտումներին ոստիկաններն համաչափ ուժ են կիրառում: Ես համոզված եմ, որ այդպես էլ շարունակվելու է: Մինչ հիմա ցուցարաների կողմից օրենքից դուրս դրսևորված քայլերը իշխանություներ կանխել է հավուր պատշաճի՝ օրենքի շրջանակներում: Ես վստահ եմ, որ իշխանությունը նույն կերպ  կշարունակի իրականացնել իր հետագա գործողությունները, անօրինական քայլերը կկանխվեն կոռեկտ ձևով: Բայց նաև հույս ունեմ, որ ակցիայի մասնակիցների կողմից արտառոց գործողությունների դրսևորումներ չեն լինի, եթե եղավ դրանց համապատասխան էլ ուժ կկիրառվի:

-Որպես պատգամավոր ինչպե՞ս եք վերաբերվում Փաշինյանի այն հայտարարությանը, թե ապրիլի 17-ին կշրջափակեն ԱԺ շենքը, պատգամավորներին  թույլ չեն տա մտնել շենք, նույնիսկ ծրագրում են կանգնել պատգամավորների բնակարանների դիմաց և թույլ չտա, որ նրանք գան խորհրդարան ու մասնակցեն վարչապետի ընտրությանը:

– Սա ես համարում եմ մեր  իրավունքի ոտնահարում: Հայաստանի յուրաքանչյուր քաղաքացի ունի ազատ տեղաշարժվելու իրավունք և որևէ մեկը չի կարող սահմանափակել նրա այդ իրավունքը, դա անթույլատրելի է: Այդ իրավունքը, բնականաբար, տարածվում է նաև պատգամավորների վրա: Հետևաբար, եթե իրենք արգելեն պատագամավորներիս ազատ տեղաշարժը ու խոչընդոտեն բացառապես մեր պաշտոնական պարտականության կատարումը, դա այլ բան չի համարվի, քան օրենքի խախտում: Իսկ այդ դեպքում արդեն իշխանության կողմից պետք է լինի համապատասխան արձագանք,որպեսզի մենք կարողանանք ապրիլի 17-ին հանգիստ  իրավիճկում իրականացնել մեր քվեարկությունը:

-Երկրում ստեղծված իրավիճակը ոմանք համարում են պայթյունավտանգ, նույնիսկ համեմատում  88 թվականի հետ. համաձա՞յն եք նման գնահատականի հետ:

 -Այսօր տեղի ունեցող գործողությունները համեմատել 88-ի շարժման, մեր  ազգային զարթոնքի պայքարի հետ, կներեք, բայց դա ուղղակի սրբապղծություն է: Դա անարգանք է այն բոլոր մարդկանց հիշատակին,  որոնք եղել են մեր ազգային շարժման առաջամարտիկները:Ինչ վերաբերում է պայթյունավտանգ լինելուն, այս պահին դժվար է նման գնահատական տալը: Ես դեռ նման նախանշաններ չեմ տեսնում, քանի որ այս պահի զարգացումները թույլ չեն տալիս հանգել նման հետևության: Նախ, ես չեմ տեսնում ժողովրդի մեծ մասնակցություն, և երկրորդ,   ակցիրաների կազմակերպիչները բազմիցս ասել են, որ իրենց գործողությունները լինելու են օրենքի սահմաններում: Եվ այս երկու փաստարկներն ինձ հուշում են, որ պայթյունավտանգ իրավիճակ մեր երկրում չի կարող լինել:

Իհարկե, չի բացառվում, որ նման իրավիճակներում ի հայտ գան նաև պրովակատորներ, որոնք գուցեև ամեն ինչ անեն իրավիճակը սրելու համար: Դա արդեն կազմակերպիչների խնդիրն է, պետք է կարողանան իրենց շարքերից դուրս վռնդել պրովակատորներին: Մյուս կողմից, նմաններին հայտնաբերելն ու հեռացնելը նաև իշխանության խնդիրն է:

-Բողոքի ակցիայի կաղմակերպիչները հիմնականում թիրախավորել են երիտասարդությանը, մանավորաբար,  ուսանողությանը, և ԵՊՀ-ն հանդես եկավ կոչով, որով իր  ուսանողներին հորդորեց քաղաքական, քաղաքացիական ակտիվության ցուցաբերելիս հետևել ՀՀ Սահմանադրությանը, օրենքներին, դրսևորել քաղաքացիական բարոյականություն: Սակայն այս կոչը քննադատվեց ակտիվիստերի կողմից: Ի՞նչ կասեք այս առնչությամբ:

-Այս հարցում ես ունեմ երկու նկատառում. առաջին, ճիշտ չեմ համարում բուհ-երի քաղաքականացումը: Երկրորդ, ուսանողություն ինքը պետք է կողմնորոշվի, որ դասի ժամանակ, դասերի հաշվին նման միջոցառումների մասնակցելը տրամաբանական քայլ չէ: Իրենք երեխաներ չեն, հասուն մարդիկ են ու պետք է կարողանան թացը չորից տարբերել: Եթե մասնակցելու են այդ հանրահավաքներին, ակցիրաներին, որտեղ ամեն ինչ ընթանում է  խաղաղ, օրենքի սահմաններում, նորմալ է, դասերից հետո իրենք են տնօրինում իրենց ազատ ժամանակը: Իսկ եթե  դասերի հաշվին մասնակցելու են այնպիսի գործողությունների, որտեղ անօրինական քայլեր են լինելու, ապա իրենք նաև պետք  է իրենց հաշիվ տան, որ մասնակից են դարձել անօրինականության: Իսկ դա կարող է ունենալ իր հետևանքները՝ օրենքով սահմանված կարգով:

-Բողոքի ակցիարների կազմակերպիչներն հիմա ամենից շատ կարևորում են ժողովրդի մեծ թվով մասնակցությունը,  Փաշինյանը վստահ է, որ շատերը կգան , անգամ հայտարարեց, եթե 100 000  մարդիկ չկանգնի իր կողքին, ինքը դուրս կգա քաղաքականությունից: Կարծում եք, կարո՞ղ են գեներացնել այնքան ռեսուրս, որով կկարողանան  իրավիճակ փոխել:

Նախ , ըստ իս, 100 հազարավոր մարդիկ չեն գա ՙԱզատության՚ հրապարակ, բազմաքանակ մարդիկ չեն լինի Փաշինյանի կողքին ու ինքն էլ չի հեռանա քաղաքականությունից: Ինչ վերաբերում է քաղաքական իրավիճակ փոխելուն, ապա այսօր մեր երկրում ամեն ինչ ընթանում է օրենքով սահմանված կարգով, այսինքն,  ՀՀԿ-ՀՅԴ կոալիցիան որպես մեծամասնություն այժմ գտնվում է օրենքով սահմանված գործընթացի մեջ, այն է՝ պատրաստվում է եկող շաբաթվա սկզբին ընտրել երկրի վարչապետին: Թե մեծամասնությունը ո՞ւմ է ընտրելու այդ պաշտոնում, դա իր  որոշելիքն է, քանի որ դա օրենքով սահմանված մեր իրավունքն է: Հակառակ կերպ մտածելն ուղղակի անհեթեթություն է:

Ի դեպ, դա ոչ միայն օրենքով մեզ տրված  իրավունք է, այլև պարտականություն: Խանգարել խորհրադարանական մեծամասնության կողմից օրինական գործընթացի իրականացմանը կնշանակի գնալ անօրինական քայլի:

Եվ ես դարձյալ ուզում եմ հույս հայտնել, որ  ամեն ինչ կանցնի օրենքի շրջանակներում, ակցիայի կազմակերպիչների գործողությունները կլինեն օրինական, ինչի մասին բազմիցս  հայտարարել կազմակերպիչները: Բայց նաև ուզում եմ ասել, եթե նրանց գործողությունները դուրս գան օրենքի շրջանակներից, ապա համոզված եմ, որ իշխանությունը համապատասխան քայլեր կկատարի երկրի օրինական կարգը պահելու համար:  Այլ բան չի կարող լինել մեր երկրում:

Ա. ԱՌԱՔԵԼՅԱՆ

 

Տպելու տարբերակ Տպելու տարբերակ

Դիտել Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն