Գլխավոր » Լրահոս, Հասարակություն, Հարցազրույցներ, Քաղաքականություն

Սամվել Բաբայանի ձերբակալությունը կապ չունի ընտրական գործընթացների հետ

Մարտ 24, 2017թ. 20:37
գառնիկ իսագուլյան

 

Հարցազրույց Արցախի Հանրապետության նախագահի խորհրդական Գառնիկ Իսագուլյանի հետ

ԱԱԾ հայտարարության համաձայն մաքսանենգ եղանակով ՙԻգլա՚ տեսակի զենիթա-հրթիռային համալիր տեղափոխելու փաստի առթիվ հարուցված քրգործի շրջանակներում ձերբակալված 3 անձանցից մեկը  ԼՂՀ ՊՆ և ՊԲ նախկին հրամանատար, Արցախի հերաոս, գեներալ-լեյտենանտ Սամվել Բաբայանն է: Հաղորդվում է, որ կան արժանահավատ տվյալներ, որոնք հաստատում են, որ այդ անձիք Բաբայանի համաձայնությամբ և նրա պատվերով են իրականացրել հիշյալ  համալիրի մասերի ձեռքբերումն ու փոխադրումը: Ի՞նչ փաստի հետ գործ ունենք, ի՞նչու պետք է Բաբայանը գնար նման քայլի, ի՞նչ  նպատակ է նա հետապնդել:

-Նախ, հատուկ նշեմ, որ նույն հայտարարության մեջ ԱԱԾ-ն հստակ ընդգծում է, քանի դեռ մարդը դատարանի օրինական դատավճռով դատապարտված չէ, մենք իրավունք չունենք նրան համարել մեղավոր: Կարծում եմ, որ դա ԱԱԾ-ն ամենևին պատահական չի շեշտել, այլ հաշվի է առել անմեղության կանխավարկածը: ԱԱԾ հայտարարության մեջ, այո, հստակ նշված է, որ գոյություն ունեն օպերատիվ հետախուզական տվյալներ ու անհերքելի փաստեր: ՙԻգլա՚  համակարգն իր հետ ունեցել է նաև 9M39 հրթիռ: Այն, ինչ ասում է ԱԱԾ-ն համապատասախանում է իրականությանը: Ցավոք, հատկապես նախընտրական այս փուլում բավական մեծացել է լարվածությունը: Իսկ այս պարագայում խոսքն այն մասին է, որ Հայաստան է ներկրվել նման համակարգ: Փաստն այն է, որ այս ամենի հետ ինչ-որ ձևով առնչվել է ՊԲ-ի նախկին հրամանատար, գեներալ-լեյտենանտ Սամվել Բաբայանը: Մենք իրավունք չունենք չվստահել ԱԱԾ հաղորդագրությանը:

Ասեմ նաև, որ մեր համատեղ աշխատանքից շատ լավ ճանաչում եմ ԱԱԾ տնօրեն Կուտոյանին, նա լավ իրաբան է ու չեմ կարծում, որ օրենքի խախտում թույլ տված լինի օպերատիվ-հետախուզական աշխատանքից մինչև ձերաբակալություն: Սակայն թե ի՞նչ նպատակով է դա արվել, ի՞նչ խնդիր են ցանկացել լուծել, արդյոք, դա նախատեսվա՞ծ է եղել որոշակի գործողությունների համար՝ ցույց կտա քննությունը:

Հայտնի է, որ Սամվել  Բաբայանն աջակցում է ընդդիմադիր ՕՐՕ դաշինքին, վերջինս էլ արդեն հանդես է եկել հայտարարությամբ ու Բաբայանի ձերբակալությունը որակել դաշինքի դեմ կազմակերպված ակնհայտ սադրանք: Ասել է, թե ձերբակալությունն այլևս քաղաքականացվում է:

-Այս խնդիրը որևէ առնչություն չունի ընտրական գործընթացների հետ, պետք չէ այն քաղաքականացնել: Բոլոր քաղաքական գործիչներին, ընտրաշավի մասնակցող  կուսակցություններին ու  դաշինքներին կոչ եմ անում ձեռնպահ մնալ կատարվածի վերաբերյալ տարբեր որակումներ տալուց: Եկեք չքաղաքականացնենք այս ամենն ու չկապենք ընտրարշավի հետ՝ պնդելով, եթե ինչ-որ դաշինքի վարկանիշը օր օրի աճում է, ուրեմն իշխանությունը գնաց  նման գործողության որպեսզի թուլացնի այդ ուժի հնարավորությունները:

Վերջին շրջանում ես դարձյալ առիթ եմ ունեցել խոսելու Սամվել Բաբայանին մասին, երբ նա Արցախի Հանրապետության հանրաքվեն նկարչություն որակեց, ասելով, թե կեղծված է, և ես հանդես եկա կոշտ հայտարարությամբ: Այնուհետ, Բաբայանը Ջրառատ գյուղի դեպքերից հետո հայտարարեց, թե մյուս կողմն էլ անպայմանորեն գնալու է հակադրման ու լինելու են զոհեր: Նա արեց անթույլատրելի հայտարարություն, առանց սպասելու քննության արդյունքներին՝ Ջրառատի դեպքերն իրականում ի՞նչ բնույթ ունեն, կենցաղայի՞ն են, թե՞ քաղաքական, նա շտապեց նման կոչ հնչեցնել: Մասիսի ու Արագածոտնի դեպքերի քննությունը ցույց տվեցին, որ  դրանք իրականում կենցաղային հողի վրա էին տեղի ունեցել, մի դեպքում հայր ու որդի էին հակասության մեջ մտել, բայց չգիտես ինչու քաղաքական ուժերը, նրանց առաջնորդները փորձում են նման դեպքերին քաղաքական ենթատեքստ տալ, առիթը բաց չթողնել ու լարել իրավիճակը, սա ինձ համար անհասկանալի է: Բոլորին խորհուրդ կտամ հիմա էլ  Բաբայանի հետ կատարվածը չօգտագործել երկրի մթնոլորտը սրելու համար:

Կրկնում եմ, շատ լավ իմանալով ԱԱԾ համակարգը, լավ ճանաչելով պարոն Կուտոյանին, կարծում եմ, որ այստեղ որևէ մտացածին, կամ քաղաքական ենթատեքստ չկա, քանի որ կան փաստեր: Կարողացեք գնահատել այդ մարմինների աշխատանքը: Պատկերացնո՞ւմ եք, Աստված մի արասցե, ի՞նչ կարող էր լինել, եթե ԱԱԾ-ն չկանխազերծեր ու տեղի  ունենար աղետ, ենթադրենք խոցվեր մի ինքնաթիռ որը  գնար դեպի ատոմակայանի ուղղությամբ: Հետո ասելու էին՝  ԱԱԾ-ն քնած է՞ր: Հիմա բացահայտել են, կա փաստ, որ ՙԻգլա՚-ն մտել է Հայաստան, այն բռնագրավված է և կան ձերբակալվածներ: Մնում է սպասել քննության ընթացքին:

Ես խոսքս ուղղում եմ նաև ԱԱԾ-ին, ոստիկանությանը. որևէ կերպ տուրք չտաք  տարբեր քաղաքական դեմքերի, ուժերի բարձրակոչ հայտարարություններին, որոնք  փորձում են վարկաբեկել իրավապահների աշխատանքը: Պահանջում ու խնդրում եմ ձեզանից՝ շատ ավելի զգոն լինել, որպեսզի խուսափենք ծանր հետևանքներից,  անհրաժեշտության դեպքում գնացեք նման կանխարգելիչ գործողության, մեր  հասարակության զգալի հատվածն իր հոգու խորքում ողջունում է ձեր աշխատանքը: Իսկ հակառակ դեպքում մենք կարող է ունենանք շատ ծանր հետևանքներ, եթե դուք օպերատիվ չարձագանքեք նման երևույթների:

Գագիկ Ծառուկյանը ամենուր հայտարարում է, թե 2015-ի փետրվարի դեպքերի ժամանակ ինքը չուզեցավ մեկ հայի արյուն թափվեր, դրա համար հետ կանգնեց  գործընթացներից, իսկ այսօր ՙԾառուկյան դաշինք՚-ի առաջին կին թեկնածու Նաիրա Զոհրաբյանը Քաջարանում ասում է՝ մարզպետի ականջները կկտրեմ: Ես հարց եմ ուղղում պարոն Ծառուկյանին, արդյոք, մարզպետի ականջները կտրելուց արյուն չի՞ հոսելու: Սպասում եմ Ծառուկյանի արձագանքին, որովհետև կան մարդիկ, որոնք  նման կոչերից ոգևորվում են, ստեղծվում է անպատժելիության մթնոլորտ, նաև ոգևորվում են այն ուժերը, որոնք ոչ թե նպատակ ունեն նախընտրական գործընթացներ իրականացնել, այլ անհամբեր սպասում են հետընտրական զարգացումներին: Դրանք այն ուժերն են, որոնք շատ լավ գիտակցում են, որ չեն հաղթահարելու խորհրդարան մտնելու շեմը, ինչը բավականին դժվարացել է նոր Ընտրական օրենքով, հետևաբար, այսօր իսկ պատրաստվում են հետընտրական գործընթացներին: Հետխորհրդային երկրների օրինակով մենք տեսել ենք, թե ի՞նչ հետևանքներ կարող է լինել, երբ ուժ է կիրառվում: Այդպես Ուկրաինան կորցրեց տարածքներ, նաև Վրաստանը, իսկ Հայաստանը տարածքներ կորցնելու որևէ ցանկություն չունի: Դրա համար կոչ եմ անում և ոստիկանությանը, և ԱԱԾ-ին շատ  ավելի զգոն լինել, շատ ավելի համարձակ, ու եթե կա փոքր-ինչ կասկած որևէ խմբավորման, անձի գորոծողություններում՝ կանխարգելեք, որպեսզի հետևանքները չլինեն ողբերգական:

Ինչպե՞ս կմեկնաբանեք վրացական  կողմի հերքումը, թե իր տարածքով նման համակարգ դուրս չի տարվել դեպի Հայաստան:

-Վրաստանը, բնականաբար, կարող է հերքել, որ իր տարածքով չի անցել, որովհետև ՙԻգլա՚-ն շատ լուրջ  համակարգ է :Գուցե նրանց համապատասխան մարմիններն ընդհանրապես տեղյակ չեն եղել: Անհրաժեշտության դեպքում Հայաստանի ու Վրաստանի համապատասխան մարմինները կարող են միասին այս հարցը քննել: Բայց նաև մի մոռացեք, որ հետխոհրդային մի շարք երկրներ ունեն շատ լավ զինանոց ու նրանցից հնարավոր է ձեռք բերել նման համալիր, այն էլ շատ ավելի էժան գներով: Իսկ թե ինչպե՞ ս եղավ, որ այդ երկու անձինք կապվեցին հենց  Բաբայանի հետ՝ ցույց կտա քննությունը: Ամեն դեպքում փաստեր կան, դրա համար ասում եմ, որ Բաբայանի կալանավորումը ոչ մի կապ չունի նախընտրական գործընթացների հետ, այլ կապ ունի հենց ՙԻգլա՚-ի ձեռքբերման հետ:

Արդյոք ՙԻգլան՚ այն զե՞նքն է, որով պետք է ապստամբություն արվեր երկրում, և արդյոք այդչափ անհեռատես է ՞ Բաբայանը, որ գնար նման քայլի:

– ՙԻգլան՚ շատ արդյունավետ զենք է: Տեղեկացնեմ, որ ՙԻգլա՚-ն նախատեսված է 3-ից 5 կմ բարձրությամբ թռչող օբյեկտներ ոչնչացնելու համար: Դրանք կարող են լինել ոչ միայն մարտական, այլև քաղաքացիական ինքնաթիռներ, ուղղաթիռներ, անօդաչու թռչող սարքեր կամ այլ կարգի  օբյեկտներ: Ի դեպ, ՙԻգլա՚-ով շատ ավելի հեշտ կարելի է քաղաքացիական ինքնաթիռներ խոցել, և հատկապես, այն ժամանակ, երբ ինքնաթիռը նոր-նոր է սկսում վեր բարձրանալ: Բավական է կոճակը սեղմել ու տվյալ օբյեկտը ոչնչացված է:

Բայց ո՛չ ԱԱԾ-ն, ո՛չ էլ համապատասխան իրավապահ մարմինները չեն խոսել բռնագրավված ՙԻգլա՚-ի կիրառության ձևի մասին: Չի բացառվում, որ այն ձեռք է բերվել վաճառքի նպատակով, Հայաստանը տվյալ դեպքում գուցե ծառայել է որպես տարանցիկ երկիր:

-Մի հետաքրքիր վարկած էլ առաջ քաշվում, գուցե այդ համակարգը բերվել է Հայաստան՝ սահման տեղափոխելո՞ւ նպատակով: 

-Սա էլ չի բացառվում, հնարավոր է շատ էժան գնով կարողացել են հայթայթել ու փոխանցելու էին Պաշտպանության բանակին: Այնպես որ, ամեն ինչ հնարավոր է: Դրա համար եկեք քննությունից առաջ չընկնենք, նախապես ոչինչ չենթադրենք, առավել ևս չասենք, որ բերվել է երկրում ապստամբություն անելու համար:

Սակայն մի բան կարող եմ ասել հստակ, հատկապես նախընտական շրջանում, եթե իշխանությունը գնում է նման գործողության, ապա հաշվարկի ճշմարտացիությունը մինչև 100 տոկոս է: Եթե խոսուն փաստեր չլինեին, իշխանությունը նախընտրական փուլում չէր գնան այս քայլին, լավ իմանալով, որ այն կարող է քաղաքականացվել:

Ինչ վերաբերում է հարցին,  թե ինչո՞ւ Բաբայանը պետք է դիմեր նման անհեռատես քայի, գիտեք, ցավոք նաև նման իրավիճակներ են լինում, երբեմն թվում է, թե մարդը պետք է լինի զգոն ու գիտակցի իր քայլի լրջությունը, բայց կատարվում է հակառակը: Թերևս սա հենց այդ դեպքն է:

-Օրերս՝  Բաբայանի ձերբակալումից մեկ օր առաջ, մամուլում տեղեկատվություն շրջանառվեց, թե ՕՐՕ-ն ծրագրում է ՙՍասնա ծռեր -2՚ պլանը իրականացնել: Սա ևս չի՞ փաստում, որ Բաբայանի ձերբակալությունը, այնուհանդերձ,  քաղաքական ենթատեքստ ունի:

-Նման  տեղեկատվություն ոչ թե օրերս, այլ  մեկ ամիս է շրջանառվում է մամուլում: Մարդիկ իրենք էին հայտարարում այդ մասին:  ՙՍասնա ծռեր՚-ի ղեկավարների՝ Ժիրայր Սեֆիլյանի ու Վարուժան Ավետիսյանի հայտարարությունը ՕՐՕ դաշինքի բոլոր անդամները ողջունեցին: Հիմա, եթե մարդիկ հեղափոխական կոչերը ողջունում են և ոգևորվում են, որ ՙՍասնա Ծռեր՚-ը հույսը իրենց դաշինքի հետ են կապում, էլ ինչի՞ մասին է խոսքը:

Մի հարցում հաստատա համոզված եղեք, իշխանությունը շահագրգռված չէ իրավիճակը լարել, մինչդեռ շատ շատերին դա ձեռնտու է ու նրանք այսօր իսկ  նախապատրաստվում են հետընտրական գործողությունների, որպեսզի  ապակայունացնեն երկրում իրավիճակը ու լուծեն իրենց  խնդիրները:

Արմինե Սիմոնյան

 

Տպելու տարբերակ Տպելու տարբերակ

Դիտել Լրահոս, Հասարակություն, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն