Գլխավոր » Politics, Լրահոս, Հասարակություն, Հարցազրույցներ, Քաղաքականություն

Փոստանջյանի արածը պրովոկացիոն քայլ էր, ուզում էր հարամել ամբողջ ընտրական գործընթացը

Մայիս 17, 2017թ. 10:55
Խոսրով Հարությունյան

Հարցազրույց Քրիստոնեա-դեմոկրատական կուսակցության նախագահ, նորընտիր ԱԺ պատգամավոր Խոսրով Հարությունյանի հետ
-Երևանի ավագանու ընտրություններում ՀՀԿ-ի ստացած 71 տոկոս քվեն զարմացրել է ձեր ընդդիմախոսներին, ոմանց դիտարկմամբ, սա ֆինանսական ռեսուրսների, իշխանական լծակների աննախադեպ օգտագործման հետևանք էր:
-Այն, ինչ նշում են ոմանք, դա ցանկալին իբրև իրողություն ներկայացնելու փորձ է: Շատերի համար հասկանալի չէ այն պարզ թեզը, որ ի տարբերություն համապետական ընտրությունների ՏԻՄ ընտրությունն իրականում պահանջում է համայնքի ապագային միտված կոնկերտ ծրագրերի ներկայացում, ու այդ ծրագրերը իրականություն դարձնելու կարողություն: Համապետական ընտրությունների քարոզարշավի ժամանակ ընդդիմություն կարող է ամեն ինչից խոսել, բայց իրականում որևէ բան չասել, կարող է խստությամբ քննադատել իշխանություններին ու դրանով իսկ շահել քաղաքական դիվիդենտներ: Սա համապետական ընտրություններին բնորոշ մոտեցում է, ընդ որում՝ ոչ միայն Հայաստանում: Ի տարբերություն սրա ՏԻՄ ընտրություններում համայնքի բնակչությունը շատ կոնկրետ է վերաբերվում իր կյանքի պայմանների բարելավմանն ու վաղվա օրվան առնչվող ծրագրերին:
Եվ ահա, Երևանի ընտրությունների ընթացքում ընդդիմության փորձը՝ ամեն կերպ քաղաքականացնել, նույնիսկ կուսակցականացնել այս ընտրական գործընթացը, շատ երևանցիների մոտ ստեղծեց տպավորություն, թե այդ ուժերը ունակ չեն գործնականում ստանձնել քաղաքի վաղվա օրվա ողջ պատասխանատվությունը: Տարոն Մարգարյանի թիմը և՜ հեռուստատեսությամբ, և՜ հանդիպումների ժամանակ երևանցուն ներկայացավ որպես պրոֆեսիոնալների թիմ, որը ոչ միայն հասկանում է քաղաքի խնդիրները, այլև գիտի դրանց լուծման թե՜ բարդությունները, թե՜ ուղիները: Մինչդեռ ընդդիմությունը բացի՝ՙմենք սա կանեն, մենք նա կանենք՚ վերացական հայտարարություններից ու տարբեր տեսակի ՙէպիտետներ՚ կպցնելուց այլ բան չասաց: Եվ հիմա խոսել վարչական լծակներ օգտագործելու մասին՝ թյուրիմացություն է: Եթե իշխանությունը վարչական լծակ օգտագործեր, ընտրողների մասնակցությունը կլիներ ոչ թե 42, այլ ավելին՝ 60,70 տոկոս: Չկասկածեք:
Ես իմ համակիրներով ևս կազմակերպել էի Տարոն Մարգարյանին աջակցող շտաբ, ու բոլորիս նպատակը եղել է հետևյալը՝ մեկնաբանել մեր քաղաքացիներին, բացատրել և համոզել, որ իրենց շահերից է բխում ընտրություններին մասնակցելն ու Տարոն Մարգարյանի թիմի օգտին քվեարկելը: Ահա, սա է եղել Տարոն Մարգարյանի թիմակիցների գործելոճը:
– Այս ընտրություններում ընտրակաշառքի մասին ոչ թե վերացականորեն խոսվեց, այլ եղած դեպքերը որսացին ու արձանագրեցին լրագրողական տեսախցիկները. հետևաբար, ընտրակաշառք երևույթն ի՞նչ չափով դարձավ գործոն, որքանո՞վ կանխորոշեց ընտրությունների արդյունքները:
– Ես չեմ բացառում նման առանձին դեպքերի առկայությունը: Բայց համոզված պնդում եմ, եթե ավագանու ընտրությունների ժամանակ ընտրակաշառքի բաժանումը դառնար հիմնական գործոն, ապա, ինչպես արդեն ասացի՝ ընտրաղների մասնակցության թիվն անհամեմատ ավելի բարձր կլիներ: Ուրեմն, ընտրակաշառքը գործոն չի եղել: Տարոն Մարգարյանի թիմն հաղթեց բացառապես շնորհիվ իր իրատեսական ծրագրերի՝ քաղաքային տնտեսության խնդիրները հասկանալու, գիտակցված մոտեցումներ ունենալու շնորհիվ: Սա է թիմի հաջողության գրավականը:
Ի դեպ, նախորդների հետ համեմատած, այս ընտրություններում առաջին անգամ մրցակցություն ծավալվեց ընտրապայքարի ելած ուժերի ծրագրերի մեջ, առաջին անգամ երևանցիները սկսեցին քննարկել ծրագրեր ու իրենց դիրքորոշումը ձևավորել՝ ելնելով դրանցից: Սա կարևոր ձեռքբերումն էր: Եվ ահա, ի տարբերություն իշխանության, ընդդիմադիր ուժերը որևէ ծրագրային մոտեցում չներկայացրին՝ բացառությամբ այստեղից, այնտեղից վերցված մտքերի: Եվ բնականաբար, հաղթեց ՀՀԿ-ի իրատեսական ծրագիրը:
Դառնալով ձեր հարցադրմանը, թե ընտրակաշառքի փաստերը կանխորոշեցի՞ն ընտրությունների արդյունքները, ես ասում եմ՝ ոչ, ընտրությունների արդյունքները կանխորոշվեցին թիմի պրոֆեսիոնալիզմով, երևանցու մոտ այդ թիմի նկատմամբ ձևավորված վստահությամբ:
-Ի՞նչ կասեք երկու անցանկալի դեպքերի առնչությամբ. առաջինը՝ ՙԵլք՚ դաշինքը աղբարկղից հատնաբերեց ինչ-որ ցուցակներ, որտեղ, ըստ իրենց, ոստիկանության ՊՊԾ գնդի աշխատակիցների անուններն են, թե ո՞վ, ինչքա՞ն ձայն պետք է բերի ՀՀԿ-ի համար: Երկրորդը՝ Զարուհի Փոստանջյանի անակնկալ այցն էր ՀՀԿ շտաբ ու նրա հետ տեղի ունեցած միջադեպը:
-Իհարկե, ցավ ենք ապրում, ինքս ափսոսում եմ, որ նման դեպքեր եղան: Բայց, խոսքն ընդամենը երկու դեպքի մասին է, որոնց վերաբերյալ, ինչպես ռուսներն են ասում՝ ՙбабушка наглая сказала…՚, այսինքն՝ պարզ չէ, թե ՙզիբիլի վեդրոյի՚ մեջ ո՞վ է դրանք գցել, ովքե՞ր են իրականում սարքել այդ թղթերը, և ովքե՞ր են հիմա այն դարձնում մատի փաթաթան: Ժամանակը ցույց կտա: ՀՀԿ-ի 419 շտաբ է գործել, որից երկուսում ինչ-որ դեպք են տեղի ունեցել, բայց մենք դեռ պետք է համոզվենք՝ իրականում ի՞նչ է եղել: Եթե ես լինեի Ավան վարչական շրջանի ՀՀԿ նախընտրական շտաբի պետի տեղակալը որևէ մեկին թույլ չէի տա մտնել շտաբ, այդ թվում նաև ընդդիմության ներկայացուցչին, որովհետև դա ուղղակիորեն մեր իրավունքների ոտնահարում էր: Զարուհի Փոստանջյանը պետք է բարի լիներ թույլ տալ, որ շտաբ ժամանած ոստիկանները զբաղվեին այդ խնդրով, ոչ թե ինքը խցկվեր այնտեղ: Խոսում ենք իրավական պետություն ստեղծելու մասին, բայց իրավական երկրում խնդիրները զոռբայությամբ չեն լուծվում:
Եթե անգամ Փոստանջյանը խցկվել էր ՀՀԿ շտաբ, արդարացվա՞ծ էին ոստկանության քայլերը՝ նրան ու աղջկան այդ կերպ քաշքշելով դուրս բերելը, ինչի հետևանքով աղջիկն ուղեղի ցնցում ստացավ:
-Ես այդ կադրերը չեմ տեսել, փոխարենն այլ բան եմ տեսել.նույն Զարուհի Փոստանջյանն իր ամբողջ խմբով՝ մոտ 60-70 հոգով, ուղղակի հարձակվեց իմ կողմից ղեկավարվող նախընտրական շտաբի վրա, որը տեղակայված էր Մաշտոցի 15 հասցեում: Ու եթե չլիներ ոստիկանությունը, ապա շատ տհաճ միջադեպ կարող էր տեղի ունենալ: Եվ նրանք հենց այդ նպատակն էին հետապնդում:
Ձեր շտաբ ներխուժելու նպատակը ո՞րն էր, դարձյալ դարակներն է՞ր ուզում ՙխուզարկել՚:
-Հարցրեք իրեն, թե ի՞նչ նպատակ էր հետապնդում: Ես շտաբում աշխատում էի, երբ մոտեցան շտաբին, դուրս եկա ընդառաջ, իսկ խումբը սկսեց վանկարկել, անպատիվ խոսքեր հնչեցնել, պիտակավորել: Փորձում էին մեզ համբերությունից հանել: Բայց ես քաղաքականության մեջ նորելլուկ չեմ, նրանք չէին կարող ինձ ու իմ համախոհներին մղել պրովոկացիայի: Հարց եմ տալիս, որպես քաղաքացի ես կարող ե՞մ, իրավունք ունե՞մ իմ քաղաքական դիրքորոշումը օրենքի շրջանակներում անկաշկանդ արտահայտել: Խնդրում եմ ասեք՝ այո՞, թե՞ ոչ:
-Բնականաբար՝ այո:
-Այդ դեպքում, ամենաակնառու թեկնածուն ի՞նչ իրավունք ունի իմ վրա ճնշում գործադրել, երբ ես արտահայտում եմ իմ քաղաքական դիրքորոշումը: Նման վարքագծի տեր անձնավորությունն ամեն ինչի ընդունակ է: Ինձ զարմացրեց նաև ձեր հարցը. ի՞նչ է նշանակում՝ արդարացվա՞ծ էին ոստկանության քայլերը: Ոստիկաններն այդ կնոջն ասում են՝ դուրս եկեք շտաբից, ասում է՝ չեմ գա, շտաբի աշխատակիցներն ասում են՝ ձեռք մի տվեք մեր ապրանքին, ինքը բղավում է՝ ձեռք եմ տալու: Սրան համարժեք քայլը ո՞րն է, բնականաբար՝ նրան դուրս հանելը, բա ի՞նչ անեին ոստիկանները:
Ինչո՞ւ դուք՝ լրագրողներդ, այդ կնոջը չեք հարցնում՝ ի՞նչ իրավունք ունես մտնել մեկ այլ քաղաքական ուժի շտաբ: Ասում է՝ դարակներում ընտրակաշառք կա: Իսկ ո՞վ ասեց, որ կա, որտեղի՞ց նա գիտի: Փոստանջյանի արածը պրովոկացիոն քայլ էր, պարզ չէ՞ որ նա հատուկ էր ծրագրել ՀՀԿ շտաբեր մտնել, որպեսզի իր քայլով փորձեր հարամել ամբողջ ընտրական գործընթացը:
Եթե դարակում թաքցնելու բան չկար, գուցե ճիշտ կլիներ, որ ոստիկանությունը հենց այդ պահին բացե՞ր դրանք, դա կնպաստեր նաև լարվածության թուլացմանը:
-Ո՞ւմ գործն է՝ թաքցնելու ապրանք կա՞, թե՞ չկա: Եթե ես մտնեմ որևէ հեռուստաընկերության կամ մամուլի խմբագրություն ու ասեմ՝ պետք է ձեր դարակները նայեմ, որովհետև իմացել եմ, որ փող եք վերցրել իմ դեմ հոդված գրելու նպատակով, այդ ո՞ր խմբագիրն ինձ թույլ կտա բացել իր դարակները, խիստ կասկածում եմ: Խորհուրդ եմ տալիս բոլոր լրատվամիջոցներին, նաև ձեզ՝ չընկնել ծայրահեղության գիրկը: Հետևում եմ մամուլին ու զարմացած եմ, որևէ մեկը այդ նույն Փոստանջյանի վարքը չի քննում, չի քննադատում, նրան հարց չի ուղղում՝ ի՞նչ իրավունք ունեիր մտնել մեկ այլ կուսակցության շտաբ: Ասում են՝ քաղաքականությունն անբարոյականություն է, դա այլաբանորեն է ասված, բայց հավանաբար Զարուհի Փոստանջյանը դա ուղղակիորեն է հասկացվել:
-Ամփոփենք. առաջին անգամ մեզանում թե՜ խորհրդարանի, թե՜ ավագանու ընտրություններից հետո հետընտրական գործընթացներ չեղան: Ընդդիմադիր ՙԵլք՚ դաշինքն այս անգամ ևս ընդունեց ընտրությունների արդյունքները, իսկ դաշինքի քաղաքապետի թեկնածու Նիկոլ Փաշինյանը հետընտրական շոուին տուրք չտալն այսպես մեկնաբանեց. ՙՄենք փուստ կրակոցների իրավուն քաղաքական պրոցեսներում չունենք։ Մենք չենք պատրաստվում քաղաքացիներին հանել էքսկուրսիայի Երևան փոքր կենտրոնով: Էն քաղաքական ուժը, որ կարող է հետընտրական պրոցեսով իշխանափոխություն անել, ուրեմն նա ի վիճակի է հաղթել նաև ընտրություններում՚։ Սա փաստորեն, նոր մշակույթ է
Այն, ինչ ասում է ընդդիմությունը, մասնավորաբար, ՙԵլք՚-ը, մեկ բան է փաստում, որ ընտրական գործընթացը տեղի է ունեցել օրենքի պահանջների սահմաններում, նախընտրական մրցապայքարում բոլորը կարողացել են իրենց քաղաքական ծրագրերն անկաշկանդ ներկայացնել հանրությանը, իսկ արդյունքը եղավ այն, ինչ եղավ:
Շնորհիվ ԸՕ-ում կատարված վերջին փոփոխությունների ընտրական գործընթացն առաջացրեց վստահություն ու քվեարկության արդյունքները մեր հանրության կողմից չդարձան վիճարկելի: Քվեարկությունների արդյունքը կասկած չհարույցեց երևանցիների մոտ, ինչպես հանրության մեծամասնության համար կասկած չհարուցեցին համապետական ընտրությունների արդյունքները: Սա է խորհրդարանական ու ՏԻՄ ընտրություններում մեր մեծ ձեռքբերումը: Նորանկախ Հայաստանի պատմության մեջ առաջին անգամ հետընտրական քաղաքական զարգացումներ, որոնք կասկածի տակ կառնեին, կամ կստվերեին քվեարկության արդյունքները՝ տեղի չունեցան: Եվ սա ոչ միայն իշխանության, այլ բոլորիս ձեռքբերումն է: Մնում է կարողանանք այն խորացնել, ավելի բազմապատկել և երբեք չստվերել: Առանց այն էլ բավականին լուրջ խնդիրներ ունենք լուծելու, ուրեմն եկեք փորձենք մեկս մեկին լրացնելով հասնել այդ խնդիրների լուծմանը:
ԱՐՄԻՆԵ ՍԻՄՈՆՅԱՆ

Տպելու տարբերակ Տպելու տարբերակ

Դիտել Politics, Լրահոս, Հասարակություն, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն