Գլխավոր » Politics, Լրահոս, Հարցազրույցներ, Քաղաքականություն

Ինչո՞ւ է Զարուհին սևեռվել ՙՙԵլք՚՚-ի վրա

Հուլիս 31, 2017թ. 22:45
ալեն սիմոնյան

Հարցազրույց Երևանի ավագանու ՙԵլք՚ խմբակցության անդամ ԱԼԵՆ ՍԻՄՈՆՅԱՆԻ հետ
-ՙՙԵրկիր Ծիրանի՚՚ կուսակցության նախագահ Զարուհի Փոստանջյանի կռիվը, պարզվում է, միայն իշխանության դեմ չէ, այլև ընդդիմության: Չի դադարում հեռահար հարձակումները ՙՙԵլք՚՚-ի դեմ, ինչո՞ւ է այդչափ սևեռվել ձեզ վրա:
-Այդ անձնավորության մասին մենք ոչ ուզում ենք խոսել, ոչ ուզում ենք քննարկել նրա քայլերը, մենք նրան լուրջ չենք վերաբերվում: Մեր մոտ միակ խոսակցությունը, որ վերաբերում է նրան սա է՝ ինչի՞ ենք արձագանքում, դա մեզ պետք է՞:
ՙՙԵլք՚՚-ն իր գործն է անում, իսկ եթե գործը թողած զբաղվենք այս կամ այն քաղաքական գործիչի հայտարարությունները հակադարձելով, ու մեր գործողությունները պայմանավորենք որևէ մեկի տրամաբանական կամ անտրամաբանական խոսքերով, ապա առաջ չենք գնա: Մենք մեր աշխատանքն ենք անում ու դրանով օգտակար լինում մեր հանրությանը, այն մարդկանց, ովքեր քվեարկեցին հօգուտ ՙՙԵլք՚՚-ի: Եվ այսօր ես կարող եմ տասնյակ գործեր նշել, որ չնայած արձակուրդային շրջանին իրականացնում է Երևանի ավագանին՝ շատ մարդկանց օգուտ տալով: Փոխարենը որևէ մեկը չի կարող բերել գեթ մեկ օրինակ, թե մարդկանց օգտակար ի՞նչ գործ է անում ձեր նշած մարդ-կուսակցությունը:
Իսկ ժողովուրդն ամեն մեկին տալիս է արժանի գնահատական: Եթե դիտեք այն տեսանյութերը, որտեղ ելույթ է ունենում տիկին Փոստանջյանը, ապա դրանց տակ կկարդաք տարբեր մարդկանց կարծիքները, որոնցից շատ հստակ երևում է, թե մեր ժողովուրդը ի՞նչ է մտածում, ու ի՞նչ վերաբերմունք ունի այդ անձնավորության հանդեպ:
-Բայց երբեմն շոուն ունենում է իր ազդեցությունը ժողովրդի վրա, օրինակ, քաղաքապետի կյանքը դժոխքի վերածելու համար Զարուհին պատրաստվում է աշնանը քաղաքապետարանի դեմ հանդես գալ դատական հայցերով: Դուք որպես ավագանու անդամ, ի՞նչ եք կարծում, արդարացի ե՞ն նրա բողոքները:
-Խնդիրն այստեղ այն է, թե ի՞նչ նպատակ է նա հետապնդում իր քայլերով: Եթե նպատակ կա առկա իրողության պարագայում որևէ դրական փոփոխության հասնել, ուրեմն, պետք է գնալ այդ ճանապարհով: Այսօր կա ձևավորված իշխանություն, ու կարևոր չէ, թե այդ իշխանությունը ո՞նց է ձևավորվել, քանի որ կա դե ֆակտո իրավիճակ, որում մենք ապրում ենք, ուրեմն, պետք է այս իրավիճակից ելք գտնենք: Կա երկու ճանապարհ, կամ դու սկսում ես բղավել, էմոցիաներ բաց թողնել, պատուհաններ կոտրել, գոռգոռալ, ինչ-որ մեկին վիրավորել, ու դրանից հետո չհասնել ոչնչի, մնալ նույն կետում, որտեղ եղել ես, կամ դու աշխատում ես, օգտակար գործ ես անում հանրության համար, ու միաժամանակ աշխատում ես քո վրա՝ գիտելիքներ ես ձեռք բերում և պատրաստվում հերթական մարտին՝ ընտրություններին: Այսինքն՝ դու պատրաստվում ես իշխանություն ստանձնել: Մենք այս գործելաոճի կողմնակիցն ենք: ԱԺ վերջին ընտրությունները ցույց տվեցին, երբ ասում ես՝ ռեժիմը խուճապի մեջ է ու հավատում, որ ինչ-որ մեկը, ինչ-որ տեղ նստած վախենում է քո ելույթներից, երբ դու կարծում ես, թե դրանով նրան անհանգստացրիր ու ապրում ես դրանով, ապա երբեք ոչնչի չես հասնի: Կարծում եմ, այդ կերպ մտածող քաղաքական գործիչներն այլևս վերացող տեսակ են, որովհետև իրենք նոր աշխարհը չեն կարողանում հասկանալ: Այդ մեթոդը փորձարկվեց վերջին 15 տարում ու դա արեցին Զարուհի Փոստանջյանից շատ ավելի բանիմաց, փորձառու քաղաքական գործիչներ, սակայն որևէ արդյունք չունեցան: Այդ մեթոդն իրեն սպառել է: Հիմա թող Փոստանջյանը շարունակի մնալ իր նույն ոճի մեջ, չգիտեմ, միգուցե կան մարդիկ, որոնք արդարացնո՞ւմ են դա: Բայց ես, եթե ՙԵլք՚ դաշինքը չլիներ, ունենալով ընդդիմադիր հայացքներ, չէի քվեարկի ՙԵրկիր Ծիրանի՚-ի ու տիկին Փոստանջյանի օգտին:
-Այն դեպքում, երբ դուք ՙԵլք՚-ի ձեր մյուս գործընկերներից առանձնացաք նրանով, որ ամենից շատ էիք ուզում Փոստանջյանի հետ համագործակցել:
– Այո, ես շատ ջանքեր եմ գործադրել դրա համար: Ընտրություններից առաջ ինքս եմ հանդիպել ու համոզել նրան միանալ մեզ ու միավորված, ընդհանուր ուժերով մասնակցել ընտրություններին: Բայց հիմա ես շատ, շատ ուրախ եմ, որ այդ համագործակցությունը չստացվեց: Ամեն ինչ իր չափ ու սահմանն ունի:
-Ինչպիսի՞ քաղաքական ճակատագիր կարող է ունենալ մի ուժը, որը քաղաքական դաշտում չունին որևէ դաշնակից, և այդ մասին ինքն է բարձրաձայնում, մի ուժ, որը մերժում է ցանկացած համագործակցություն, վիրավորում է բոլորին՝ անգամ իր հետ ճանապարհ գնացածներին:
-Բնականաբար՝ հայտնվում է լուսանցքում: Երբ մենք Աժ ընտրություններին էինք մասնակցում, լինելով ընդդիմադիր, բավականին լուրջ հավաքական ուժ, միևնույն ժամանակ չէինք զլանում ինչ-որ հարցերի շուրջ այլ ուժերի հետ համագործակցելուց, օրինակ՝ ԲՀԿ-ի հետ, իհարկե, մնալով մեր սկզբունքներին հավատարիմ: Հիմա ևս չենք զլանում: Աստված մի արասցե, եթե վաղը պատերազմ սկսվի ես մյուսների հետ, անկախ նրանից այդ անձինք քաղաքական ո՞ր ուժի ներկայացուցիչ են՝ Հանրապետական, թե Դաշնակցական, ես պետք է գնամ մեր երկիրը պահելու: Ու այդ նույնը՝ երկիրը պահելու այդ կարևոր գիտակցումը, մի քիչ փոքր մասշտաբներով պետք է աշխատի նաև թիկունքում՝ Աժ-ում, Երևանի ավագանում: Դու չես կարող մեկուսանալ ու ասել՝ ես որևէ մեկի հետ չեմ համագործակցում, դու կարող ես ասել՝ ունեմ սկզբունքներ ու եթե դիմացինն այդ սկզբունքերի հետ համաձայն է՝ սկսել համագործակցել: Մեր հռչակագիրը բաց է, ասել ենք, որ կարող ենք համագործակցել ցանկացած հարցի շուրջ, ցանկացած ուժի հետ, որպեսզի երկրին օգտակար լինել: Ցավոք, տիկին Փոստանջյանը քաղաքական առումով, մեծ սխալներ է անում: Ես չեմ ուզում իմ այս հարցազրույցով թեման տաք պահել ու դրանով նրան ուժ հաղորդել, բայց կասեմ հետևյալը՝ Փոստանջյանը թող հիշի ու օրինակ վերցնի ՀԱԿ-ի պատմությունից: ՀԱԿ-ն իր հիմնադիր նախագահով, փորաձառու մարդկանցով կառույց էր, բավականին լուրջ, ծանրակշիռ, բայց ի՞նչ մնաց ՀԱԿ-ից՝ մի գազել մարդ և ոչ ավելին:
Տիկին Փոստանջյանը չի դադարում կրկնել, թե՝ ՙմեծ մարտեր են մեզ սպասվում՚, ՙմեր զորքը մեր ընդդիմադիր հանրությունն է, նրա վրա պետք է աշխատենք ինքնակազմակեպելու համար՚, թե ՙՊՊԾ ի գրավման իրադարձությունները կրկնվելու են նոր ապստամբության տեսքով՚: Սա ՙԺառանգության՚ հին ու մաշված ոճն է, փաստորեն, Փոստանջյանը չի կարողանում ձերբազատվել այդ ոճից:
– Նախ, այդ ապստամբական կոչերի մեջ չկա քաղաքական բաղադրիչ: Ինչո՞ւ մինչ այդ չէին աշխատում ընդդիմադիր հանրության վրա, ՙՍասնա ծռեր՚-ը մինչ այդ էլ կային՝ Նախախորհրդարանի կազմն էր, չէ՞, ինչո՞ւ չէին իրար հետ աշխատում, ի՞նչ էր պետք, որ միասին ապստամբություն անեին: Եվ հետո, ես ձեզ վստահեցնում եմ, եթե ՙՍասնա ծռեր՚-ի անդամներն այսօր դրսում լինեին ու Զարուհու հետ մեկ սենյակում գտնվեին, ապա այդ համագործակցությունը կտևեր ընդամենը 15 օր:
Ինչո՞ւ եք այդպես կարծում, չէ՞ որ երկուսն էլ ապստամբության՝ հարցերը զենքով լուծելու, համակարգը տապալելու կողմնակիցներ են:
-Նայեք Զարուհու անցած ճանապարհը, ՙԺառանգության՚ մեջ նրա ինտրիգները: Արմեն Մարտիրոսյանն ու Րաֆֆի Հովհաննիսյանն աչքիս լույսը չեն, բայց Զարուհին իր իսկ գործընկերների հետ լուրջ խնդիր ունեցավ, նրանց անվանեց հաճախորդներ: Հետո դուրս եկավ կուսակցությունից, մենք իրեն առաջարկեցինք համագործակցել մեզ հետ, մերժեց, հետո էլ սկսեց մեզ վիրավորել: Երևանի ավագանու ՙԵրկիր Ծիրանի՚ խմբակցության արդեն նախկին անդամներ Հայկ Պետրոսյանին և Մնացական Պարակշիևին անվանեց ՙոչնչություններ՚: Փոստանջյանի համար բոլորը ծախված են, էդ ո՞նց եղավ, դու ե՞ս միակ ճիշտը: Մարդ մի քիչ էլ ինքնաքննադատելու կարողություն պետք է ունենա:
Լավ, ո՞րն է տիկնոջ նպատակը. անում է քայլեր, որ մտածում ես՝ կամ մարդը ինչ-որ խնդիրներ ունի, կամ էլ արտաքին պատվեր կատարող է: Գուցե ԵԾ-ն Հայաստանում փորձում է ապստամբության քարոզչությո՞ւն ծավալել:
-Ես չեմ ուզում բնորոշումներ տալ: Շատ մեծ բաներ պետք չէ վերագրել ՙԵրկիր Ծիրանի՚-ին: Նաև պարզ է, որ ինչ-որ արտաքին ուժեր կուզենան այս իրավիճակից օգտվել: Ես գիտեմ, հասկացել եմ, ինչո՞ւ է անում, բայց թող մեր ժողովուրդը ինքը նրա քայլերից հետևության հանգի: Պարզապես շատ ուրախ եմ, որ մեր համագործակցությունը Զարուհու հետ չստացվեց:
Խժդժություն անելն էլ պետք է իմաստ, նպատակ ունենա: Լավ, ենթադրենք ինչ-որ անկայունացնող գործողություն արեցիք, բայց նպատակը պետք է հասկանալ: Եթե նպատակը Սերժ Սարգսյանի կամ որևէ չինովնիկի տրամադրությունը փչացնելն է, մենք դրանով չենք զբաղվում, մենք զբաղվում ենք մեր երկրում ինչ-որ բան փոխելով: Հետո՞ ինչ, գնացեք գոռգոռցեք, ժամանակին դա արեցիք՝ ի՞նչ փոխվեց, ոչինչ: Մենք հասկանում ենք, որ գոռգոռալով ոչինչ չի փոխվում:
Ինձ համար տարօրինակ է, որ մարդը իրավաբան լինելով անընդհատ մեջբերում է ժողովուրդների ապստամբության իրավունքից, բայց միևնույն ժամանակ մոռանում է, որ դա հենց ժողովրդի ապստամբության իրավունքն է ոչ թե 10, 20 կամ 5000 հոգու իրավունքը: Նման կոչերով աստամբություն չի լինում, իրական ապստամբության ժամանակ իրական լիդերներ են հատնվում: Ես իրեն հաջողություն եմ մաղթնում այդ ապստամբության մեջ, բայց ինձ համար զենքի ուժով իշխանափոխություն իրականացնելը շատ ավելի վատ, վտանգավոր քայլ է, քան յուրաքանչյուր գործող իշխանություն, որովհետև զենքով ապստամբության արդյունքում, ինչպես ցույց է տալիս պատմությունը, իշխանության են գալիս շատ ավելի վատերը, քան նախկիններն էին: Ի վերջո, ո՞վ ասաց, որ Զարուհի Փոստանջյանը, կամ ՙՍասնա Ծռեր՚-ը ժողովրդին են ներկայացնում:Դրա համար գոյություն ունի ընտրություն, պետք է ընտրությանը մասնակցես որպեսզի կարողանաս նաև արձանագրել, թե որքա՞ն քվե ունես, ժողովրդի քանի տոկոսի կողմից ես լիազորված: Ու եթե ստանում ես, օրինակ, 300 000 մարդու ձայն, ուրեմն իրավունք ունես այդ մարդկանց անունից բարձարացնելու: Բայց Զարուհի Փոստանջյանը երբեք ընտրություններին չի մասնակցել որպես կուսակցության ղեկավար, չնայած հայտարարում է՝ ընտրություններով ոչինչ փոխել չի լինի: Հարց եմ ուզում տալ, եթե չես մասնակցել ընտրություններին, ինչպե՞ս ես ասում, թե ոչինչ փոխել չի լինի:
ԱՐՄԻՆԵ ՍԻՄՈՆՅԱՆ

Տպելու տարբերակ Տպելու տարբերակ

Դիտել Politics, Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն