Գլխավոր » Լրահոս, Հասարակություն, Հարցազրույցներ

ՙՙԵրկիր ծիրանին՚՚ գործ չուներ անելու ու գնաց այս կեղտաջրոտ քայլին, որ ՙՙծիրանը՚՚ չչորանա

Փետրվար 15, 2018թ. 19:53
երկիր ծիրանի

Հարցազրույց փաստաբան ՍԵՅՐԱՆ ԳՐԻԳՈՐՅԱՆԻ հետ

-Պարոն Գրիգորյան, որպես փաստաբան,  ինչպե՞ս եք գնահատում երեկ քաղաքապետարանում՝ ավագանու նիստի ժամանակ ՙՙԵրկիր ծիրանի՚՚ խմբակցության անդամների քայլը, երբ  կոյուղաջուրը շփեցին սրահով մեկ: Դա  ակցիա՞ էր, թե՞ սանձարձակ քայլ:

-Դա գործողություն էր, որով փորձ արվեց խաթարել Երևանի քաղաքապետարանի ավագանու բնականոն աշխատանքը, նրա կարգն ու կանոնը:

Իմ օրինակը բերեմ, որպես  փաստաբան ես կարող եմ շատ վրդովված լինել դատարանի գործողություններից, բայց ինչպե՞ս կարող եմ ինձ իրավունք  վերապահել անել այնպիսի գործողություններ, որոնք դուրս են իմ իրավասություններից: Մինչդեռ ԵԾ ավագանու անդամները գնացին նման քայլի: Կարծում եմ պատկան մարմինները կտան կատարվածի  գնահատականը:

Եթե ուզում էին ակցիա անել, կարող էին դա քաղաքակիրթ ձևով անել, եթե ուզում էին ինչ-որ հարց բարձրացնել  և լուծել, դրա համար այլ ճանապարհներ կային: Վերջապես, ոչ ոք չի ասում,  կոյուղու անմխիթար վիճակի  մեղավորը   քաղաքապետն է՞,  այդ խնդիրը  լուծողը քաղաքապետարանն է՞, գուցե ջրմո՞ւղն է: Ուրեմն, նախ պետք է հասկանալ, ո՞ւմ իրավասության սահմաններում է գտնվում հարցի լուծումը և ո՞վ չի կատարել  իր աշխատանքը: Երևան քաղաքի տարածքում կատարված ոչ ցանկալի երևույթների ու ապօրինությունների համար միայն քաղաքապետարանն է՞ պատասխանատու, իհարկե՝ ոչ: Ջրմող կա, թող նրանց ուշադրությունը գրվեին հարցի վրա:

Տեղյակ եմ, որ դրանից առաջ Նուբարաշենի բնակիչներն էին կոյուղու հետ կապված բողոքել, և  մարդիկ դա արեցին քաղաքակիրթ ձևով, ոչ թե կեղտաջուր տարածելով:

-Ի դեպ,  ՙՙԵլքի՚՚ ավագանու անդամները տեղեկացրեցին, որ Նուբարաշենի բնակիչների ու 14 հոգանոց բազմազավակ  ընտանիքի բնակության պայմանները բարելավելու ուղղությամբ իրենք  շատ ավելի օգտակար գործ են արել, քան ԵԾ աղմկող կանայք՝ կեղտաջուր տարածելով: Փաստորեն, նրանց խնդիրն ամենևին էլ նուբարաշենցիների հարցը լուծելը չէ:  

-Իհարկե: Իրականում ի՞նչ խնդիր լուծեցին ՙՙԵրկիր Ծիրանի՚՚ խմբակցության անդամները, ոչ մի, բացի շոուից:  ՙՙԵլքն՚՚  իր առաջ խնդիր դրեց ու փորձեց այն իրականում լուծել, բայց ոչ թե  ցեխ շպրտել:  Ցանկացած ոք կարող էր նման վատ քայլ անել, բայց թույլ տալու հարց է, ինչպե՞ս կարելի է գնալ նման արարքի:  Ինքս ժամանակին քաղաքական գործունեությամբ եմ զբաղվել ու երբեք ինձ թույլ չեմ տվել անել քայլեր, որով կարող եմ վիրավորել, առավել ևս վտանգել քաղաքական  մյուս  թիմի ներկայացուցիչներին: Այնպես որ, անգամ քաղաքական առումով սա անընդունելի քայլ էր:

-Ի վերջո կա նաև անվտանգության խնդիր. ավագանու մյուս խմբակցությունների անդամներն  ասում են, որ ապահով չեն զգում  իրենց ավագանու նիստերի ժամանակ, քանի որ վախ ունեն, որ ԵԾ կանայք կարող են հանկարծ ինչ-որ  վտանգավոր գործողություններ անել:  

-Անվտանգության խնդիրն անշուշտ կա: Քրեական օրենսդրությունը նախատեսում է որոշակի գործողություններ, ընդհուպ այն աստիճան, որ եթե վտանգ կա մարդու կյանքին ու առողջությանը, ապա մարդը նույնիսկ կարող է մահ  պատճառել դիմացինին: Օրենքը նման դեպքերում ազատում է մարդուն պատասխանատվությունից: Սա իհակե, ծայրահեղ  օրինակ է,  բայց օրենքը սահմանում է:  Սա փաստում է այն մասին, որ մարդն իրավունք ունի պաշտպանվելու ընդհուպ մինչև դիմացինին վտանգ հասցնելը: Ես չեմ ուզում ընկնենք ծայրահեղության մեջ , բայց նաև կասկածել կարող ենք, որ այդ հեղուկի մեջ  վտանգավոր, նաև մահացու նյութեր լինեին:

 -Եվ այդ  կասկածելի  զանգվածը, ինչպես խոստովանեց Մարինե Խաչատրյանը, ինքը պատրաստվում էր տալ  Տարոն Մարգարյանին՝ հոտ քաշելու համար:

-Իսկ գուցե ուզում էր լցնել քաղաքապետի վրա՞,  կամ էլ ավագանու որևէ անդամի՞ վրա: Ո՞վ կարող է սա բացառել, ոչ ոք: Եվ  դրա արդյունքում մարդկանց կյանքին կարող էր լուրջ վտանգ լիներ, կամ այրվածք ստանային, այս մասին մտածե՞լ են:

-Տիկնոջ սանձարձակ պահվածքը քննադատելու փոխարենը,  ոմանք սևեռվել են հետևանքի վրա,  թե ինչո՞ւ ՀՀԿ ավագանու անդամ  տղամարդիկ ԵԾ անդամ Մարինա Խաչատրյանի վրա ձեռք բարձրացրին:

-Նման գնահատկանները պայմանավորված են ներքին մղումով. մարդ կա, որն ուղղակի  չի ուզում օբյեկտիվորեն գնահատել կատարվածը, չի ուզում որովհետև  իրեն այդպես է պետք: Իսկ ես չեմ կարող  արդարացնել տիկնոջ քայլը, եթե նրա քայլերի արդյունքում զոհ լիներ, ի՞նչ էին անելու, նորից էի՞ն արդարացնելու: Չի կարելի:

-Ֆեմինիստներն աղաղակում են, թե այդ խառնաշփոթի ժամանակ ԵԾ կանանց հանդեպ բռնություն է գործադրվել, ընդ որում ՝ սեռական բռնություն:

-Նախ, մարդիկ իրենց վրա կատարված հարձակումը (ԵԾ կանանց կողմից կատարված)  գնահատել են որպես իրենց կյանքի,  առողջության համար վտանգավոր քայլ և պաշտպանվել են: Քրեական օրենսգիրքն ասում է՝ կարող ես համարժեք պաշտպանական գործողություններ անել: Իսկ օրենքը սեռերին չի տարբերակում: Հիմա ի՞նչ անեին տղամարդիկ,  ասեին, քանի որ կին եք մենք ձեզ ձեռք չենք տալիս, այդ հեղուկը տարեք , շփեք ում վրա ուզում ե՞ք:  Եթե կին է վատ քայլեր անողը, ուրեմն ամեն ինչ նրան կարելի է՞: Ի վերջո, կա օրենսդրություն: Ես մի պահ տեսա որ ԵԾ անդամ Մարինա Խաչատրյանն ապտակեց  տղամարդկանցից մեկին,  հետո էլ վերջինս պատասխան ապտակ տվեց: Հարց եմ տալիս, ի՞նչ աներ, այդ տղամարդն էլ իրավունքներ ունի՝ իրեն ապտակում են, ինքն էլ պատասխանում է:

-Մարինա Խաչատրյանի պնդմամբ, ինքն ապտակել է, որովհետև խառնաշփոթի ժամանակ իրեն  ՙՙ ձեռք են գցել՚՚:

– Բայց ես նման պատկեր չտեսա: Կներեք էլի, էդ լարված պահին, այդ տղամարդը հենց այնպես եկավ ու ձեռք գցե՞ց, հո հոգեկան հիվանդ չէ՞: Դա էլ է վիրավորական: Չի կարելի շահարկել, ասել, եթե կին եմ, ուրեմն  ամեն ինչ կարող եմ անել: Տեսնում ենք, որ տարբեր երկրներում ինչպես են ոստիկանները կանանց մազերից քաշելով հեռացնում, որովհետև հանրային վայրերում  մերկ մարմիներով ակցիաներ են անում, կամ մտնում են եկեղեցի ու նորից նման ցինիկ պահվածք դրսևորում: Ի՞նչ անեն ոստիկանները, ասեն կին եք՝ ամեն ինչ արե՞ք: Ներող կլինեք, բայց դա ոչ մի սահմանի մեջ չի տեղավորվում:

– Ի պաշտպանություն ԵԾ կանանց, քաղաքապետարանի մոտ նույն պահին ակցիա անող  ֆեմինիստները, իրենց հերթի  քննադատում են  ոստիկաններին, որ իրենց հեռացրին քաղաքապետարանից: Ոստիկանների քայլերում օրենքի խախտում կա՞ր:

– Ոչ,  ի՞նչ անեին մեր ոստիկանները, դուրս չբերեի՞ն այդ աղջիկներին: Օրենքում կա  ներխուժում հասկացություն, երբ մարդիկ ապօրինաբար ներխուժում են որևէ փակ տարածք: Այդ իրավիճակում  ոստիկանները նրանց պետք է ասեին, շատ ենք խնդրում դուրս եկե՞ք: Իհարկե,  վստահ եմ, որ սկզբում այդպես էլ ասել են, բայց ցուցարարները  դուրս չեն եկել: Դրանից հետո ի՞նչ անեին: Ոստիկանը  կատարում է  իր աշխատանքը, իսկ ոմանք ասում են  սխալ են արել: Եթե այդ պահին մեկի գլխին քարով խփեին ու տուժողներ լինեին, այդ ժամանակ հաստատ կասեին՝ ո՞ւր էին ոստիկանները, չէ՞:

-Ի դեպ  ֆեմինիստները պատրաստվում են բողոքով  դիմել ՄԱԿ, թե Հայաստանում բռնություն է կիրառվել կանանց հանդեպ:  

-ՙՙԵրկիր Ծիրանին՚՚ իր գործողություններն արեց հենց այս հաշվարկով: Քաղաքական դաշտում բան չկար անելու, մնացել էին պարապ,  կարող էին մարդկանց  կողմից մոռացվել, կարող էր ՙՙծիրանը՚՚ չորանար: Եվ գնացին նման քայլի:

Բայց ՄԱԿ-ին դիմելը ես համարում եմ շատ վատ քայլ,  դա արդեն մեր երկրի դեմ է ուղղված: Բայց չէ՞ որ սա մեր բոլորի երկիրն է ու չի կարելի ցեխոտել, կեղտոտել, վարկաբեկել, հեղինակազրկել մեր պետությունը:

 Մ. Սահակյան

 

 

Տպելու տարբերակ Տպելու տարբերակ

Դիտել Լրահոս, Հասարակություն, Հարցազրույցներ բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն