Գլխավոր » Politics, Լրահոս, Քաղաքականություն

Ժողովուրդը պետք է լինի զգոն ու ձեռնպահ մնա ձավարով, բրնձով, 5000-ով խորհրդարան ձևավորելուց

Մարտ 16, 2017թ. 10:35
Վահրամ Բաղդասարյան

Հարցազրույց ՀՀԿ խմբակցության ղեկավար, ՀՀԿ պատգամավորության թեկնածու ՎԱՀՐԱՄ ԲԱՂԴԱՍԱՐՅԱՆԻ հետ
-Ողջ հանրապետությունում նախընտրական եռուզեռը շարունակվում է, ի՞նչ իրավիճակ է Լոռիում՝ մասնավորավար, Վանաձոր քաղաքում:
-Նախընտրական պայքարը մեզ մոտ էլ է մտել ակտիվ հունի մեջ, ընթանում է քաղաքական լուրջ քարոզարշավ: Անձամբ ես աշխատում եմ բավականին լարված աշխատանքային գրաֆիկով, այցելում եմ մարզի գյուղեր, քաղաքներ, հանդիպում մեր ժողովրդի հետ: Հանդիպումներից ստացած տպավորություններս շատ լավ են: Ինձ ուրախացնում է այն, որ մեր ժողովուրդը հնչեցնում է ոչ միայն կենցաղային, սոցիալական հարցեր, այլև քաղաքական բնույթի հարցադրումներ ու հետաքրքրված է երկրում տեղի ունեցող համակարգային փոփոխություններով:
Ինձ նաև ոգևորում է այն, որ մեր ժողովուրդը երկրի ապագայի հանդեպ ունի մեծ լավատեսություն ու սպասումներ: Խորհրդարանական նոր համակարգի ներդրմամաբ մարդկանց մոտ, իրոք, մեծ հույսեր են արթնացրել: Նրանք հավատ ու ակնկալիք ունեն մեր նոր կառավարությունից, նրա գործունեությունը շատերին է ոգևորել: Այսուհետ մեր աշխատանքը պետք է միտված լինի նրան, որ մարդիկ երբեք չհուսախաբվեն:
Այս ընտրություններից շատ բան է կախված, և դրանում մեծ գործ ունեն անելու բոլոր քաղաքական ուժերը, նրանք պետք է դրսևորեն անհրաժեշտ քաղաքական կամք որպեսզի ընտրություններն անցնեն վստահության բարձր մթնոլորտում: Դա նախ մեր ժողովրդի պահանջն է. երկրի ընտրական գործընթացների հանդեպ պետք է բարձրանա նրա վստահությունը: Մեզ համար շատ կարևոր է նաև միջազգային հնարության գնահատականը, ապրիլի 2-ը պետք է լինի վստահության ամրապնդման օր: Ու դրան մենք պետք է հասնենք միասնաբար:
Մինչ քարոզարշավը խոսվում էր այն մասին, թե հիմնական պայքարը ծավալվելու է ռեյտինգային թեկնածուների միջև, և ՙմարտադաշտում՚ կհայտնվեն կուսակից ընկերները: Կար մտավախություն, որ ընտրապայքարը կարող է սրվել Լոռու մարզում, ուր ինչպես հայտնի է, ՀՀԿ-ի ռեյտինգայիններն ուժեղ և հեղինակավոր անձիք են: Այսօր կա՞ նման լարվածություն:
-Պետք է փարատեմ բոլոր անհանգստությունները, թող բոլորը իմանա, որ ՀՀԿ-ի ռեյտինգային թեկնածուները մղում ենք զուտ թիմային պայքար: Իհարկե, ամեն մեկն ունի անձնապես ձայներ վաստակելու խնդիր, բայց դա ամենևին չի խանգարում մեր համատեղ թիմային պայքարին: Առավել ևս, չի խանգարում մեր անձնական, մտերմիկ հարաբերություններին: ՀՀԿ-ի բոլոր թեկնածուների միակ նպատակը մեր կուսակցության համար անհրաժեշտ ձայներ ապահովելն է:
ՙԵլք՚ դաշինքի առաջին համարը՝ Էդմոն Մարուքյանը մեղադրանքներ հնչեցրեց, թե ինչ-որ անձիք պատռում են դաշինքի պաստառները: Ի վերջո, պարզվե՞ց, թե ովքեր են այդ արարքի հեղինակները:
-Միանշանակորեն դատապարտելի, անթույլատրելի արաք է, եթե կան անձիք, որոնք դա արել են միտումնավոր, պետք է պատժվեն: Որքան տեղյակ եմ խնդրով զբաղվում են իրավապահ մարմինները ու ամեն ինչ ջրի երես դուրս կգա:
Բայց այստեղ կա նաև մեկ այլ հանգամանք: Որոշ քաղաքական ուժեր, երբ տեսնում են, որ չեն կարողանում իրենց հանդեպ այլ կերպ հետաքրքրություն առաջացնել, չեն կարողանում մարդկանց ուշադրությունը դեպի իրենց գրավել, դիմում են նման գործելաոճի: Ես դրանք համարում եմ մանր-մունր, ճղճիմ քայլեր: Որևէ լուրջ քաղաքական գործիչ կամ ուժ չի կարող իրեն թույլ տալ պատառոտել քաղաքական հակառակորդի պաստառները: Գուցե սա պարզ հնարք, մարտավարությո՞ւն է Ելքի կողմից սեփական իմիջը բարձրացնելու համար: Փաստորեն, ուզում են հասարակությանն ասել, եթե մեր պաստառները պոկում են, ուրեմն մենք լուրջ ուժ ենք ու մեր դերը մեծ է:
Երբ ուշադիր հետևում ես, առավել համոզվում ես, որ պաստառների պատմությունը քաղտեխնոլոգիաների շարքից է: Տեսեք ինչ են ասում ՝ ժողովուրդ ձեր տված փողով պատրաստված պաստառներն են պոկել, ուրեմն, կանգնիր մեր կողքին ու քո ձայնը մեզ տուր, դարձիր մեր համակիրը: Սա, բնականաբար, քաղտեխնոլոգիա է: Իրենք տեսնում են, որ ՀՀԿ թեկնածուների ուժը, հնարավորությունները մեծ են, դրա համար փորձում են նման հնարքներ բանեցնել:
-Գուցե նպատակ կա ՏԻՄ ընտրություններից պահպանված լարվածությո՞ւնը տարածել այս քարոզարշավի վրա:
-Գուցե, թող իրենք մեկնաբնեն իրենց մարտավարությունը: Անկեղծ ասած, ես այնքան էլ մեծ ուշադրություն չեմ դարձնում, բայց նկատվել է հետևյալը. ԵԼՔ-ն իր քարոզչական պաստառները փակցնում է գրեթե ամենուր, այդ թվում և այլ քաղաքական ուժերի շտաբերի պատերին, պատուհաններին, նույնիսկ մրցակից քաղաքական ուժի ռեյտինգային թեկնածուների շենքերի, բնակարանների պատերին: Արդյո՞ք սա դիտավորությամբ արված քայլ չէ՝ ինտրիգ սրելու համար: Եթե իրենց մարտավարությունն այլ քաղաքական թիմերի, պատգամավորության թեկնածուների շտաբերի պատերին սեփական նկարները փակցնելն է, ուրեմն նույն մարտավարությամբ մենք էլ կարող ենք ասել՝ միտունավոր փակցնում եք, հետո պատռում, որպեսզի այդ կերպ ձեզ գովազդեք:
Չեմ կարծում, որ մեր ընտրողը հայտնի քաղաքական գործիչներին, ուժերին պետք է ճանաչի պաստառներով ու նկարներով: Ես չեմ ուզում որևէ մեկին նեղացնել, բայց չեմ կարող չասել, որ սա մերժելի ոճ չէ:
-Վանաձորում վախի մթնոլորտ կա՞, ինչի մասին օրեր առաջ հրավիրած իր ասուլիսում հայտարարեց Մարուքյանը, ասելով, թե դա այնքան սրված է, որ իրենք փոխել են անգամ իրենց մարտավարությունը՝ հանրահավաքներ չեն անում, որպեսզի ՙծգլները՚ մարդկանց չթիրախավորեն:
-Բոլոր քաղաքական ուժերը հանգիստ իրականացնում են իրենց քարոզարշավը: Ինքս այցելում եմ գյուղեր, քաղաքներ ու չեմ նկատում վախեցած մարդկանց: Ի՞նչ վախի մթնոլորտի մասին է խոսքը: Գուցե իրե՞նք են վախեցած, որ չեն կարողանալու հավաքել անհրաժեշտ ձայները ու այդ վախից նման հայտարարություններ են անում: Գիտեք, այդպիսի խոսակցություններն ինձ համար ուղղակի անհասկանալի են: Խորհուրդ կտամ զբաղվեն իրենց ծրագրային դրույթների ներկայացմամբ, լուրջ քարոզչություն անեն, ոչ թե փորձեն ուրիշների վրա ստվեր գցել ու ինչ-որ դիվիդենտներ շահել: Ի դեպ, ՙԵլք՚ դաշինքի ներկայացուցիչները քննադատում են բոլորին, նաև ընդդիմությանը: Մի՞թե սա արդյունավետ մարտավարություն է, կարծում եմ՝ ոչ:
-Ընտրակաշառքը կանխելու նպատակով հստակ կետեր ամրագրվեցին նոր ընտրական օրենսգրքում, այդպիսիք ավելի վաղ կային նաև քրեական օրենսգրքում: Մինչդեռ այս ընտրություններում այդ մասին չափից շատ է խոսվում, և ընտրվողն է խոստումներ շռայլում, և ընտրողն ունի մեծ ակնկալիքներ:
-Յուրաքանչյուր ընտրություներից առաջ տարածվում են նման խոսակցություններ: Հավատացեք, դրանց գերակռող մասն, ընդամենը, խոսակցություն է: Ավելի շատ փորձ է արվում աղմուկ բարձրացնել, իսկ աղմուկի հեղինակը հիմնականում ընդդիմությունն է: Շրջանառում են լուրեր, թե իշխանությունն է գումարներ խոստանում և բաժանում: Դա անում են միտումնավոր, որպեսզի մարդկանց մոտ սին սպասումներ առաջացնեն, որպեսզի գումար ստանալու սպասում ունեցողները հիասթափվել ու չմասնակցել ընտրությանը: Մեր ժողովուրդը պետք է լինի զգոն, նաև ձեռնպահ մնա ձավարով, բրնձով, 5000 դրամով քաղաքական խորհրդարան ձևավորելուց: Ես գյուղեգյուղ, տնետուն շրջելով մարդկանց հորդորում եմ՝ հանկարծ տուք չտաք ընտրակաշառքին, ընտրախոստումներին, չվաճառեք ձեր ձայնը: Եթե մենք այդ ուղով ենք գնալու ու այս մտածողությամբ ենք ձևավորելու մեր խորհրդարանը, ապա լրջորեն վտանգելու ենք մեր երկրի ապագան: Դա ուղղակի անթույլատրելի է:
Պարոն Բաղդասարյան, նախօրեին հրավիրված ասուլիսներց մեկի ժամանակ ձեր հասցեին քննադատություն հնչեց, թե ֆեյսբուքյան էջում տեղադրել եք ձեր կատարած բարեգործությունների մասին պատմող մի տեսահովոլովակ: Եվ դա համարվեց ոչ ճիշտ քայլ, ի՞նչ կասեք այս առնչությամբ:
-Նման հայտարարությունը, կարծում եմ, եղել է չիմացության կամ ոչ ճիշտ տեղեկացվածության հետևանք, հակառակ դեպքում ես դրանում միտում եմ տեսնում: Ինչո՞ւ, որովհետև ցանկացած պատգամավորության թեկնածու իր ժողովրդին պետք է ներկայանա իր արած գործերով, այսինքն՝ պետք է լինի հաշվետու սեփական ժողովրդին: Իսկ հաշվետու լինելը պարտադիր պայման է յուրաքանչյուր քաղաքական գործիչի համար: Եվ ես խնդրում եմ, որ մարդիկ իմ ներկայացրած հաշվետվությունը հստակ տարբերակեն էժանագին քայլերից: Բնականաբար, նման հաշվետվությամբ հանդես չեն կարող գալ գործ չանողները: Ինձ այսօր քննադատում են գործ անելու համա՞ր: Խորհուրդ կտամ ոչ թե գործ անողին քննադատել, այլ անգործներին ու նրանցից էլ պահանջել հաշվետվություն:
20 տարվա աշխատանք, բարեգործություն, որը ես արել եմ լուռ, առանց ցուցադրության: Բայց գալիս է նաև մի պահ, երբ հարկավոր է լուսաբանել արած-չարածդ ու այն ներկայացնել գնահատողին՝ ժողովրդին: Այսօր այդ հաշվետվության ու գնահատման ժամն է:
ԱՐՄԻՆԵ ՍԻՄՈՆՅԱՆ

Տպելու տարբերակ Տպելու տարբերակ

Դիտել Politics, Լրահոս, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն