Գլխավոր » TOP, Լրահոս, Քաղաքականություն

ՀՀԿ-ական լինելը կազդի իմ վարկանիշի վրա, քանի որ հանրության մեջ կա լուրջ դժգոհություն. Կարեն Կարապետյան

Մարտ 1, 2017թ. 00:13
Կարեն-Կարապետյան

Լրագրողների շուրջկալում հայտնվել էր ՀՀԿ խորհրդարանական խմբակցության պատգամավոր Կարեն Կարապետյանը, նրան ուղղված հարցերը ընդգրկեցին քաղաքական ողջ սպեկտորը՝ ՀՀԿ-ի ներսում ակտիվ փոքարամասնության շարժիչ դերից մինչև կեղծ ընդդիմություն, ռեյտինգային համակարգի տխուր հետանքների կանխատեսումից մինչև ժողովրդի սոցիալական ծանր վիճակ:
-Պարոն Կարապետյան, այլևս պարզ է, որ ՙռեյտինգային՚ կոչվող ցուցակների առկայությունը հանգեցնելու է ներկուսակցական լուրջ հակասությունների, շահերի բախման: Մտավախություն չունե՞ք, որ դրա արդյունքում կարող է լարվածություն առաջանալ ձեր և կուսակից գործընկեր, ՀՀԿ խմբակցության ղեկավար Վահրամ Բաղդասարյանի միջև, քանի որ երկուսդ էլ առաջադրվել եք Լոռու մարզում ու հանդես եք գալու որպես մրցակիցներ:
-Մեր միջև երբեք պայքար չի եղել ու ոչ չի կարող լինել: Մենք ընկերներ ենք: Եվ հետո ձայները մենք չենք կիսում, այլ հանրությունը: Ընտրողը կգնա ընտրության ու կկողմնորոշվի սեփական պատկերացումների համաձայն:
-Հասցրել ե՞ք շոշափել ժողովրդի տրամադրությունները՝ ձեզանից ո՞ր մեկի շանսերն է ավելի բարձր: Եվ կա՞ իրար միջև տարածքների բաժանում, թե՞ մեկմեկու խանգարելու եք:
-Ես դեռ չեմ զբաղվել ժողովրդի տրամադրությունները շոշոփելով, ընտրաշավը կսկսվի՝ կզբաղվենք: Դաշտը ազատ է բոլորը պայքարում են, բայց ոչ թե պայքարում են իրար դեմ, այլ ամեն մեկը պայքարում է իր համար: Ես քարոզչություն կիրականցնեմ բոլոր այն տեղերում, որտեղ գտնում եմ հարմար, ինչպես որ դա կանեն մնացած բոլոր կուսակցություններն ու անհատները: Իսկ տարածքների բաժանում չկա: Խանգարել՝ չի կարող լինել, իմ սկզբունքը հետևյալն է. ես որևէ մեկի դեմ չեմ աշխատելու: Լոռին ունի 5 շրջան, 120 գյուղ, այսինքն բոլորս, նորմալ, մարդավարի պետք է գնանք ընտրությունների: Ես ընդամենը աշխատելու եմ ՙկողմ՚-ի տրամաբանությամբ և հանրությանը ներկայացնելու եմ այն, ինչ արել եմ այս 20 տարիների ընթացքում: Ներկայացնելու եմ իմ անցյալը: Բոլորդ գիտեք, որ ես որքան կարողացել եմ իմ ընտանիքի համեստ հնարավորությունները օգտագործել եմ ի նպաստ մեր ժողովրդի ու դա արել եմ լռակյաց, առանց ավելորդ էմոցիաների: Քարոզարշավի ընթացքում նաև ներկայացնելու եմ իմ այսօրվա մոտեցումները, իմ քաղաքական ու տնտեսական տեսլականը ու թե ինչպե՞ս եմ պատկերացնում մեր երկրի վաղվա օրը: Եվ հանրությունը կորոշի՝ աջակցե՞լ ինձ, թե՞ ոչ:
Շուտով ես հանդես կգամ նաև իմ առաջին հայտարարությամբ, որը խարսխված կլինի՝ ՙես որևէ մեկի դեմ չեմ աշխատելու՚, սկզբունքի վրա: Ես իմ մեսիջը կուղղեմ նաև իմ ընտրողներին, նաև ընդդիմությանն ու դիմությանը ու մեր կուսակցության անդամներին, որ այս ընտապայքարում պետք չէ բևեռացնել հանրությանը: Ընտրությունը՝ ընտրություն, մանդատը՝ մանդատ, բայց այդ մանդատն արժեք չունի, եթե ընտրապայքարի ընթացքում մեր հանրությանը ծայրահեղորեն բևեռացնելու ենք: Դուք շատ լավ հասկանում եք դրա վտանգավոր հետևանքները: Ունենք արտաքին վտանգներ, մարտահրավերներ, գիտեք, թե ինչպիսի տնտեսական վիճակում ենք գտնվում, և եթե մենք մեր հանրությանը երկխոսության դաշտ տանելու փոխարեն տանենք անտագոնիզմի՝ անհաշտ պայքարի դաշտ, ապա ցանկացած ծրագիր հետագայում շատ դժվար կլինի իրականացնել:
– Բայց չե՞ք կարծում, որ ռեյտինգային համակարգը հենց այդ բևեռացմանն է տանում:
– Անկեղծ ասած, այդ նախագիծը քննարկելու ժամանակ ես եղել եմ այն անձանցից մեկը, որը դեմ է արտահայտվել այդ մոդելի ներդրմանը: Ներկուսակցական քննարկումների ժամանակ ես բացատրել եմ իմ պատկերացումները: Բայց ընդունվեց այդ համակարգը, ինչը նշանակում է, որ իմ պատկերացման, դիրքորոշման կողմնակիցները քիչ էին, ու հիմա ունենք այն, ինչ ունենք: Ես ասել եմ, որ խառնաշփոթ է ստեղծվելու: Կարծես թե, սոված ժողովուրդն էլ ուրիշ հոգս, խնդիր չունի, հիմա էլ բոլորս գնալու ենք, ժողովրդի խոսքով ասած՝ մարդկանց իրար դեմ հանենք: Հակասություններ են լինելու, հետո մենք թողնելու ենք գանք ու էստեղ հանգիստ նստենք, իսկ մարդիկ՝ ազգ ու բարեկամ, իրար թշնամի են դառնալու: Ոչ մի մանդատ այդ արժեքը չունի։ Դուք շատ լավ գիտեք, հինգ անգամ ես ընտրվել եմ այդ ընտրատարածքից, ու նրանք ովքեր ինձ լավ են ճանաչում գիտեն, որ մանդատ ստանալն ինձ համար երբեք ինքնանպատակ չի եղել: Մանդատը ես ընդամենն օգտագործել եմ տարածքների բնակչությանն իմ անձնական հնարավորությունների շրջանակում օգնելու համար:
-ՀՀԿ-ի շանսերն ինչպե՞ս եք գնահատում: Կասկածներ չունե՞ք, որ կարող է բացարձակ մեծամասնություն չունենալ:
-Այսօր այդ մասին խոսելը ճիշտ չէ, ուսումնասիրություններ չունեմ, կարծում եմ, ունենք որոշ հնարավորություն հաղթահարելու արգելքը, ինչն էլ կարող է կորիզ, հիմք դառնալ խորհրդարնական մեծամասնության ձևավորման համար: Ընտրություններում հանրությունն է որոշողը: Իսկ այսօր ես կառաջարկեմ բոլորին՝ ընդդիմության ու դիմությանը, մեծ-մեծ խոսելու փոխարեն Երևանից դուրս գալ ու գնալ մարզեր և սեփական աչքերով տեսնել ժողովրդի սոցիալական ծանր վիճակը: Իսկ ժողովրդի մոտ կա շատ մեծ դժգոհություն իշխանությունից, և՜ մեծ հիասթափություն ընդդիմությունից: Իսկ թե ո՞ր ուժը կկազմի մեծամասնություն՝ հանրությունն է որոշողը: Ինչո՞ւ եք ընտրում իշխանությանը, խորհուրդ կտամ չընտրեք: Ովքեր համարում են, որ իշխանությունը ճիշտ չի գործում ու գտել են մեկ այլ շարժիչ ուժ, ուրեմն՝ թող ընտրեն նրան:
-Իսկ ի՞նչ դեր կունենա ընտրակաշառքը:
-Մարդիկ այսօր այդքան միամիտ չեն, կարող են վերցնել ընտրակաշառք, բայց քվեարկել այն թեկնածուի կամ ուժի օգտին ում ուզում են: Այսօր հանրությունը, հասկանալի պատճառներով, շատ մեծ դժգոհություն ունի բոլոր քաղաքական ուժերից: Ինչպես ասացի՝ դժգոհ է նաև ընդդիմությունից, քանի որ կան պատվիրված ընդդիմադիրներ, որոնք քարոզարշավի ժամանակ գնում են հանրության մոտ, սուտ խոստումներ են տալիս, բայց գալիս են խորհրդարան ու այլ ՙբանով՚ են զբաղվում: Իսկ մեր ժողովուրդն այս ամենը կամաց-կամաց սկսում է նկատել ու հասկանալ:
-Ընտրությունները բոյկոտելու մարտավարությունը ճի՞շտ եք համարում:
-Ոչ, բոյկոտը ի՞նչ կարող է տալ, ոչինչ: Հակառակը, պետք է մասնակցել, քանի որ համապետական ընտրությունները միակ շանսն են, որի ժամանակ հանությունը կարող է իր խոսքն ասել ու իր քվեարկությամբ, եթե հարկ է համարում, նաև պատժել քաղաքական ւոժերին, այդ թվում իշխանության ներկայացուցիչներիս: Չնայած ես ինձ այդքան էլ իշխանական, կուսակցական գործիչ չեմ համարում, այլ պետական գործիչ եմ համարում, քանի որ շատ հաճախ կուսակցականները, ելնելով նեղ կուսակցական շահերից, այս կամ այն խնդիրների շուրջ երբեմն այնպիսի մոտեցում են ցուցաբերում, որը հակասում է պետության շահերին: Դրա համար ցանկացած որոշում կայացնելիս ես մշտապես առաջնորդվում եմ միայն պետական շահերով:
-Ձայների ստացման առումով՝ ՀՀԿ-ական լինելն այս ընտրություններում ձեզ կօգնի՞, թե՞ կխանգարի:
-Կխանգարի, որովհետև հանրության մեջ կա լուրջ դժգոհություն և դա, բնականաբար, իր ազդեցությունը կթողնի նաև իմ վարկանիշի վրա: Դա բոլորն էլ հասկանում են: Եթե հանրության մեջ կա մեկ միլիոնից ավելի ընչազուրկ խավ, ես ասում եմ պաշտոնական թվեր, այդ երկրում իշխանությանը չեն կարող սիրել: Իսկ ստեղծված իրավիճակի պատճառները և՛ օբյեկտիվ են, և՜ սուբյեկտիվ: Օբյեկտիվ պատճառներից է տարիներ շարունակ իրականացված մասսայական թալանը, ինչի մասին ես առաջին անգամ չէ, որ բարձրաձայնում եմ: Թալանջիների ձեռքերը պետք է բռնել, պետական համակարգում նման մարդիկ չպետք է տեղ ունենան: Ուզում ե՞ն լավ ապրել, դրա համար կա բիզնես դաշտ, խնդրեմ, գնացեք ձեր ուղեղն ու ձեր ներուժն այնտեղ աշխատացրեք, եթե, իհարկե, խելոք եք, բայց ոչ թե պետական ռեսուրսները կամ գործիքներն օգտագործեք ձեր անձնական շահերը սպասարկելու համար: Այդպիսի մարդիկ պետք է ընդհանրապես քաղաքական դաշտից դուրս գան: Բոլորս պետք է սեղմենք նրանց շուրջ օղակը, և առաջին սեղմողները դուք՝ լրատվամիջոցներդ եք լինելու:
-Լինելով իշխանություն ձեր հայացքներով դուք ավելի շատ ընդդիմադիր գործիչ չե՞ք:
-Ես ընդդմադիր չեմ: Բայց ցանկացած կուսակցության մեջ պետք է լինեն պրոգրեսիվ ու ռեգրեսիվ ուժեր ու դա շատ կարևոր է հե՜նց այդ կուսակցության համար: Քաղաքական դաշտում ոչ թե միայն միջկուսակցական պայքար պետք է լինի, այլև նեկուսակցական պայքար: Հակասությունների պայքար և միասնություն, սա է որ տանում է զարգացման: Ցանկացած կուսակցության մեջ կան ուժեր, որոնց ձեռնտու չէ զարգացումը, բայց կա նաև պրոգրեսիվ փոքրամասնություն, որն ամեն ինչ անում է ապահովելու այդ տեղաշարժը:
-Այսինքն, դուք ՀՀԿ-ի առողջ , պրոգրեսիվ փոքրամասնություն եք ներկայացնում:
– Չէի ասի՝ փոքրամասնություն եմ, կամ մեծամասնություն, ես խոսում եմ այն, ինչ մտածում եմ, խոսում եմ այն, ինչի շուրջ բազմիցս հրապարակայնորեն արտահայտվել եմ: Եվ իմ կարծիքն արտահայտել եմ այն ժամանակ, երբ տեսել եմ, որ ինչ-որ բան ճիշտ ընթացքով չի գնում: Ես անհատ եմ, որն ունի իր սեփական պատկերացումներն ու անկաշկանդ խոսելու է իր տեսածի մասին:
-ՀՀԿ-ականները լավատեսորեն են տրամադրված վարչապետ Կարեն Կարապետյանի աշխատաքի հանդեպ, դուք ինչպե՞ս եք այն գնահատում:
-Ես միանում եմ այդ լավատեսությանը և ոչ միայն հույսեր ունեմ, այլև շատ լավ ճանաչելով Կարեն Կարապետյանին գիտեմ, որ ձգտելու է ամեն ինչ անել այնպես, որ երկրում տեղաշարժ լինի: Շատ ուժեր կլինեն, որոնց ձեռնտու չէ տեղաշարժը, նրանք անշարժ վիճակի կողմնակիցներ են: Կլինեն խանգարողներ, որովհետև մեկին մի բան կարող է դուր չգալ, մյուսին՝ մեկ այլ բան, բայց դա ճիշտ մոտեցում չէ: Իսկ ես կլինեմ վարչապետին օգնողներից մեկը: Ես շատ եմ ուզում, որ նրա սկսած գործերը նորմալ ընթանան, որովհետև դրանք ուղղված չեն անձնական բարեկեցության ստեղծմանը, վարչապետի աշխատանքի դրական արդյունքներից շահելու է մեր երկիրն ու ժողովուրդը:
Պատրաստեց՝ ԱՐՄԻՆԵ ՍԻՄՈՆՅԱՆԸ

Տպելու տարբերակ Տպելու տարբերակ

Դիտել TOP, Լրահոս, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն