Գլխավոր » Politics, Լրահոս, Հարցազրույցներ, Քաղաքականություն

Շատ ե՞ք ուզում խոշորանալ, գնացեք Սան Պաուլո, այնտեղ բոլորն աղաղակում են՝ օլե՛, օլե՛

Հունիս 5, 2017թ. 13:05
Ազատ արշակյան

-Հարցազրույց նախկին Գերագույն խորհրդի պատգամավոր, ՕՐՕ դաշինքի համակիր ԱԶԱՏ ԱՐՇԱԿՅԱՆԻ հետ
Թվում էր, թե արտախորհրդարանական քաղաքական կյանքը կանգ էր առել, բայց ահա ԱՄՆ-ից եկավ Րաֆֆի Հովհաննիսյանը փորձեց հետընտրական նիրհից հանել պարտված ուժերին ու նրանց կոչ արեց՝ եկեք խոշորանանք: Իսկ կարող է՞ խոշորացում լինել առանց գաղափարական ընդհանրության:
-Խնդիրը գլխիվայր է դրված, որովհետև կուսակցությունների խոշորացումը, նախ, չի կարող նպատակ լինել: Ի՞նչ է նշանակում խոշորացում, այսինքն՝ շատ լինե՞նք, դրա համար գնացեք մարզադաշտ, այնտեղ Ֆուտբոլի ժամանակ շատ են: Եթե Հայաստանում չեք ու այդքան շատ եք ուզում ձեզ խոշոր զգալ, ուրեմն, գնացեք Սան Պաուլոյի մարզասրահ, այն ամենամեծ մարզադաշտն է, այնտեղ բոլորը միասին աղաղակում են՝ օլե՛, օլե՛: Գնացեք այնտեղ, գնեք տոմս, ընդ որում՝ պրոլետարական տրիբունայում տոմսը բավականին էժան է, քիչ ծախս կանեք ու ձեզ լավ խոշորացած կզգաք, քանի որ բոլորն այնտեղ միասին աղաղակում են, բոլորը այնտեղ նույն թիմում են:
Խոսել քաղաքական ուժերի խոշորացման մասին, նշանակում է խնդիրը գլխիվայր շուռ տալ: Հին հայկական մի անեկդոտ կա. մեկն ընկերոջն ասում է՝ տեղափոխվենք այստեղից այնտեղ: Ընկերը հարցնում է՝ դրանից մեջն ի՞նչ ունես: Պատասխանում է՝ ինձ շարժումն է հետաքրքրում, շարժումը: Հիմա սա է: Ուրեմն, նախ նպատակ պետք է լինի. որևէ գաղափարի շուրջ միասնություն, որևէ նպատակի շուրջ համախմբում, սա պետք է լինի հիմքում, ինչն էլ պետք է արժանանա հասարակության հավանությանը, նրա կողմից համարվի կարևոր, օրակարգային: Իսկ աննպատակ խոշորացում չի լինում:
Դառնամ Րաֆֆի Հովհաննիսյանի ասածին. նրա՝ Ամերիկայում լինելն ու այնտեղից գալը հայտարարության հետ ոչ մի բովանդակային կապ չունի: Մեր ազդեցիկ սփյուռքահայերը հայտարարում են, որ իրենք չենք խառնվում Հայաստանի ներքին գործերին, օրինակ Շարլ Ազնավուրը, Սերժ Թանկյանը, մեզ պարզ ասում են՝ արեք այն, ինչ հարմար եք գտնում: Ուրեմն, Ամերիկայից գալն այստեղ կարևոր չէ, բայց Րաֆֆի Հովհաննիսյանի հայտարարությունը շատ կարևոր է: Դա կուսակցական ներքին ՙակցիայիա՚ է: Առաջիկայում ՙԺառանգություն՚-ը պետք է համագումար հրավիրի, իմի բերի, վերլուծի նախորդ համագումարից հետո իր ձեռքբերումներն ու կորուստները: Եվ դա բնական է, քանի որ ՙԺառանգություն՚-ը բավականին լուրջ կորուստներ է ունեցել, այդ թվում իմ՝ իրենց հետ եղած ընթացքում, և ես օրինակ գիտեմ, որ մեծ կորուստ եմ ունեցել, պարտություն եմ կրել՝ լինելով ՙԺառանգության՚ դաշնակիցը: Հետևաբար, այդ դառը պարտությունից հետո իրենք՝ հրավիրվելիք համագումարում, պետք է գնահատեն իրենց անցյալը: Եվ Րաֆֆի Հովհաննիսյանը, որպես այդ կուսակցության հիմնադիր, կատարեց զուտ ներկուսակցական քայլ՝ ուղղված իր կուսակիցներին: Դրանով նա նոր ՙկոմպանիա՚ սկսեց:
-Դա կարելի է համարել պարտություն կրած լիդերի վերջին ճիգն՝ սեփական կուսակցությունը փոշիացումից փրկելու համար:
-Գուցե փրկելու համար չէ, ամեն դեպքում դա իր քայլն է: Չէ՞ որ նա ներսում մրցակիցներ կունենա, ընտրություն է լինելու, բանավեճ է լինելու, քննադատություն է հնչելու, գուցեև գովեստ: Եվ Հովհաննիսյանը նման հայտարարությամբ պատրաստվում է այդ ամենին: Այնպես որ դա նախապատրաստական կուսակցական ՙակցիա՚ է:
-Բայց կուսակցությունների խոշորացման, ընդդիմադիր դաշտը՝ խորհրդարանական, թե արտախորհրդարանական, համախմբելու հարցը Հովհաննիսյանը քննարկել է ընտրություններում իր դաշնակիցների՝ պաշտպանության և արտաքին գործերի նախկին նախարարներ Սեյրան Օհանյանի և Վարդան Օսկանյանի հետ. կնշանակի այդ հայտարարությունը միայն Ժառանգական-ներին չէր ուղղված: Ի դեպ, ՕՐՕ երկու առաջնորդները ձեռնպահ մնացին ու ոչ մի հստակ բան չասացին:
-Րաֆֆի Հովհաննիսյանի այդ ՙակցիայի՚ իրական հասցեատերը, կրկնում եմ՝ ՙԺառանգություն՚ կուսակցությունն է: Ինչ վերաբերում է ՕՐՕ-ին, այն դեռևս լուծարված չէ, ինչ-որ իմաստով շարունակում է իր հետընտրական կյանքը, ՕՐՕ-ն դեռևս հետընտրական փուլում է ու բնական է, որ Րաֆֆին, որպես փորձառու քաղաքական գործիչ, պետք է խորհրդակցեր իր գործընկերների հետ: Ի դեպ, նրա գործընկերները ևս ունեն ճիշտ նույն խնդիրները: ՙՀամախմբում՚ կուսակցության ղեկավար Վարդան Օսկանյանը ևս կանգնած է նույն փաստի առաջ:
-Նկատի ունեք անորոշությա՞ն առաջ:
-Այո, իհակե, պետք է ինչ-որ բան անեն: Կարգավիճակի անկում, կորուստ է տեղի ունեցել և Հովհաննիսյանը, Օսկանյանն ու Օհանյանը լուրջ աշխատանք ունեն անելու: Նրանք նաև պետք հաշվետվություն տան, հաշվետվություն իրենց գործընկերների, աջակիցների, համակիրների առաջ: Դրա համար իրենք խորհելու լուրջ գործընթացների մեջ են ու պետք է խորհրդակցեն ՕՐՕ-ի շրջանակներում:
Ինչ-ինչ, բայց ես Հովհաննիսյանին համարում եմ դեմոկրատ գործիչ, դեմոկրատական ուժ է նաև նրա ՙԺառանգություն՚-ը, Վարդան Օսկանյանին ևս ես համարում եմ դեմոկրատ, երկուսն էլ ժամանակակից քաղաքական գործիչներ են: Բայց այս գործիչները հետընտրական շրջանից հետո դեռևս չեն ստացել իրենց կուսակցությունների մանդատը, հետևաբար նոր փուլ սկսելու մանդատը չունեն, քանի որ անցյալի գնահատականը դեռ չեն տվել, էջը դեռ չեն փակել: Նրանցից որևէ մեկը, եթե դրսի գործընկերներին որևէ նոր ծրագիր, գաղափար առաջարկի՝ նախ և առաջ պետք է սեփական կուսակիցների լիազորությունն ունենա, բայց չունեն: Մենք չգիտենք, թե ՙԺառանգություն՚-ն ի՞նչ եզրակացության կգա, ի՞նչ ծրագիր, գաղափարախոսություն կորդեգրի, որպեսզի նրան ասենք՝ այո կամ ոչ:
Կարևոր միտք ասացիք՝ հաշվետվություն կուսակցական շարքերի, այն մարդկանց առաջ, որոնք հավատացին, վստահեցին ու կանգնեցին իրենց կողքին: ՙԺառանգություն՚-ը թերևս դա կանի սպասվող համագումարում, մինչդեռ Վարդան Օսկանյանն ու Սեյրան Օհանյանը շարունակում են լռել:
-Նրանց ես համարել եմ շատ լուրջ գործիչներ, և համակրել ու աջակցել եմ նրանց, ու բնականաբար, նրանցից ակնկալում եմ, որ իմի բերեն նախորդ ձախողված շրջանը և հաշվետվությամբ ներկայանան իրենց կուսակցություններում ու խմբերում՝ առանձին-առանձին: Եվ ուրեմն, եթե այդ դեմոկրատական գործընթացի արդյունքում նրանք ստանան իրենց թիմակիցների վստահության մանդատը, ստանան ՕՐՕ դաշինքը շարունակելու համաձայնությունը, ուրեմն՝ այդ ձևաչափը կշարունակվի: Եթե ՕՐՕ-ի ծրագիրը գայթակղիչ լինի նաև ուրիշների համար, ապա կհայտարարվի նոր ՙզորահավաք՚, նոր շարժում:
Րաֆֆի Հովհաննիսյանը անկեղծորեն նկատեց, թե չի բացառում ավելին համագործակցության եզրեր է տեսնում ՙԲարգավաճ Հայաստան՚ կուսակցության հետ: ՕՐՕ-ում այս մոտեցումը կիսո՞ւմ են:
-Նա հայտարարում է ՙԺառանգության՚ համար, իսկ այդ հայտարարությունը ՕՐՕ-ի շրջանակներում՝ ժամանակավրեպ է: Բայց որպես ՙԺառանգության՚ լիդեր շատ ճիշտ ժամանակին է նա այդ մասին հնչեցնում, Րաֆֆին իր գործն է անում: Իսկ ես որպես ՕՐՕ-ի համակիր, իհարկե, չեմ հասկանում, թե ի՞նչ պետք է անել Հովհաննիսյանի հայտարարությունների համատեքստում, ես իմ անելիքը չեմ տեսնում: Եթե ՕՐՕ առաջնորդներն ինչ-որ որոշում կայացնեն ու դա ինձ համար լինի ընդունելի՝ կաջակցեմ, եթե ընդունելի չեղավ ես կհեռանամ իրենցից: Իսկ ԲՀԿ-ի հետ համագործակցելու համար նախ պետք է ծանոթ լինել այդ կուսակցության ծրագրերին, հասկանալ՝ ի՞նչ են ուզում: Ես նրանց ծրագրերը չեմ ուսումնասիրել:
– Սեյրան Օհանյանի կինը՝ Ռուզաննա Խաչատրյանը վերջերս ասել էր թե Օհանյանը դրական հարաբերություններ ունի բարձարստիճան պաշտոնյաների հետ, ու Հայաստան վերադառնալով հանդիպել է բոլորի հետ: Այս ակնարկը նշանակում է, որ Օհանյանը մերժում է կոշտ ընդդիմադիրի դիրքերից հանդես գալն ու նախընտրում կառուցողակա՞ն մոտեցումը:
– Ռուզաննա Խաչատրյանը ճշտորեն արձանագրել է փաստը: Սեյրան Օհանյանը երկար տարիներ աշխատել է Հայաստանի ու Արցախի ղեկավար պատասխանատու պաշտոններում: Իսկ ՊՆ նախկին նախարարը, հայկական բանակի գեներալ լեյտենանտը չի դառնում շարքային: Նա շատ թանկարժեք կադր է: Ու բնականաբար, նա նորմալ հարաբերություններ պետք է ունենա և ունի ՀՀ-ի ներկայիս գերագույն գլխավոր հրամանատարի հետ, իր նախկին տեղակալների հետ, որոնք այսօրվա ՊՆ բարձրաստիճան սպաներն են, ու իր մարտական ընկերները: Անկախ նրանից՝ ընդդիմություն է, թե իշխանություն Սեյրան Օհանյանը պատասխանատու մարդ է, նա չիջավ կենցաղային մակարդակի ու մնացել սպային վայել բարձր մակարդակի վրա: Եվ տիկին Ռուզաննան հենց այդ մասին է ասել, որ Սեյրան Օհանյանը պատասխանատու մարդ է: Ի դեպ, նա չի ակնարկել, այլ շատ պարզ ասել է, ես շատ հավանեցի նրա այդ հայտարարությունը ու ողջունում եմ այն:
Ինչ վերաբերում է Սեյրան Օհանյանի՝ կոշտ ընդդիմադիր, թե մեղմ դիրքերից հանդես գալուն, ապա նրա ամենասուր հայտարարությունն անգամ ենթադրել է պատասխանատվություն ու գործընկերություն: Օհանյանը երբեք չափը չի անցել ու չի եղել ծայրահեղական: Ես մասնակցել եմ նրա քարոզարշավին ու լսել նրա բոլոր ելույթները, դրանք զուտ քաղաքական էին, դրանք կառուցողական ծրագրեր էին: Ուրիշները կարող են այլ բաներ հնարել ու զրպարտել նրան, բայց իրականությունն այն է, որ Սեյրան Օհանյանը ՕՐՕ-ի շրջանակներում մշտապես հանդես է եկել կառուցողական ընդդիմության դիրքերից: Ես դրա վկա եմ:

Տպելու տարբերակ Տպելու տարբերակ

Դիտել Politics, Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն