Գլխավոր » TOP, Զինված ուժեր, Լրահոս, Հասարակություն, Հարցազրույցներ

Եվ դարձյալ նետերն ուղղել են մեր բանակի ու եկեղեցու դեմ

Ապրիլ 3, 2018թ. 17:43
Վարդան Ավետիսյան

 

Հարցազրույց ՊՆ նախարարի խորհրդական, գեներալ-մայոր ՎԱՐԴԱՆ ԱՎԵՏԻՍՅԱՆԻ հետ

-Պաշտպանության նախարարությունը մի քանի տարի է, որ ակտիվորեն համագործակցում է տարբեր գերատեսչությունների, ինչպես նաև, Հայոց Առաքելական Սուրբ եկեղեցու հետ, համատեղ իրականացվում են ռազմահայրենասիրական դաստիարակությանն ուղղված տարբեր ծրագրեր: Օրերս շրջանառության մեջ դրվեց ևս մեկը՝ ՙՙԴպրոցներում  ռազմահայրենասիրական դաստիարակության ռազմավարության՚՚ նոր նախագիծը: Ինչո՞ւ ի հայտ եկավ նման փաստաթղթի անհրաժեշտությունը, գուցե նոր մարտահրավերներո՞վ է  պայմանավորված:

-Ռազմահայրենասիրական դաստիրակությունը, հայ պատանու մեջ դեռևս դպրոցական տարիներից հայրենասիրական ոգու սերմանումը մի գործընթաց է, որը մշտապես եղել է մեր զինված ուժերի հրամանատարության ուշադրության կենտրոնում, ու կարելի է ասել, իրականցվել մեր բանակի կազմավորման ողջ ընթացքում:

Հայրենիքի հանդեպ մեծ սիրուց ծնվում է նաև հայրենիքն ամեն գնով պաշտպանելու  գիտակցումը: Իսկ դա մարդու մեջ ներարկվում է նաև դաստիարակությամբ: Հայտնի խոսք կա, ինչպես չես կարող ընտրել մորդ, այդպես էլ հայրենիքը չի տրվում ընտրությամբ, այն  տրվում է ի վերուստ: Կարող ես ապրել այլ երկրներում,  բայց ինչպե՞ս կարող ես մոռանալ քո ազգային պատկանելությունը, քո արժեքները: Իսկ մեր ազգային, հոգևոր արժեքներին առավել ամուր կառչած մնալու, դրանք պաշտպանելու ու եկող սերուդներին ժառանգելու համար մեզ հայրենասիրական դաստիրակություն է հարկավոր:

Արցախյան ազատամարտի սկսվելուն պես ձևավորվեցին կամավորական ջոկատներ, որոնց շարքերում ընդգրկված տղաներն իսկակայն հայրենասերներ էին: Հայրենիքի հանդեպ սրբազան պարտքի գիտակցմամբ մեր տղաները գնացին պաշտպանելու Արցախը: Այսօր ևս, առավել քան, այդ գիտակցումը հարկավոր է մեզ, քանի որ մեզ գրագետ, հոգեպես ու ֆիզիկապես կոփված, ազգային արժեքները գնահատող  ու պաշտպան սերունդ է հարկավոր:

Դրա համար մեր բանակում  կարևոր տեղ ունի ռազմահայրենասիրական դաստիարակությունը:  Այդ գործընթացը բանակում, այո, նոր չի սկսվել, վաղուց է իրականցվում, բայց անընդհատ կատարելագործվում է: Եվ  արդյունքները տեսանելի են: ՊՆ-ն բազմաթիվ համատեղ ծրագրեր է մշակել ու իրականացրել Կրթության և գիտության, մշակույթի, սփյուռքի նախարարությունների հետ, նաև ոստիկանության հետ: Լուրջ աշխատանքներ ենք կատարում  դպրոցներում ռազմահայրենասիրական դաստիարակության մակարդակն էլ ավելի բարձրացնելու ուղղությամբ: Հայրենասիրությունը սկսվում է դպրոցից, ուզում ենք հենց դպրոցում պատրաստել  հայրենասեր, գրագետ զինվոր, իսկ բանակում՝ նրանց կատարելագործել:

Այնպես որ, բանակ-դպրոց կապը միշտ եղել է ՊՆ ուշադրության կենտրոնում:
Ինչո՞ւ այսօր ևս առաջացավ նման փաստաթղթի ստեղծման անհրաժեշտություն:  Դա ես համարում եմ ժամանակի ծնունդ: Դուք ձեր հարցում ճիշտ նշեցիք, որ այս նախագիծը պայմանավորված է Հայաստանի առջև ծառացած ժամանակակից մարտահրավերներով: Կա  նոր մոտեցման, նոր ընթացակարգերի, նոր  գործիքակազմերի ներդրման անհրաժեշտություն: Մենք պարտավոր ենք ձևավորել ժամանակակից մարտահրավերներին դիմակայող՝ հայրենիքի պաշտպանությանը ֆիզիկապես և հոգեպես պատրաստ քաղաքացի: Ու այդ աշխատանքը պետք է կատարենք պետական, համայնքային և հասարակական կառույցների ներդաշնակ համագործակցությամբ:
-Պարոն գեներալ, իսկ որո՞նք են այն ներքին ու արտաքին մարտահրավերները, որոնք նշվում են հիշյալ փաստաթղթում:

– Որպես արտաքին մարտահրավեր՝ նշվում են պատերազմները, շրջափակումը, աշխարհում և հարևան երկրներում մոլեգնող ահաբեկչությունները, հարևան որոշ պետությունների ծավալապաշտական նկրտումները և այլն։  Իսկ ներքին մարտահրավեր ենք համարում  հայրենիքի պաշտպանությանը ոչ պատրաստակամ քաղաքացիների առկայությունը, զինվորական ծառայության և զինվորականի մասնագիտության հանդեպ գոյություն ունեցող անտարբերությունը, օտար մշակութային արժեքներին հաղորդակից լինելու միտումը, անկարագապահությունը,  դպրոցահասակ երեխաների մոտ փողոցային արատավոր վարքագծի դրսևորումների աճը: Ներքին մարտահրավեր է արտագաղթը, տնտեսության դանդաղ զարգացումը, նաև թմրամոլությունը,  սեռական այլասերվածությունը։ Այս մարտահրավերներին դիմակայելու համար անհրաժեշտ է, որ  դպրոցներում, բուհ-ում առավել խորությամբ ու նոր մեթոդներով իրականացվի ռազմահայրենասիրական դաստիարակություն:

Ադրբեջանում դեռ մանկապարտեզից քարոզում են հակահայկականություն՝ Հայաստանն ու հայ ժողովրդին ներկայացնելով թշնամի: Մինչդեռ մեզ մոտ ադրբեջանցուն թշնամի ասելը ռասիզմ է համարվում: Ավելին, կան հասարակական կառույցներ, որոնք առաջարկում են  դպրոցական ծրագրերից հեռացնել մեր գրողների հայրենասիրությամբ տոգորված գործերը՝ դրանք որակելով ՙՙռասիստական քարոզ՚՚: Այս  մթնոլորտը չի՞ նպաստում հայ երիտասարդների զգոնության թուլացմանը, տպավորությունն այնպիսին է, թե մեզանում, կարծես, չկա այն գիտակցումը, որ երկիրը կանգնած է լրջագույն մարտահրավերների առաջ:  

-Իհարկե, խիստ վտանգավոր եմ համարում որոշ հասարակական կառույցների կողմից իրականացվող  նման քարոզչությունը: Բայց  ես վստահ եմ, որ նրանց քարոզներն իրականում չեն անդրադառնում մեր երիտասադների մտածողության  վրա:  Համոզված եմ, որ ունենք զգոն, հայրենասեր, երկրին նվիրված երիտասարդներ: Ու դա երևաց 2016-ի ապրիլյան քառօրյայի օրերին: Ապրիլյան գործողությունները մեկ անգամ ևս ապացուցեցին, որ անկախության սերունդն, իրոք, արժանի է իր քաջազուն հայրերին ու ավագ եղբայրներին:  Իսկ մինչ այդ մեզանում կար  թյուր կարծիքը, թե մեր երիտասարդները զգոն չեն, անտարբեր են հայրենիքի հանդեպ: Անգամ նախկին ազատամարտիկներս  էին  ՙՙթեթև աչքով՚՚  նայում մեր երիտասարդներին, մտածում էինք, ի՞նչ կարող են անել նրանք, թերագնահատում էինք: Այդ մտավախությունը պայմանավորված էր որոշակի բացասական  երևույթներով, այդ թվում անտարբերությամբ: Բայց ապրիլյան դեպքերի ժամանակ համոզվեցինք, որ երբ հայրենիքը վտանգի տակ է, հայ երիտասարդը պատրաստ է հանուն իր երկրի, իր ծնողների ու ընտանիքի կանգնել ոտքի: Նախկին ազատամարտիկներն էլ  համոզվեցինք, որ մեր երիտասարդ սերունդն իր մարտական պատրաստակամությամբ ավելին է,  քան իրենք են եղել, որովհետև մեր երիտասարդներն այսօր հրաշալիորեն տիրապետում են նորագույն տեխնիկային:

Ապրիլյան գործողությունների ժամանակ ապշել էինք մեր ժամկետային զինվորների  գրագետ գործողություններից,  նրանք 10-15 հոգով կարողացան մարտնչել  հարյուրից ավելի թշնամու դեմ, մինչև վերջին փամփուշտը կրակեցին  չհանձնվեցին: Սա առհավատչյան է այն բանի, որ ունենք հայրենասեր երիտասարդություն:

Կարծում եմ, մեզանում միտումնավոր են շրջանառվում խոսակցությունները, թե մեր երիտասարդները  հայրենասեր չեն, դա չար լեզուների՝ գրանատակեր կառույցների կողմից տարածվող կեղծ լուրեր են, ինչն  արվում է  հատուկ նպատակով՝ հուսահատություն սերմանելու, մեր զգոնությունը թուլացնելու համար:

Ադրբեջանը մինչ ապրիլյան գործողությունները  վերլուծություն էր կատարել,  ուր ասվում էր, թե  Հայաստանը աղքատ է, հայ ժողովուրդը սովահար է, սոցիալական սարսափելի ծանր վիճակում է գտնվում, և անկարող է իր հայրենիքը  պաշտպանել, ուրեմն, ժամանակն է օգտվել առիթից և հարձակվել: Բայց մեր պաշտպանությունից, մեր երիտասարդ զինվորների պատրաստվածությունից, գրագետ հայրենասեր գործողություններից ադրբեջանցիներն անակնկալի եկան, հասկացան, որ չարաչար սխալվել էին իրենց հաշվարկներում:

 -Ափսոս, որ  շատ քիչ ենք խոսում մեր բանակի, երկրի  հաջողություններից, հաղթանակներից, փոխարենը, առատորեն քարոզվում է ապազգայինը: Այդ վտանգավոր քարոզներից մեկն էլ Պաշտպանության նախարարության ռազմահայրենասիրական դաստիրակության  նախագծի դեմ սկսված քննադատական արշավն է. ծաղրում են փաստաթուղթը, նույնիսկ համարում  Ստալինյան ժամանակերները  հիշեցնոց մի բան: փորձում են այլասերե՞լ մեր հասարակությունը, հեռացնե՞լ մեր արժեքներից. ի՞նչ կասեք այս մտահոգիչ երևույթի մասին:

-Այո ճիշտ նկատեցիք, նպատակը մեր հասարակությանն այալասերելն է: Այսօր մենք ինչպիսի հայրենանվեր փաստաթուղթ էլ մշակենք, միևնույն է, գտնվելու են  քննադատողներ: Մենք դրանում համոզվել ենք տարիների փորձով. բոլոր հիմնարար փաստաթղթերը, որոնք վերաբերել են մեր արժեհամակարգին,  մշտապես քննադատվել են, անգամ փորձ է արվել ծաղել դրանք:

Հիշեք, թե ինչ մեծ աղմուկ բարձրացրին ազգային անվտանգության ռազմավարության հայեցակարգի ընդունումից հետո: Ցավոք, մեզ մեջ կա այդ վատ երևույթը: Ինքս կողմ եմ առողջ քննադատության, որովհետև այն օգնում է, որ գրվեն արդյունավետ օրենքներ: Բայց այստեղ ակնհայտ է անառողջ քննադատության միտումը:  Բոլոր  հկ-ների մասին, իհարկե, չեմ կարող ասել, սակայն կան ապակառուցողական գործունեություն իրականացնող կառույցներ: Իրենք դրա համար սնվում են դրսից ու իրականացնում իրենց տրված պատվերը: Անշուշտ, դրանք վտանգավոր են իրենց  գործունեությամբ: Կան կառույցներ,  որոնք զոր ու գիշեր զբաղված են զինված ուժերի քննադատությամբ: Նույնիսկ փնտրում են, որ գտնեն հույժ գաղտնի տեղեկատվություն,  որի հրապարակումն անթույլատրելի է ու խիստ վտանգավոր, բայց իրենք փորձում են գտնել ու հասցնել  հակառակորդի ականջին: Դրանով իրենք ուզում են դրսին ցույց տալ, տեսեք, ի՜նչ մեծ գործ ենք անում, ձեր  պատվերը լավ ենք կատարում, ուրեմն ավելի շատ պետք է մեզ վարձատրեք:

Նման իրավիճակում միակ գործիքը մեր ազգային գաղափարախոսության ուժեղացումն է, որի շուրջ համախմբված է մեր  պետական և հոգևոր համակարգը: Դրա համար որքան էլ նման հկ-ները կամ անձինք փորձեն իրենց ապակառուցողական գործունեությունը ծավալել՝ հաջողության չեն հասնելու:

-Ի միջայլոց, այս ծրագիրը ՊՆ-ն պատրաստվում է իրականացնել մեր եկեղեցու հետ համատեղ: Որքանո՞վ եք կարևորում եկեղեցու դերն այս գործում, ծրագրի իրականցման նախաշեմին եկեղեցին թիրախավորելը, քննադատելը  միտումնավոր չի՞ արվում: 

Անշուշտ,  միտումնավոր  քայլեր են, դա համարում եմ  ոտնձգություն մեր հոգևոր արժեքների դեմ: 301թվականից առ այսօր տարբեր աղանդներ, ուժեր փորձում են չարախոսել մեր եկեղեցու հասցեին, բայց անկարող են սասանել մեր հավատը: Նման գրոհների դեմ մեր պայքարը մեկն է՝ ավելի մոտենալ մեր եկեղեցուն ու ամրանալ մեր հավատի մեջ:

Բանակ-եկեղեցի  20-ամյա ամուր կապի  ձեռքբերումները շատ են: Զինուժում հոգևոր ծառայությունը գտնվում է բարձր մակարդակի վրա: Ես վստահաբար կարող եմ ասել, որ շնորհիվ մեր հոգևոր  հայրերի կատարած մեծ աշխատանքի, ինքնասպանությունների թիվը բանակում պակասել է: Նրանց ներկայությունը նպաստում է միջանձնային հարաբերություններում ստեղծված  բարդ իրավիճակների, տարաձայնությունների  հարթեցմանը,  խաղաղեցնում է կողմերին:    Այս ծրագիրը ևս պետք է իրականացվի ՊՆ- եկեղեցի համագործակցությամբ ու նպատակը շատ հստակ է՝ ամուր պահենք մեր ազգային,  հոգևոր արժեքները, սիրենք մեր հայրենիքը, պատրաստ լինենք նրա պաշտպանությանը:  Նրանք, ովքեր դեմ են այս ծրագրին, նրանք մեր երկրի, մեղմ ասած, բարեկամները չեն:  Ծրագիրն իր դրական պտուղները տալում է, ու անգամ պատվիրված չարախոսները  կտեսնեն, որ  սխալվել են, գուցե այդ մասին չբարձարաձայնեն, բայց ներքուստ դրանում հաստատ կհամոզվեն:

Հարցազրույցը վարեց՝ ԱՐՄԻՆԵ ՍԻՄՈՆՅԱՆԸ

 

 

 

Տպելու տարբերակ Տպելու տարբերակ

Դիտել TOP, Զինված ուժեր, Լրահոս, Հասարակություն, Հարցազրույցներ բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն