Գլխավոր » TOP, Լրահոս, Հարցազրույցներ, Քաղաքականություն

Որևէ ուժ ՙՙԵլքին՚՚ չի կարող մղել փողոց

Մարտ 7, 2018թ. 18:53
Մանե Թանդիլյան

Հարցազրույց ԱԺ ՙՙԵլք՚՚ խմբակցության պատգամավոր ՄԱՆԵ ԹԱՆԴԻԼՅԱՆԻ հետ
ՙՙԵլք՚՚ դաշինքը ստեղծման պահից  հայտարարեց, թե գալիս է որպես նոր որակի ընդդիմություն, քննադատեցիք որոշ ընդդիմադիրների քայլերը, թե պատեքանպատեհ առիթի ժողովրդին փողոց են դուրս բերում, ու նաև դրանով պատճառ դարձան ընդդիմության հանդեպ ժողովրդի անվստահության ձևավորման: Սակայն այսօր ՙՙՙԵլքը՚՚, լինելով խորհրդարանական ուժ, փորձում է գնալ այդ նույն՝ փողոցային ճանապարհով: Հեռանում ե՞ք ձեր որդեգրած ուղուց:

-Նախ ասեմ, որ տարբեր քաղաքական ընդդիմադիր ուժեր ունեցել են տարբեր գործելաոճ և, այո, հաճախ այդ գործելաոճը հանգեցրել է հիասթափության ու մնացել անարդյունք:  Բայց մենք, որպես նոր քաղաքական ուժ,  ամենևին չենք հեռանում մեր ուղուց: Ինձ համար որպես ընդդիմադիր գործիչի և՜ Ազգային ժողովում ծավալվող պայքարը, և՜ փողոցային պայքարը գործիքներ են, որոնց օգտակարությունը ես չափում եմ ըստ դրանց արդյունավետության և վերջնական նպատակին հասնելու հնարավորության: Եվ չեմ ուզում պայքարի այդ երկու գործիքները մեկմեկու հակադրել, դա տեղին չէ:

Գների թանկացման ժամանակ մենք դուրս եկանք փողոց, որովհետև մտածեցինք    մարդկանց մասնակցությամբ ճնշում գործադրել իշխանության վրա, ստիպել գնալ փոփոխության: Բայց տեսանք, որ մարդկանց մասնակցությունն այնքան չէր, որ իշխանությունը ենթարկվեր ճնշման: Բայց մենք ունեցել ենք հակառակն ապացուցող օրինակ. ՙԴեմ եմ՚–ի շարժման ժամանակ հենց քաղաքացիների մասնակցության շնորհիվ օրենքում կատարվեց փոփոխություն: Այսինքն, փողոցը ես դիտում եմ որպես գործիքակազմ, որը պետք է օգտագործել ու հասնել հաջողության, եթե, իհարկե, կա հաջողության հասնել հավանականություն: Հետևաբար, այդ գործիքակազմերը՝ Ազգային ժողովը, փողոցը, ակցիաները չպետք է հակադրության մեջ դիտարկել, այլ համադրության, դրանք բոլորն էլ ընդունելի, ընկալելի գործիքակազմեր են:

Իհարկե, եղել են դեպքեր, երբ ընդդիմադիրները քաղաքացիներին կոչերով տարել են փողոց և դա որևէ արդյունք չի գրանցել, հակառակը հանգեցրել է   հիասթափության: Հենց սա է պատճառը, որ փողոցին հաճախակի դիմելը ես համարում եմ ոչ արդյունավետ քայլ, քանի որ հիասթափությունը հետագայում կարող է ավելի վատ անդրադառնալ գործընթացների վրա: Այս հարցն է, որ այժմ ՙԵլքում՚ քննարկման առարկա է դարձել:

-Կան արտախորհրդարանական ուժեր, որոնք իրենց անհաջողությունների, ամբիցիաների պատճառով դուրս են մղվել քաղաքական բեմահարթակից, ու նրանց միակ գործիքը մնացել է փողոցը, և որպեսզի իրենց անունը մոռացության չմատնվի, ժամանակ առ ժամանակ փողոց դուրս գալու հայտ են ներկայացնում: Այդպիսի ուժե՞րն են, որ ՙՙԵլքին՚՚ մղում հրապարակ՝ կանգնեցնելով երկընտրանքի առաջ, թե փողոցում չեք, ուրեմն, ընդդիմություն չեք: Եվ սպասվող հանրահավաքներին ՙՙԵլքը՚՚ կմիասնակցի՞: 

-Այս հարցը դեռ չի քննարկվել ՙՙԵլքում՚՚, դեռ չունենք որոշում փողոցային պայքարի ծավալման հարցում: Իսկ ընդհանրապես որևէ ուժ ՙԵլքին՚ չի կարող մղել ինչ-որ տեղ, որովհետև ՙԵլքն՚ իր որոշումները ինքնուրույն է կայացնում, ու չի գտնվում  որևէ ուժի ազդեցության ներքո: Դա հաջողվում է ՙԵլքին՚, որովհետև դաշինքում ներգրավված երեք քաղաքական ուժերի մեջ կայանում է առողջ, արդյունավետ աշխատանքային  բանավեճ: Ձեզ հետ համաձայն եմ, որ կան ուժեր, որոնք միայն փողոցային պայքարով են փորձել հասնել հաջողության ու չեն հաջողել: Իսկ ՙԵլքը՚ գտնում է, որ միայն փողոցը չէ փոփոխությունների ճանապարհը, դրանք տարբեր ուղիներ են, բայց լավագույնը այդ ուղիների համադրությունն է:

Որևէ ուժ մեզ չի կարող կանգնեցնել այլընտրանքի առաջ ասելով, եթե փողոցում չեք՝ ընդդիմություն չեք, և ընդդիմադիր երևալու ցանկությունը չէ, որ պետք  է մեզ տանի դեպի փողոց: ՙԵլքը՚ խնդիր չունի ապացուցելու իր ընդդիմադիր լինելը: Կարծում եմ, մեր այն քաղաքացիները, որոնք ձայն են տվել և հույս են կապել դաշինքի հետ, իրենք են ընտրել հենց ընտրության գնալու ճանապարհը, իսկ դա այն է, ինչ անում է ՙԵլքը՚ Ազգային ժողովում: Եթե հարկ լինի, մենք կդիմենք նաև փողոցին՝ նպատակով, որ առավել արդյունավետ դարձնենք մեր պայքարը: Ինձ որևէ ուժի շանտաժը չի անհանգստացնում, քանի որ ես հավատարիմ եմ իմ սկզբուներին ու նպատակներին, և նպատակ չունեմ ապացուցելու իմ ընդդիմադիր լինելը: Կարծում եմ, որ մեր քաղաքացիներն այնքան խելամիտ են, որ քաղաքական ուժերին, գործիչներին կգնահատեն իրենց գործողություններով ու կենսագրությամբ: Իսկ մեր նպատակը Հայաստանում փոփոխություն բերելն է, ու դա կարող ենք անել և՜ Ազգային ժողովի, և՜ փողոցի միջոցով, և՜ մեր վերահսկողական լծակները  իրացնելով, կրկնում եմ, սրանք տարբեր գործիքակազմեր են:

-Չնայած նրան, որ  ՙԵլքում՚ չկա փողոց դուրս գալու մասին միասնական որոշում, բայց առաջ ընկնելով Նիկոլ Փաշինյանն ՙՙԱզատության՚՚ հրապարակում հանդիպեց մարդկանց հետո և հայտարարեց՝ պետք է ժողովուրդը դուրս գա փողոց և հաստատի, որ դեմ է Սերժ Սարգսյանի վարչապետությանը: Այս քայլով Փաշինյանն իրեն չտարանջատե՞ց ՙՙԵլքից՚՚՝  ցույց տալով, որ ինքն է դաշինքում միակ իրական ընդդիմադիր գործիչը: Եվ արդյո՞ք նման կեցվածքը չի  վնասում դաշինքի միասնականությանը:

-Համաձայն չեմ, քանի որ իրականում Նիկոլ Փաշինյանի հանդիպումը մարդկանց հետո եղել է քաղաքացիների առաջարկը և նա որպես պատգամավոր՝ կիսելով մարդկանց անհանգստությունը գնացել է այդ առաջարկին ընդառաջ: Իսկ ինչո՞ւ  չհանդիպել նաև Ազատության հրապարակում, սա ևս պատգամավորական գործունեության ձևաչափերից մեկն է: Չեմ կարծում, որ որևէ ընդդիմադիր  գործիչ կամ պատգամավոր սահամանափակված  է,  կաշկանդված է նման ձևաչափով հանդիպել  մարդկանց հետ և հարց քննարկել: Նիկոլ Փաշինյանն ունի իր տեսակետը, որ հնարավոր է նաև փողոցային պայքարով գնալ փոփոխությունների,   և   քաղաքացիներին ասել է, եթե նրանք դուրս գան փողոց ու ապահովեն այն  կրիտիկական զանգվածը, որը կբերի հաջողության, ապա այդ հարթակը պետք է օգտագործել: Սա իր կարծիքն է ու ինքն ազատ է այն արտահայտելու: Բայց որքանո՞վ   մեր քաղաքացիները պատրաստ են այդ քայլին, որքանո՞վ այդ ճանապարհը կլինի արդյունավետ, սա էլ մեկ այլ հարց է ու հիմա Ելք դաշինքում հենց այս հարցն է քննարկման առարկան: Սակայն այս պահին հանրահավաքի ճանապարհով գնալու վերջնական որոշում չկա: Իսկ ՙԵլքի՚ միասնությանը վտանգ չի սպառնում: Ինչպիսի որոշում էլ մենք կայացնենք, դա լինելու է միայն ի շահ Հայաստանի Հանրապետության քաղաքացու: Կկայացնենք որոշում, որից ՙԵլքը՚ դուրս կգա ավելի ուժեղ, ամուր և ՀՀ շահերը պաշտպանող ընդդիմադիր խմբակցություն:

– Սովորաբար, դաշինքները երկարակյաց չեն լինում, գուցե նաև սա նկատի ունենալով ժամանակին հայտարարեցիք, թե ՙՙԵլքը՚՚  մեկ կուսակցություն կդառնա:  Սակայն այսօր հաշվի առնելով ՙՙԵլքում՚՚ ծավալվող խմորումները, նաև երեք կուսակցությունների ակնհայտ տարբերությունը, դա ձեզ կհաջողվի, թե՞ ՙՙԵլքին՚՚ բաժին կընկնի  կարապի, խեցգետնի ու շնաձկան առակի հերոսների տխուր ճակատագիրը:

-ՙՙԵլքը՚՚ բաղկացած է երեք կուսակցություններից, որոնք ստորագրել են հուշագիր ու եկել համաձայնության այդ փաստաթղթի շուրջ: Սա դաշինք է հանուն նպատակի ու այդ նպատակները չեն փոխվել, մենք հետևողականորեն գնում ենք դրանց իրականացման ճանապարհով: Այսօր շատերն անհամբեր սպասում են, թե ե՞րբ կփլուզվի ՙԵլք՚ դաշինքը: Դա չի լինելու: Մենք ամեն ինչ անելու ենք մեր դաշինքի ուժեղացման համար, քանի որ գտնում ենք, որ սա, մեր քաղաքացիների ձայնը տեղ հասցնելու, կարևորագույն գործիք է: ԵՎ ԱԺ-ում ՙԵլք՚ խմբակցությունն իր առաքելությունը կարողանում է կատարել:

Գալով մեկ կուսակցության գաղափարին, ապա  ասեմ, որ նախկինից նման փորձ ունենք հանձին ՀԱԿ-ի,  երբ դաշինքը փլուզվեց ու ստեղծվեց մեկ կուսակցություն:  Բայց այսօր ՙԵլքը՚ ուժեղ դաշինքի շատ լավ օրինակ է: Երբ ստեղծում էինք ՙԵլք՚ դաշինքը գիտեինք, որ երեք տարբեր կուսակցություններ են, տարբեր մոտեցումներով: Մեր ներսում լինում են ակտիվ  քննարկումներ, դրանք նոր բան չեն, միշտ եղել են, մեր աշխատանքի ընթացքում ինքներս տեսնում ենք, որ տարաձայնություններ ունենք մարտավարական քայլերի շուրջ: Շատերն են զարմանում, որովհետև մեր քաղաքական  մշակույթում  նման բան չկար, որ քաղաքական ուժը ինքն իր ներսում այդպես ակտիվ բանավիճի ու հետո գտնի արդար լուծումներ: Սա այն մշակույթն է, որն իր հետ բերեց ՙԵլքը՚: Բայց բանավեճերի հետ մեկտեղ մեր ներքին մթնոլորտը շատ աշխատանքային է, իսկ մեր բոլորի նպատակը նույնն է, գտնում ենք, որ այսպես բանավիճելով ու ընդհանուր հայտարարի գալով կստանանք արդյունավետ աշխատանք:

Մենք չենք անի այնպիսի քայլեր, որոնք կհանգեցնեն կամ արհեստական միավորման, կամ փլուզում: Թե մեկը, թե մյուսը ՙԵլքին՚ չի սպառնում, քանի որ այս դաշինքը արհեստականորեն ստեղծված  միավոր չէ: Թե ի՞նչ է եղել նախկինում, կներեք, ինձ չի հետաքրքրում այնքանով որքանով ես նոր քաղաքական գործիչ եմ, ու գալիս եմ այլ մշակույթով, իսկ դա այն է, որ խորքային բանավեճերի արդյունքում ծնվում են լավագույն լուծումները: Սա է իսկական ժողովրդավարությունը:

Իսկ ձեր հիշատակած առակի հերոսների տխուր ճակատագիրը մեզ, վստահաբար, բաժին չի ընկնի, նման մտահոգություն պետք չէ ունենալ: Ավելին, ես վստահ եմ, որ այդպես մտածողները որոշ ժամանակ անց հաճելիորեն կզարմանան, թե որքան ուժեղ է ՙԵլքը՚:

-Որպես ընդդիմություն ՙՙԵլքը՚՚ խորհրդարանում ունի լուրջ լծակներ, կարող եք լսումներ կազմակերպել ձեր ընտրած թեմաների շուրջ ու ձեր ձայնը բարձրացնել, կարող ենք խորհրդանին օրակարգը թելադրել, իսկ վերջինս երկրի թիվ մեկ քաղաքական հարթակն է, ամենակարճ ճանապարհը իշխանության որոշումների վրա ներազդելու: Ձեզ չի՞ բավարարում այս կարևոր հարթակը, որ միաժամանակ մղվում եք դեպի փողոց, ու դա արդյո՞ք ավելի շատ պոպուլիզմի դրսևորում չէ: 

-Համաձայն չեմ, մենք չենք ասում, որ ԱԺ-ն մեզ չի բավարարարում ու դրա համար ենք փողոց դուրս գալիս: Նման բան չկա: Չնայած մենք ունենք  դժվարություններ, ռեսուսի խնդիր կա: Բայց ՙԵլքն՚ անում է ամեն ինչ, որ ԱԺ ամբիոնը լավագույնս օգտագործի:  Մեծ անելիք ունենք մեր աշխատանքն էլ ավելի արդյունավետ դարձնելու: Իսկ փողոցը, ըստ իս, պոպուլիզմի տեղ չէ, ինչպես արդեն ասացի, փողոցը լրացուցիչ ճնշման հնարավոություն է իշխանության վրա՝ իհարկե, օրինական ճանապարհով: Ու այդ գործիք պետք է խելամիտ ձևով օգտագործել, որպեսզի ժողովրդին չտանենք հուսահատության, հիասթափության, ինչպես եղել է  նախկինում: Արձանագրեմ նաև, որ ամեն մի փողոցային պայքարից պետք չէ ակնկալել արագ արդյունքներ: Բայց  փողոցի ճնշմամբ կարող են հարցեր լուծվել Ազգային ժողովում: Ու սա պետք չէ բացառել:

Այնպես որ խելամիտ ընդդիմադիր ուժը ԱԺ-ն ու փողոցը պետք է մեկմեկու հետ համադրի ու տեղին օգտագործի:

ԱՐՄԻՆԵ ՍԻՄՈՆՅԱՆ

 

Տպելու տարբերակ Տպելու տարբերակ

Դիտել TOP, Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն