Գլխավոր » Politics, Լրահոս, Հարցազրույցներ, Քաղաքականություն

ՙԵրևան ջան, ելք կա՚. սա է լինելու մեր կարգախոսը. Ալեն Սիմոնյանի

Ապրիլ 22, 2017թ. 19:24

Հարցազրույց  <<Ելք>> դաշինքի ավագանու թեկնածու Ալեն Սիմոնյանի հետ
ՙԵլք՚-ականներդ հայտարարում եք, թե նոր մտածողություն ու փոփոխություններ բերող քաղաքական ուժ եք. հետևաբար, քաղաքապետի ընտրություններում հաջողության հասնելու դեպքում ի՞նչ նոր քայլեր եք անելու Երևանի ու երևանցու համար:
-Երևանում խնդիրները շատ են՝ դրանք առնչվում են և հին շենք- շինություններն, և տեսախցիկներին, կարմիր գծերին, էլ չեմ խոսում մեր քաղաքում առկա մենաշնորհների մասին, որոնք պատկանում են տարբեր պաշտոնյաների, մինչդեռ գրանցված են նրանց բարեկամների անուններով: Երևանի բյուջեն, ըստ մեզ, ոչ արդյունավետ է ծախսվում՝ անտեղի զարդարանքներ, շինարարական, ասֆալտապատմանն աշխատանքներ, մի խոսքով, Երևանում շատ գործ կա անելու: Իսկ թե ի՞նչ, այդ ամենին դուք կծանոթանաք մեր ծրագրում, որը դեռ պատրաստվում է և շուտով կներկայացնենք մեր երևանցիներին:
Բայց այդ բոլոր խնդիրների լուծումը կախված է նրանից, թե մենք ի՞նչ չափով ներկայացված կլինենք ավագանիում: Եթե մեզ հաջողվի լինել մեծամասնություն ու ձևավորել քաղաքային իշխանություն, այդ դեպքում, ինչպես ասում են՝ կլինի բոլորովին այլ խոսակցություն, քանի որ մենք կունենանք առավել հնարավորություններ: Մինչդեռ հակառակ իրավիճակը կլինի, եթե լինենք փոքրամասնություն ու ընդդիմության դերը ստանձնենք: Սրանք տարբեր մարտավարություններ պահանջող իրավիճակներ են:
-Սակայն ստեղծված իրավիճակը՝ երեք ուժերի մասնակցությունը, մեծ շանս է ստեղծում ՙԵլք՚-ի համար, այնպես, որ ավագանիում կարող եք բավականին լավ ներկայացված լինել:
-Բայց մենք չենք մտածում այն մասին, որ ավագանիում ունենանք, օրինակ, 20 մանդատ, մենք անգամ չենք քննարկում ու չենք խոսում այդ մասին: Մենք այսօր մտածում ենք մեկ բանի մասին՝ գնում ենք հաղթելու, այսինքն՝ ունենալու ենք 40+1 տոկոս ձայն ու քաղաքապետը լինելու է ՙԵլք՚-ի ներկայացուցիչ Նիկոլ Փաշինյանը:
-Եթե այս սցենարը չկատարվի կհամարեք, որ պարտվեցի՞ք:
-Տեսեք, ԱԺ ընտրապայքարում ՀԱԿ-ն էր, ՕՐՕ դաշինքը, ՙՀայկական վերածնունդ՚-ը, բայց նրանք այսօր խորհրդարանում չեն: Մինչդեռ մենք երկու տարում կարողացանք ստեղծել մրցունակ ուժ, որն այսօր Հայաստանում փաստացի համարվում է երրորդ քաղաքական ուժը: Մենք ԱԺ ընտրություններում իշխանափոխություն չարեցինք, այսինքն՝ որպես ընդդիմություն չվերցրինք իշխանությունը, բայց հավաքեցինք 7,8 տոկոս, որը վերածվեց 9-ի, հիմա, մեր ձեռքբերածը հաղթանակ համարե՞նք, թե՞ պարտություն: Ինքս շնորհավորանք ընդունելու կողմնակից եմ, որովհետև երկու տարում ձևավորել ենք երիտասարդ ուժ, որը որևէ մեկի ֆինանսների ՙտակ՚ չմտավ և կարողացավ ստանալ 122 049 ընտրողի քվեն: Հետևաբար, ԱԺ ընտրություններում ձեռքբերածը համարում եմ այդ ուժի հաղթանակը: Նույնը լինելու է Երևանի ընտրություններում, մենք ապրիլի 2-ի ընտրությունների ժամանակ Երևանում հավաքեցինք 14, 5 տոկոս ձայն և ես վստահ եմ, որ քաղաքապետի ընտրություններում այդ թիվն առնվազն պետք է եռապատկվի: Եվ մենք ամեն ինչ անելու ենք դրա համար:
Որոշ քաղաքական ուժերի մոտ այսպիսի միտում է նկատվում. ասում են, այ, եթե ընտրողը մեզ շատ քվե տա, մեր բոլոր խոստումները կկատարենք, եթե մեր ակնկալածից քիչ տա՝ չենք անի: Դուք էլ ե՞ք ասելու՝ սիրելի երևանցիներ, եթե Փաշինյանը քաղաքապետ չդարձավ՝ խոստացածներս չենք անելու:
-Իհարկե՝ ոչ: Մենք ներկայացնում ենք 122 049 մարդու քվեն, մենք չենք կարող այդ մարդկանց հիասթափեցնել, եթե հանկարծ հիասթափեցրինք, ապա այդ թիվը երբեք չի ավելանալու: Այնպես որ, մենք դրա իրավունքը չունենք: Հակառակը՝ պետք է այնպես աշխատենք, որ այն մարդիկ, որոնք մեզ չեն ընտրել, հասկանան, որ սխալվել են: Իսկ քարոզարշավի ժամանակ տրված մեր բոլոր խոստումներն անպայմանորեն իրականացնելու ենք: Հիշեք Նիկոլ Փաշինյանի 5 տարիների աշխատաոճը խորհրդարանում, նա իրեն երբեք չի համարել միայն ՀԱԿ դաշինքի կողմից ընտրված պատգամավոր, այլ որպես Հայաստանի Հանրապետության բոլոր քաղաքացիների պատգամավոր, ու բոլորի հարցերին էլ անդրադարձել է: Քաղաքականորեն համակարծիք չլինելով ՙՍասնա ծռեր՚ խմբի քայլերի հետ, այնուհանդերձ, պաշտպանեց նրանց իրավունքները: Եթե քաղաքական գործիչը, ուժը այս տրամաբանությամբ չգործի, ապա շատ արագ դուրս կմղվի դաշտից, կդառնա կործանված քաղաքական գործիչ:
Եթե ավագանիում չունենաք մեր ակնկալած հաղթանակը, մենք բնականաբար, չենք ասի՝ սիրելի երևանցիներ ձեզ ինչ խստեցել ենք չենք անելու, սակայն ինչպես ասացի, մարտավարությունը տարբեր կլինի: Պարզ չէ՞, եթե ՙԵլք՚-ի ներկայացուցիչը լինի քաղաքապետ մենք շատ ավելի լծակներ կունենաք ու աշխատելու ավելի մեծ հնարավորություններ: Բայց ժամանակին չլինելով ավագանի, չլինելով պատգամավորի թեկնածու ես փողոցներ եմ փակել, ու չեմ դադարել պայքարելուց: Այնպես որ, եթե լծակ ունենամ կկարողանամ ուղղակի մտնել քրեակատարողական հիմնարկ և տեղում լուծել, օրինակ, դատապարտյալների համար նորմալ պայմաններ ստեղծելու հարցը, իսկ եթե լծակ չունեմ, ապա ստիպված կլինեմ նստել քրեակատարողական հիմնարկի պատերի տակ ու դրսից պահանջել այդ ամենը: Մի խոսքով՝ մարտավարության խնդիր է:
-Խորհրդարանական ընտրություններն, անկախ բոլոր թերություններից, ցույց տվեցին, որ փոխվել է քաղաքական ընդդիմության որակը, և ընտրողը քաղաքական դաշտում եղած ընդդիմադիրներից հոգնած՝ իր քվեն տվեց նոր որակի ընդդիմության օգտին: Սա նշանակում է մեծ պատասխանտվության. ՙԵլք՚-ն ընկալու՞մ է այդ պատասխանատվության լրջությունը:
-Միանշնակորեն. ձեզ մի հետաքրքիր բան ասեմ, այս տարիներին իմ գործընկերների հետ հաճախ էինք քննարկում երկրում ստեղծված տարբեր իրավիճակներն ու հարցը մշտապես այսպես էինք դնում՝ ի՞նչ կանեինք, եթե այդ պահին մենք լինեինք իշխանություն, ինչպե՞ս կվարվեինք, օրինակ՝ ադրբեջանական ագրեսիայի ժամանակ, ԵԱՏՄ-ին անդամակցման պարագայում, կամ ՙՍասնա ծռեր՚-ի կատարած գործողությունների ժամանակ և այլն: Մենք մեր մեջ անընդհատ ներարկել ենք այն միտքը, որ մի օր անպայման իշխանության ենք գալու և պետք է կարողանանք նման իրավիճակներում ճիշտ կողմնորոշվել: Եվ այսօր, խորհրդարանական ընտրություններում ստացանալով 9 մանդատ, բնականաբար, հասկանում ենք, որ մեզ վրա մեծ պատասխանատվություն կա: Մենք կվերջանանք որպես քաղաքական ուժ, եթե դա չգիտակցենք: Ընդամենը 5 տարի անց ՙԵլք՚-ը կարող է վերածվել ՀՀՇ-ի պես մի կառույցի, որն իրեն ամբողջությամբ սպառեց ու մարդկանց հիասթափեցրեց: Եթե այս ժամանակահատվածում մենք ճիշտ չաշխատենք, չգիտակցենք նոր ընդդիմություն լինելու կարևորությունը, ապա կհայտնվենք այն նույն քաղաքական աղբանոցում, ուր հայտվեցին մնացածները:
Պարզվում է, որոշ ընդդիմադիրներ պոպուլիզմով տարված ավագանիում հաճախ բարձրաձայնել են խնդիրներ՝ դրան հետ կապված անգամ անհրաժեշտ տեղեկատվություն չունենալով: Ի տարբերություն նրանց աշխատաոճին, հետաքրքիր է, ինչպե՞ս եք աշխատելու դուք՝ նոր մտածողության ընդդիմադիրներդ:
-Ես աշխատել և աշխատում եմ մի մարդու հետ, խոսքս Նիկոլ Փաշինյանի մասին է, որի ԱԺ-ում հնչեցրել յուրաքանչյուր խոսի տակ առնվազն մեկ, երկու պաշտոնական փաստաթուղթ է եղել: Առհասարակ, սա մեր քաղաքական ուժի գոծելաոճն է: Այսինքն, մենք մեզ թույլ չենք տվել զբաղվել պոպուլիզմով, չնայած հաճախ դա շատ ավելի հեշտ է եղել, ու շատ ընդդիմադիր գործիչներ դրանից հաճախ օգտվել են: Տեսեք, ՙՍասնա ծռեր՚-ի դեպքի ժամանակ մեր վարկանիշի համար ամենահարմար դիրքորշումը կլիներ այն, որ դուրս գայինք փողոց, մյուսների պես հայտարարեինք՝ իշխանափոխություն ենք անելու: Բայց գիտակցեցինք, որ դա չի կարելի, որովքետև նժարին դրված է մեր երկրի հեղինակությունը, մեր հայրենակիցների կյանքերն են դրված: Շատ մարդիկ այն համոզման էին, թե նման դիրքորոշմամբ մեր քաղաքական ուժը վարկանիշի անկում ունեցավ ու մեծ վնաս կրեց: Բայց դա մի կողմ դնելով հստակ ասացինք մեր խոսքը՝ Երևանում հայը հայի վրա չի կարող կրակել, ու մարդկանց առաջարկեցինք՝ ձեռքները վեր բարձրացնել և ցույց տալ, որ մեր բոլոր նպատակներն ուղղված են հարցի խաղաղ լուծմանը: Սա նշանակում է տարբեր իրավիճակներում որպես քաղաքական ուժ մենք մեզ ճիշտ ենք պահել:
Նույն կերպ կաշխատենք և՜ Ազգային ժողովում, և՜ ավագանիում:
-Փշոտ է լինելու ձեր ճանապարհը, որովհետև կլինեն ուժեր (արդեն կան), որոնք անընդհատ կփորձեն ձեզ քննադատել, պիտակավորել, թե ձեզ ուղղորդում են, ձեր թիկունքից երևում են իշխանության կամ որևէ պաշտոնյայի ՙՙականջները՚՚: Դուք պատրա՞ստ եք այդ ՙՙմարտին՚՚:
-Մենք վերջին տարիներին միշտ էլ նման մարտերի մեջ ենք եղել, ու առաջ ենք գնացել: Մեզ հալածել են ու հալածում են, բայց մենք չենք ընկրկում: Մեր երկրը շատ փոքր է և բոլորը բոլորի մասին ամեն ինչ գիտեն: Եվ դա իրոք այդպես է: Բայց եթե տվյալ պիտակավորումը այդ մարդուն չի համապատասխանում, ինչ էլ անեն, միևնույն է՝ պիտակը նրան չի կպչելու: Այդպես է նաև մեր պարագայում, ինչ ուզում ենթ թող ասեն, չեն կարողանալու մեզ վարկաբեկել: ԱԺ ընտրությունները ցույց տվեցին,որ այն ուժերը, խաղաղության դրոշի տակ ատելություն սերմանող այն քաղաքական լիդերները, որոնք փորձեցին մեզ վարկաբեկել, իրենք ստացան իրենց քայլերի արժանի գնահատկանը հանրության կողմից: Եվ այսօր նրանք քաղաքական աղբանոցում են:
Աժ ընտրությունների ժամանակ ակնկալում էինք տեսնել գաղափարական պայքար՝ չտեսանք, իսկ քաղաքապետի ընտրությունների ժամանակ երևանցին գոնե կտեսնի՞ առաջարկների մրցակցություն:
-Շատ կուզենամ, որ այդպես լինի: Բայց նաև մտավախություն ունեմ, քանի որ իշխանական թևից եկած առաջին արձագանքներն ինձ հիասթափեցրին: Երբ ԶԼՄ-ի միջոցով փորձում են շահարկել մարդու անձը, քննարկման առարկա են դարձնում մարդու ծագումնաբանությունը, այն դեպքում, երբ Նիկոլ Փաշինյանը Երևանի կենտրոնից ընտրված պատգամավոր է, դա այլ բան չէ, քան էժանագին, հին ու չաշխատող հնարք: Ես հույս ունեմ, որ դա չի շարունակվի, ու ինքս էլ չեմ ցանկանա, որ մենք ևս մտնենք նման անլուրջ բանավեճի մեջ ու փորձենք նույն կերպ խոսել ընտրապայքարի մտնող մյուս թեկնածուների մասին: Դա ոչ մի կողմի համար չի կարող օգտակար լինել: Հակառակը, պետք է խոսվի միայն մեր քաղաքի ու մեր անելիքների մասին: Մենք տնտեսական ծրագրերով ենք ներկայնալու: Աժ ընտություների ժամանակ, որը քաղաքական կարևոր իրադարձություն էին, մենք չհայտարարեցինք, թե եկեք վերջ դնենք այս իշխանությանը, չասացինք, թե ռեժիմը խուճապի մեջ է, եկեք վերջ տանք այս ավազակապետութանը, սրանք հին, սպառված, մաշված կարգախոսեր են որոնք ոչ այն ժամանակ, ոչ էլ քաղաքապետի ընտրություններում չեն կարող լինել մեր ծրագրում: Մենք նստած ծրագիր ենք գրում ու մտածում ենք, թե ի՞նչ ենք առաջարկելու մեր երևանցիներին, ու ի՞նչ մարտավարությամբ ենք հանդես գալու: Ինչպես Աժ ընտրություների ժամանակ հայտարարեցինք՝ սիրելի հայրենակիցներ եկել ենք ձեզ ասելու, որ Հայաստանում տեղ գտած հուսահատությունից ելք կա, այժմ էլ ասելու ենք՝ ՙԵրևան ջան, ելք կա՚, սա էլ լինելու է մեր կարգախոսը:
Ա. Սիմոնյան

Տպելու տարբերակ Տպելու տարբերակ

Դիտել Politics, Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն