Գլխավոր » Տնտեսություն

Բոյկոտը շարունակելու դեպքում կգործենք ըստ օրենքի՝ կզրկենք մանդատից

Մայիս 11, 2017թ. 22:25
մամիկոն ասլանյան

Հարցազրույց Վանաձորի քաղաքապետ ՄԱՄԻԿՈՆ ԱՍԼԱՆՅԱՆԻ հետ
-Վանաձորի ավագանու ընտրություններից հետո <Լուսավոր Հայաստան>-ի, ԲՀԿ-ի ու ՀՎԿ-ի 19 անդամները շարունակում են բոյկոտը: Ավագանու նիստերին նրանց չմասնակցելը չի խոչընդոտո՞ւմ աշխատանքներին, չի ստեղծո՞ւմ ճգնաժամային իրավիճակ:
-Հունվարից սկսեց գործել ՏԻՄ նոր օրենքը, որի համաձայն մենք արդեն երկու իրավազոր նիստ ենք գումարել՝ մեկը մարտի 31-ին, մյուսը՝ ապրիլի 18-ին: Նիստերին կանոնավոր կերպով ներկայանում են ՀՀԿ և ՀՅԴ խմբակցությունների 15 անդամներն ու աշխատանքային ճգնաժամի մասին խոսք չի կարող լինել: Դեռ հոկտեմբերի 10-ից սկսած մեր աշխատանքերը բնականոն շարունակվում են, ճգնաժամ չկա ու ես թույլ չեմ տա, որ նման բան լինի: Այս ամիսներին քաղաքապետարանի բոլոր ծառայությունները սովորական աշխատանքային ռեժիմով աշխատել են, և մեր հնարավորությունների սահմաններում նաև կարողացել ենք լուծել քաղաքում առկա շատ խնդիրներ: Այժմ էլ մեծ թափով մեկնարկում ենք ճանապարհների կարգավորման՝ փոսերի լցման աշխատանքները, նաև կառավարության հրատապ ծրագրով հավանության արժանացրինք Վանաձորի երեք, չորս փողոցների հիմնանորոգման ու փոսալցման աշխատանքները: Շուտով կսկսվի քաղաքի մեծ՝ Հալաբյան կամուրջի վերանորոգումը, ինչպես նաև դպրոցներից մեկի տարածքով անցնող կամուրջի շինարարությունը: Այս ամենին զուգահեռ քաղաքում մեծ թափով իրականացվում ենք կանաչապատման աշխատանքներ: Այնպես որ, մենք աշխատում ենք մեր սովորական աշխատանքային ռեժիմով:
Իսկ ՙԼուսավոր Հայաստան՚-ի, ԲՀԿ-ի ու ՀՎԿ-ի անդամները վաղ, թե ուշ պետք է մասնակցեն ավագանու աշխատանքներին, որովհետև իրենց ընտրվելու իմաստը ոչ թե նիստերը բոյկոտելն է, այլ քաղաքի խնդիրների լուծմանը մասնակից դառնալը: Մանավանդ որ, օրենքը ավագանու անդամներին պարտավորեցնում է մասնակցել նիստերին:
-Բոյկոտը մինչև ե՞րբ կարող է շարունակվել. դուք որպես քաղաքապետ փորձո՞ւմ եք բոյկոտող խմբակցությունների անդամների հետ խոսել, համոզել, մարդիկ գուցեև գիտակցե՞ն, որ այսպես չի կարելի շարունակել:
-Ճիշտն ասած, նման փորձեր եղել են, իսկ այժմ այլևս ոչ մի քայլ չեմ անում այդ ուղղությամբ: Հիմա ես ավելի շատ զբաղված եմ քաղաքի խնդիրները լուծելով ոչ թե այս կամ այն անձանց հետ ինչ-որ բանակցությունների մեջ մտնելով: Եթե մարդիկ համառորեն շարունակեն չմասնակցել նիստերին, ապա օրենքը նաև որոշակի պատժամիջոցներ է նախատեսում, ու մենք կօգտվենք օրենքի ընձեռած հնարավորությունից և կորոշենք՝ ո՞ւմ զրկել կամ չզրկել մանդատից: Չի կարելի ժողովրդի քվեն քամուն տալ, չի կարելի ժողովրդի ձայները մսխել:
-Վանաձորի ավագանու անդամների թիվը 34-ն է, նրանցից 19-ը բոյկոտողներն են, իսկ մասնակիցների՝ ՀՀԿ և ՀՅԴ անդամների թիվը 15-ն է: Այսինքն՝ ավագանում չունեք մեծամասնություն, հետևաբար, ունե՞ք իրավունք նիստեր գումարելու, որոշումներ կայացնելու: Ի դեպ, ՙԼուսավոր Հայաստան՚-ը հենց այս առումով պնդում է, թե ավագանու նիստերը ոչ իրավազոր են ու ապօրինի:
-Նոր ՏԻՄ օրենքի 64 հոդվածը հստակ նշում է, թե ավագանու նիստերը ե՞րբ են համարվում իրավազոր, ի՞նչ կարգով ու ձայների ի՞նչ հարաբերակցությամբ են ընդունվում որոշումները: Օրենքի 64 հովածի 3-րդ կետի համաձայն ավագանու նիստն իրավազոր է, եթե նիստին ներկա են որոշում ընդունելու համար անհրաժեշտ թվով ավագանու անդամներ: 4-րդ կետն էլ արձանագրում է, որ ավագանու որոշումները, հայտարարությունները և ուղերձներն ընդունվում են նիստին ներկա ավագանու անդամների ձայների մեծամասնությամբ, բայց ոչ պակաս, քան ավագանու անդամների ընդհանուր թվի մեկ քառորդով: Այդ մեկ քառորդը կազմում է 8,2 ձայն, այսինքն, եթե 9 հոգի կողմ է որոշումների ընդունմանը՝ նիստն իրավազոր է: Այնպես որ մենք 9 հոգով էլ կարող ենք նիստ գումարել: Իսկ ՀՀԿ և ՀՅԴ խմբակցությունների անդամների թիվը 15 է, նոր օրենքի համաձայն սա բավարար թիվ է նիստ գումարելու, որոշումներ, հայտարություններ ընդունելու համար: Այնպես որ, մեր անցկացրած բոլոր նիստերն իրավազոր են: Ես գործում եմ օրենքի շրջանակներում:
-Տարօրինակ է այն, որ երկու կողմերդ տարբեր կերպ եք մեկնաբանում միևնույն օրենքը. ՙԼուսավոր Հայաստան՚-ը պնդում է՝ ըստ օրենքի ավագանու նիստը կհամարվի օրինական, եթե ավագանու 17 անդամները ներկա լինեն, ու քննադատում է ձեզ, որ 15 հոգով կարևոր որոշումներ եք կայացնում, տեղակալներ նշանակում: Դուք էլ հակադարձում եք՝ հղում անելով օրենքին, թե կարող եք 9 հոգով էլ որոշում կայացնել, նիստ գումարել: Այս թնջուկից դուրս գալու համար ԼՀ-ն պատրաստվում է դիմել ՍԴ:
-Ոչ մի թնջուկ էլ չկա: Մենք ամիսներ առաջ երկու նիստ էինք գումարել, որոնց օրակարգում տեղակալ նշանակելու հարցն էր, բայց այն չքվեարկվեց: Օրենքը մեկնաբանելու նպատակով ես դիմեցի Արդարադատության նախարարություն ու ստացա այսպիսի պարզաբանում. եթե հարցը երկու անգամ հավանության չի արժանանում, քաղաքապետը կարող է ինքը նշանակել առաջին տեղակալին: Այնպես որ ես նշանակումները կատարել եմ օրենքին համապատասխան:
ԼՀ-ն ուզում է ՍԴ դիմել իբև թե 16 և 64 հոդվածների միջև անհամաձայնությունները հարթելու համար: Դա իրենց աչքին տեսիլքի պես երևացող մի բան է, իրականում իրենք օրենքը սուբյեկտիվորեն են մեկնաբանում, ուզում են օրենքի այն հոդվածը կիրառել Վանաձորի վրա, որը մեր քաղաքի հետ կապ չունի: Բանն այն է, որ ՏԻՄ նոր օրենքը Վանաձորի ու Գյումրու նկատմամբ կիրառել է հատուկ կարգավորող նորմեր ու դրանց շրջանակում են ներառված նաև Վանաձորի ավագանու նիստերի իրավազորությանը վերաբերող հարցերը: Ինչ վերաբերում է իմ և ավագանու կայացրած որոշումները վիճարկելուն, դա չեն կարող անել, որովհետև այն ամբողջովին տեղավորվում է ՀՀ օրենսդրության շրջանակներում:
Ես ավագանու ընդդիմադիր անդամներին խորհուրդ կտամ քաղաքի հարցեին վերաբերվել ավելի լուրջ, եթե իրավական դաշտում իրենք խնդիրներ ունեին լուծելու, կարող էին դա անել 5, 6, 7 ամիս առաջ: Ֆեյսբուքում ստատուսներ գրելով կամ լրագրողներին հարցազրույցներ տալով քաղաքի խնդիրները չեն լուծվում:
Ինձ չի հետաքրքում, թե իրենք ո՞ւր են ուզում դիմել, ո՞ւմ են ուզում դիմել, որևէ մեկը իրենց քայլերը չի խոչընդոտում: Իսկ ես որևէ մտավախություն չունեմ, դա իմ ոճին հարիր չէ, ու պաշտոն ստանձնելուց հետո աշխատում եմ ՙհուզախառն՚ երևույթներին չտրվել:
-ՙԼուսավոր Հայաստան՚ խմբակցության անդամ Քրիստ Մարուքյանը ձեզ մեղադրում է ասելով, թե քաղաքապետ Ասլանյանն օգտվում է ընդդիմության բացակայությունից և իր աջակիցների հետ կարևորագույն հարցերի մասին որոշումներ ընդունում առանց լուրջ քննարկումների։Նաև պնդում է, թե քաղաքապետարանի աշխատակազմը ավելացրել եք՝ գործի տեղավորելով ձեր ծանոթ մարդկանց: Ի՞նչ կասեք այս մասին:
-Նախ Մարուքյանը դատախազ չէ, որ ինձ մեղադրի, նա ընդամենը կարող է իր կարծիքը ասել, ինչը կարող է համապատասխանել իրականությանը կամ ոչ: Ամեն կարծիք չէ, որ ինձ համար արժեք է ներկայացնում: Նման պնդումները ես մանկական խաղ կանվանեի, ի՞նչ է նշանակում օգտվում է ընդդիմության բացակայությունից, ընդդիմության առաջ մենք դռները փակել ե՞նք: Մեր դռները բաց են, մենք թաքուն նիստեր չենք գումարում ու, եթե իրենք ունեն առողջ մտքեր, խնդրեմ, թող գան ու ներկայացնեն իրենց առաջարկները, գուցե դրանք կընդունվեն: Մարուքյանը, երբ կգա ու կմասնակցի քաղաքապետարանի աշխատանքներին, մենք իրեն կտանք պարզաբանումներ, թե ի՞նչ ծրագրերի հետ կապված է, որ մի քանի հաստիք քաղաքապետարանում ավելացրել ենք: Իսկ ծրագրերի մասին առայժմ չեմ բարձրաձայնի, որովհետև ուզում ենք մի փոքր անակնկալ անել մեր բնակիչներին: Այ, եթե Մարուքյանը մասնակիցի նիստերին՝ կիմանա նաև սպասվող անակնկալների մասին:

Ֆեյսբուքներում հայտարարություն անելով քաղաք չեն ղեկավարում, ամեն շաբաթ կարելի է մի նոր բան մոգոնել, լրագրողներին ակտիվ թեմա տալ ու ֆեյսբուքում դիտումներ ապահովել: Չի կարելի քաղաքին առնչվող հարցերում հանդես գալ պոպուլիստական, դեմագոգիկ բնույթ կրող հայտարարություններով: Ժամանակն է, որ մարդիկ ֆեյսբուքային ընդդիմությունից վերածվեն քաղաքային ընդդիմության, գան ու աշխատեն ավագանիում: Իսկ այս գործելաոճին՝ մեկմեկու հասցեին հեռահար մեղադրանքներ հնչեցնելուն, ես դեմ եմ:

Ա. ՍԻՄՈՆՅԱՆ

Տպելու տարբերակ Տպելու տարբերակ

Դիտել Տնտեսություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն