Գլխավոր » TOP, Ադրբեջան, Թուրքիա, Լրահոս, Հասարակություն, Հարցազրույցներ, Տարածաշրջան, Քաղաքականություն

Որոշ ՀԿ-ներ վտանգ են ներկայացնում ազգային անվտանգության տեսանկյունից

Օգոստոս 2, 2017թ. 13:14
Ծովինար Կոստանյան

Հարցազրույց «Ժողովրդի ձայն» հկ փորձագետ ԾՈՎԻՆԱՐ ԿՈՍՏԱՆՅԱՆԻ հետ
Օրերս ձեր կազմակերպությունը հանդես եկավ մի պատասխանատու հայտարարությամբ, թե մեզանում կան որոշ հկ-ներ, որոնք դրսի կառույցներից ստանալով դրամաշնորհներ իրականացնում են Հայաստանի ազգային շահը վտանգող գործողություններ: Նման հայտարարություն հնչեցնելու համար պետք է, որ հիմնավոր փաստեր ունենանք:
– Իհարկե, և մենք այդ ուղղությամբ մի շարք ուսումնասիրություններ ենք կատարել: Վերջին տարիներին Հայաստանում նկատվում է հասարակական կազմակերպությունների ակտիվացում ու դա ողջունելի է, բայց սրա հետ մեկտեղ կան նաև մտահոգություններ: Մասնավորաբար, քաղաքացիական հասարակությունը չի կարող զարգացման առողջ ընթացք ունենալ, եթե այդ զարգացումը ֆինանսավորվում է օտարերկրյա աղբյուրներից, այդ դեպքում տեղական հկ-ները դառնում են օտար երկրների շահերի սպասարկուներ, պաշտպանում են ոչ թե մեր երկրի, այլ իրենց ֆինանսավորող երկրների շահերը, ծառայում են ոչ այնքան հօգուտ Հայաստանի Հանրապետության, որքան այն հիմնադրամների, որտեղից դրամաշնորհներ են ստանում։ Մենք սրանում համոզվել ենք ուսումնասիրելով տարբեր կազմակերպությունների գործունեությունը, պարզել ենք, թե որտեղի՞ց են գալիս նրանց ստացած դրամաշնորհների ակունքները, և այդ փողերը ինչի՞ համար են ուղղվել նրանց: Նման հկ-ների շարքում են «Փինք Արմենիա»-ն, «Նոր սերունդ»-ը, Կանանց ռեսուրսային կենտրոնը, Հելսինկյան քաղաքացիական ասամբլեայի Վանաձորի գրասենյակը:
-Այս հկ-ները ձեզ կարող են հակադարձել, թե ՀՀ կառավարություն էլ է միջազգային տարբեր կառույցներից դրամաշնորհներ ստանում, հետո՞ ինչ:
-Այո, մեր պետությունն էլ է ստանում, ու մենք չենք ասում, թե դրամաշնորհ ստանալը վտանգավոր է, ամեևին, խնդիրն այն է, թե ի՞նչ գործունեություն ծավալելու համար է ստացվում այս կամ այն դրամաշնորհը: Տեսեք, երբ մեր կառավարությունը ինչ-որ դրամաշնորհ է վերցնում՝ հստակ իրազեկում է, թե դրանով ի՞նչ ծրագիր է պատրաստվում կատարել, հետո էլ տեղեկացնում, թե մեր երկրի համար ի՞նչ դրական արդյունք այն ունեցավ: Մինչդեռ այլ իրավիճակ է հասարակական սեկտորում. շատ դեպքերում հկ-ները թափանցիկ չեն գործում, օտարերկրյա հիմնադրամների կողմից տրված գումարներն, արդյոք, համաչա՞փ են այն գործունեությանը, որ ծավալում են տվյալ հկ-ը: Մենք նաև նկատում ենք, որ իրականում ֆինասավորող կողմի շահեր են առաջ մղվում: Տարօրինակ չէ՞, որ հասակական կազմակերպությունը ստանում է դրամաշնորհ, որպեսզի երկրում ծավալի քաղաքական ենթատեքստ կամ բնույթ ունեցող գործունեություն, օրինակ, փաստեր կան, որ հասարակական կազմակերպությունը քաղաքական ակցիարներ, միտինգներ է կազմակերպել: Ստացվում է, որ օտարերկրյա կազմակերպությունները մեր հասարակական սեկտորին կամաց- կամաց մղում են դեպի քաղաքական դաշտ ու քաղաքականացնում նրանց գործունեությունը, մի բան, ինչը հակասում է ՀՀ օրենսդրությանը:
Մենք բավական լուրջ ուսումնասիրություն ենք կատարել հետևյալ թեմայով՝ «Քաղհասարակության ինստիտուտների միջոցով արդյոք հնարվո՞ր է Հայաստանում պետական հեղաշրջում իրականացնել», ու պարզել՝ այն կառույցները, որոնք ժամանակին ֆինանսավորել են Վրաստանի, Ուկրաինայի մի շարք հկ-ների, որոնք դարձան այդ երկրներում գունավոր հեղափոխությունների առաջամարտիկներ, այսօր ակտիվորեն ֆինանսավորում են վերը թվարկածս հկ-ներին:
Հայտարարել եք, թե դիվանագիտական կառույցներից մեկը դրամաշնորհով աջակցել է տեղական հկ-ներից մեկին այլասերվածության քարոզ իրականացնելու համար: Ո՞ր երկրի դեսպանատան մասին է խոսքը, ի՞նչ փաստ ունեք, և առհասարակ, միջազգային ի՞նչ կառույցներ են այդչափ եռանդով ֆինանսավորում տեղական հկ-ներին:
-Կոնկրետ որևէ պետության դեսպանատանն ուղղված չէ մեր խոսքը, այլ այն բոլոր դիվանագիտական ներկայացուցչություններին, որոնք մեզանում ֆինանսավորում են տեղական հկ-ների կամ անհատների: Նորություն չէ, որ ցանկացած օտարերկրյա դեսպանատուն, եթե ֆինանսավորում է այս կա այն հկ-ի, ապա սեփական շահն է հետապնդում՝ այդ մարդկանց կամ կառույցրին որպես գործիք օգտագործելով: Դա այլ բան չէ, քան քո երկրի ներքին գործերին խառնվել, ինչն արվում է մարդու իրավունքերի պաշտպանության, ժողովրդավարությունը զարգացնելու անվան տակ:
Ի դեպ, մենք ունենք նաև կոնկրետ փաստ. հիշում եք, որ <<Ոսկե Ծիրան>> կինոփառատոնի ժամանակ ինչպիսի աղմուկ բարձրացրեց <<Փինք Արմենիա>> կազմակերպությունը, երբ լգբտ-ների մասին քարոզող ֆիլմերը չցուցադրվեցին: Մենք պարզեցինք, որ այլասերման քարոզչություն իրականացնող այդ ֆիլմերի պատվիրատուն ու ֆինասավորողը Հայաստանում ԱՄՆ դեսպանատունն է: Մենք արդարացի հարց ենք հնչեցնում՝ արդյոք ԱՄՆ դեսպանատան քայլը տեղավորվում է՞ դիվանագիտական էթիկայի մեջ:
Նաև նշեմ, որ տեղական հկ-ները ֆինանսավորվում են հիմնականում արևմտյան երկու հիմնադրամներից՝ NED`Ժողովրդավարության սատարման ազգային հիմնադրամին, և EED ՝ ժողովրդավարության եվրոպական հիմնադրամի կողմից: Մեկը եվրոպական է, մյուսը՝ ամերիկյան:
-Ի դեպ, խորը ուսումնասիրություն պետք չէ կատարել համոզվելու համար, որ այս հկ-ներ գործում են նույն ձեռագրով, նրանց թիրախները նույնն են, քարոզվող գաղափարները ևս. բոլորը լգբտ-ների, աղանդների ջերմ պաշտպաններ են, բոլորը մերժում են հայկական ազգային ավանդույթները ու ծաղրում, սրանք հայկական ընտանիքի մոդելի թշնամին են: Իսկ այս ամենը չի կարող պատահականություն լինել: Հաճախ կենտրոնանում ենք արևմտյան հիմնադրամներից կամ դեսպանատներից եկող ֆինանսների վրա, բայց չե՞ք կարծում, որ կարող ենք գործ ունենալ նաև շատ ավելի վտանգավոր պատվիրատուի հետ՝ հանձին Ադրբեջանի և Թուրքիայի:
-Ձեր հարցադրումը տեղին է, ինքներս էլ չենք բացառում, որ նման կազմակերպությունները, որոնք արհամարհում են մեր ազգայինը, կարող են ֆինանսավորվեն հենց այնպիսի երկրների կողմից, որոնք հսկայական գումարներ են ծախսում հակահայկական քարոզչություն իրականացնելու, հայոց պատմությունն ու մշակույթը յուրացնելու համար:  Չենք բացառում, որ արևմտյան ինչ-որ  հիմնադրամ կարող է գրանցված լինել, ասենք՝ Գերմանիայում, բայց այն լինի ոչ թե գերմանական, այլ թուրքական կամ ադրբեջանական ինչ-որ ֆոնդ: Հետևաբար, այստեղ կա ազգային անվտանգության խնդիր:

Պատվերը հստակ է, այդ հկ-ները կոնկրետ ուղղությամբ են շարժվում, կազմակերպված քարոզչությամբ նրանք մեծ պայքար են մղում մեր ազգային արժեքների դեմ, հաճախ ոչ թե ուղղակի մերժում են, այլ բացահատ ծաղրում:  Վերջերս դանիացի գիտնականները պարզել են, որ Արցախի ու Հայաստանի հայ կանանց գենը դարեր շարունակ չի փոխվել, նույն է մնացել,  ինչպիսին եղել է 4000 տարի առաջ: Մեր գենի ամրությամբ ու հարատևությամբ հպարտանալու փոխարեն այդ հկ-ների ներկայացուցիչները ֆեյսբուքում մեծ աղմուկ բարձրացրին, թե 4000 տարվա մեջ հայի գենը չի զարգացել, ուրեմն՝  հետամնաց ենք:

Խոսում են բազամակարծությունից ու հսկայական գումարներ ստանում բազմակարծությունն ապահովելու համար, բայց , արի ու տես, որ իրենք ամենաանհանդուրժողն են, առողջ բանավիճելու մշակույթ չունեն, հարգանք չունեն դիմացինի կարծիքի հանդեպ: Ինչպե՞ս կարելի է նման կազմակերպություններին լուրջ վերաբերվել: Իսկ ո՞վ ասաց, որ մարդու իրավունքները չեն կարող մեր ազգային արժեքների հետ համադրվել, ինչո՞ւ պետք է մարդու իրավունքների պաշտպանություն ասելով հասկանանք հրաժարում մեր արժեքներից, մեր տեսակից, մեր դիմագծից:
Առաջարկում եք Արդարադատության նախարարությանը կից խորհուրդ ստեղծել, իսկ աշնանը պատրաստվում եք օրինագիծ ներկայացնել Ազգային ժողով. մի փոքր ավելի մանրամասնեք ձեր քայլերի մասին:
-Այո, առաջարկում ենք Արդարադատության նախարարությանը կից խորհուրդ ստեղծել ու նրանում նաև ներգրավել հասարակական կազմակերպությունների ներկայացուցիչներին ու նրանց հետ քննարկել իրենց իսկ կատարվելիք աշխատանները, ծրագրերը: ՀԿ-ները խորհրդին կներակայացնեն ֆինանսական ու գաղափարական հաշվետվություն, խորհուրդը կուսումնասիրի նրանց գործունեությունը, դրամաշնորհի ստացման նպատակը, և դրանից հետո  միայն կարվեն փոխանցումները և դաշտը ավելի կարգավորված կլինի։ Մեր նպատակն է, որ հկ-ների աշխատանքը դառնա թափանցիկ և օտարերկրյա դրամաշնորհները վերահսկվեն։ Այն հկ-ները, որոնք թաքցնելու բան չունեն պետք է, որ ողջունեն մեր առաջարկը:
Ինչ վերաբերում է օրինագծին, դրանով առաջարկելու ենք վերանայել այն հ/կ-ների գործունեությունը, որոնք չեն համապատասխանում հասարակական կազմակերպությունների ձևաչափին: Ի դեպ, հեծանիվ չենք հայտնաբերելու, այստեղ կա միջազգային փորձ. ԱՄՆ որոշ նահանգներում, Ռուսաստանում գործում է նման օրենք, որով հկ-ներին թույլ չի տրվում դրսից ֆինանսավորվել: Իհարկե, մենք չենք առաջարկում արգելել օտարերկրյա դրամաշնորհներ ստացող կազմակերպությունների գործունեությունը Հայաստանում, այլ պարզապես առաջարկում ենք թափանցիկ դարձնել նրանց աշխատանքը: Սա ազգային անվտանգությանն առնչվող խնդիր է ու ես համոզված եմ, որ այն կարժանանա մեր պետականամետ, ազգային արժեքներն ամեն ինչից վեր դասող պատգամավորների հավանությանը:
ԱՐՄԻՆԵ ՍԻՄՈՆՅԱՆ

Տպելու տարբերակ Տպելու տարբերակ

Դիտել TOP, Ադրբեջան, Թուրքիա, Լրահոս, Հասարակություն, Հարցազրույցներ, Տարածաշրջան, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն