Գլխավոր » TOP, Լրահոս, Հարցազրույցներ, Քաղաքականություն

Այն պաշտոնյաները, որոնք չեն անցել քաղաքական քավարանով՝ չեն կարող դառնալ ընդդիմադիր.Կարեն Անդրեասյան

Հունվար 26, 2017թ. 14:22
Կարեն Անդրիասյան

Հարցազրույց նախկին օմբուդսմեն, «Համախմբում» կուսակցության վարչության անդամ ԿԱՐԵՆ ԱՆԴՐԵԱՍՅԱՆԻ հետ

-Դեռ ամիսներ առաջ Վարդան Օսկանյանը հայտարարեց, թե «Համախմբում»-ը ընտրություններին կնախընտրի մասնակցել դաշինքով, որ «պատրաստ ենք մեր անձնական հավակնությունները մի կողմ դնել եւ շարժվել համընդհանուր շահով»: Սրան հաջորդեցին Օսկանյան-Օհանյան հանդիպումները, հետո խոսվեց Օհանյանի շուրջ հնարավոր դաշինքի ստեղծման մասին: Ինչո՞ւ այդ փուլում հրապարակավ չարտահայտեցիք ձեր անհամաձայնությունը ու միայն այսօր, այն էլ ֆեյսբուքով հայտարարում եք, թե՝ համաձայն չեք, որ դաշինքը գլխավորի Սեյրան Օհանյանը:
-Առաջին իսկ պահից, երբ «Համախմբում» կուսակցության վարչությունում եղավ խոսակցություն, որ կարող է մեր ընդհանուր քաղաքական թիմի առաջնորդությունը փոխվել ու որպես դաշինքի ղեկավար հանդես գա Սեյրան Օհանյանը, իմ առաջին իսկ նախադասությունը եղել է հետևյալը՝ ես ունեմ լուրջ վերապահում այդ կապակցությամբ: Դրան հաջորդած վարչության նիստերում ևս ես անդրադարձել եմ այդ թեմային, կրկնել նույն միտքը: Հիմա չեմ ուզում մտնել մանրամասների մեջ, որովհետև այդ դեպքում կստացվի, որ ես փակ նիստի բովանդակությունն եմ բացում, և դա կոռեկտ չի լինի, բայց ես սկզբից ևետ դեմ եմ եղել այդ որոշմանը:
Ինչո՞ւ, գուցե որպես նախկին օմբուդսմեն նախկին ՊՆ նախարարի հետ կապված տիրապետում եք այնպիսի փաստերի, որոնք ձեզ ոչ մի կերպ թույլ չե՞ն տալիս համաձայնել Օսկանյան-Օհանյան համագործակցությանը, առավել ևս վերջինիս կողմից դաշինքը ղեկավարելու մտքին:
-Եթե նույնիսկ որպես օմբուդսմեն չունենայի տեղեկատվություն ու պատկերացումներն այս կամ այն պաշտոնյայի աշխատանքի վերաբերյալ, ապա նույն կարծիքին կլինեի նաև որպես շարքային քաղաքացի, հայ մարդ, որը հետևում է քաղաքական գործընթացներին: Իսկ իմ կարծիքը հետևյալն է՝ բոլոր այն պաշտոնյաները, որոնք չեն անցել քաղաքական քավարանով չեն կարող դառնալ ընդդիմադիր, առավել ևս չեն կարող լինել իշխանափոխության նկրտումներ ունեցող շարժման առաջնորդ:
Վարդան Օսկանյանը ևս նախկին պաշտոնյա է, ինչպե՞ս եղավ, որ կանգնեցիք նրա կողքին, մտաք նրա հիմնադրած կուսակցության շարքերը, այն դեպքում, երբ պարոն Օսկանյանն էլ իրավական քավարանով չի անցել, ավելին՝ շատ քաղաքական գործիչներ նրան համարում են մարտի 1-ի պատասխանատու ու հայտարարում ՝ Օսկանյանի հետ ճանապարհ չունեն անցնելու:
-Կանգնեցի պարոն Օսկանյանի կողքին, որովհետև նա ութ տարի անցել է քաղաքական քավարանով, նա ութ տարի եղել սկզբունքային ընդդիմադիր քաղաքական գործիչ: Իսկ իրավական քավարանով՝ իմ խորին համոզմամբ, ընդհանրապես չունի անցնելու խնդիր: Ինչո՞ւ, որովհետև նույնիսկ նրա ամենամեծ թշնամիները՝ իշխանությունում և այլուր, չեն կարողանում բերել թեկուզ մեկ փոքր կասկած նրա՝ մարտի 1-ի պատասխանատուն լինելու և կոռումպացվածության վերաբերյալ: Հետևաբար, Վարդան Օսկանյանի դեպքում իրավական քավարանի մասին խոսք լինել չէր կարող, երբ ես միանում էի Համախմբմանը, իսկ քաղաքական քավարանով, ինչպես ասացի՝ նա ութ տարի առաջ է անցել: Ես չեմ պատրաստվում լինել ոչ օհանյանական, ոչ էլ հակաօհանյանական, մարդը կարող է իր պաշտոնավարած շրջանում ունենալ շատ արժանիքներ, բայց միևնույն է, եթե նա չի անցել քաղաքական քավարանով, չի կարող ընդունելի լինել ընդդիմադիր դաշտում:
-Դուք ևս եղել եք նախկին պաշտոնյա, քավարանով անցնելը պետք է, որ նաև ձեր վրա տարածվի:
-Այո, խոսքը նաև իմ մասին է՝ որպես նախկին պաշտոնյայի: Այնպես որ, կարծում եմ, որ և՜ ես, և՜ մյուս բոլոր պաշտոնյաները պետք է անպայման անցնենք քաղաքական քավարանով: Ինչ վերաբերում է իրավական քավարանին, ապա նրանք, ովքեր կասկածվում են կամ իսկապես մաս են կազմել կոռուպցիոն գործարքների, պետք է անցնեն նաև իրավական քավարանով: Սա իմ վրա չի տարածվում:
Ձեր անհամաձայնությունն արտահայտելով Սեյրան Օհանյանի անձի առնչությամբ, ո՞ւմ եք տեսնում դաշինքի ղեկավարի դերում: Գուցե նաև առհասարակ դե՞մ եք, որ «Համախմբում»-ը ընտրություններին մասնակցի դաշինքային ձևաչափով:
-Ես երբեք դեմ չեմ եղել դաշինքների կազմմանը, բայց դրա հետ մեկտեղ կողմ եմ նրան, որ դաշինքներում գերակա դիրք ունենան ամենամաքուր հետագիծ ունեցող մարդիկ: Այդ մարդկանց շարքում ես կարող եմ առաջարկել Զարուհի Փոստանջյանին, Արմեն Մարտիրոսյանին, Ժիրայր Սեֆիլյանին, Ալեք Ենիքգոմշյանի, այդ թվում նաև Վարդան Օսկանյանին: Թող այս մարդկանցից ընտրվեր, նաև իմ քվեարկությամբ, դաշինքի առաջնորդը: Իսկ երբ արդեն իսկ կա որոշում, ու այն՝ կոնկրետ մարդու տեսքով պետք է փաթաթվի նաև ինձ, ես իրավունք ունեմ արտահայտելու իմ դիրքորոշումը՝ լինել դեմ կամ կողմ: Հետևաբար, ես արտահայտեցի իմ կարծիքը՝ դեմ լինելով Սեյրան Օհանյանի տարբերակին:
Թվեցիք մարդկանց անուններ, որոնք դեռ ամիսներ առաջ են հայտարարել, թե չեն մասնակցելու ընտրություններին ու նախընտրում են հեղափոխական ճանպարհը: ՙՀամախմբում՚-ը նրանց հետ բանակցե՞լ է նախընտրական համագործակցության շուրջ:
-Նրանցից ոմանց հետ, այո, եղել են քննարկումներ, խոսքս մասնավորաբար, ՙԺառանգության՚ անդամների մասին է, իրենք էլ երկկողմ հանդիպման մասին չեն թաքցրել: ՙՀամախմբում՚-ը ունեցել է որոշակի քաղաքական համակրանք օրինակ Ալեգ Ենիքգոմշյանի հանդեպ, ում հետ մեր վարչության առանձին անդամներ հանդիպումներ են անցկացրել: Այնպես որ, քննարկումներ եղել են, այլ հարց է, թե ո՞ւր կարող է հասնել կամ ինչպիսի՞ արդյունք այն կարող է ունենալ:
Գիտեք, նախ պետք է մենք ճիշտ կողմնորոշվենք մեր գործընկերների ընտրության հարցում, ու դրանից հետո կամ հնարավոր կլինի իրենց համոզել գալ, միանալն մեզ ու ընտրությունների միջոցով ժողովրդին տանել իշխանափոխության, կա՜մ իրենք կարող են մեզ համոզել՝ գնալ հեղափոխական ձևաչափով: Ի դեպ, ասեմ, որ ես սկսում եմ ավելի հակվել հեղափոխականին:
-Ի՞նչ եք հասկանում հեղափոխական ձևաչափ ասելով՝ դուրս գալ փողոց, ժողովրդին տանել հրապարակներ, ճանապարհներ փակել, հա՞: Չե՞ք համոզվել, որ մեր ժողովուրդը հոգնել է հեղափոխականներից, հոգնել է ՙպայքար, պայքար մինչև վերջ՚ դրոշը պարզածներից, նրանց անարդյունավետ քայլերից, փոխարենն ուզում է լսել իրատեսական առաջարկներ, տեսնել լուծումներ ցույց տվող ուժերի ու գործիչների:
– Ի՞նչ եմ հասկանում հեղափոխական ձևաչափ ասելով, հարցին կպատասխանեմ այսպես. ես հեղափոխական պլան չունեմ, եթե որոշվի նման ձևաչափով ընթանալ, ապա այդ ժամանակ նաև կորոշենք, թե ո՞ր փողոցում ու ինչպե՞ս, ո՞վ, ո՞ւմ հետ հավաքվել: Եթե ընտրական գործընթացները չբերեն ճիշտ հանգուցալուծման ու հասարակության դժգոհ զանգվածը ընտրություններում չտեսնի արդարացի ընթացք, ապա լինելու են ցավալի հեղափոխական շարժեր, որոնք լուրջ վնաս կհասցնեն պետությանը: Կա՛մ պետք է լինի նորմալ քաղաքական ձևաչափ, կամ կգործի հեղափոխականը, իսկ եթե սա էլ արդյունք չտվեց՝ կգործի արտագաղթի ձևաչափը: Հիմա քաղաքական էլիտան պետք է մտածի՝ ո՞ր ձևաչափով գնալ, որպեսզի երկիրը չհասնի ծայրակետին:
-Վարդան Օսկանյանը «Համախմբում»-ը ստեղծելիս ասաց, թե գալիս են քաղաքական դաշտում նոր քաղաքական մշակույթ ներմուծելու ՝ սկսած վարվելակերպից, գալիս են մերժելու հայհայոխոս, ամեն ինչ սևացնող գործիչի կերպարը, և ամենևին կողմնակից չեն ջարդել, փշրելու հեղափոխական գործելոճին: Բայց պարզվում է հանձին ձեզ «Համախմբում»-ում կան Օսկանյանի նախանշած ճանապարհին դեմ գնացող գործիչներ:
-Ես հայհոյախո՞ս եմ՝ արդյոք: Ես ևս, բնականաբար, կողմնակից եմ քաղաքական ձևաչափի, ընտրական գործընթացների կողմնակիցն եմ, ինչը պետք է լինի հույսեր արթնացնող և ոչ թե հանգեցնի հակառակին՝ հուսախաբության ու սկզբունքների խառնակույտի: Ես հեղափոխականության կողմնակիցը չեմ, բայց այն կարող է լինել պարտադրված, ծայրահեղ լուծում, եթե հասարակությանը հասցնեն նման վիճակի: Այդ դեպքում մեզնից անկախ խոր հիասթափությունը կարող է հանգեցնել կա՜մ արյան, կա՜մ արտագաղթի: Սա էլ թող լինի իմ չարագուշակ կանխատեսումը:
Փաստորեն, նաև հիասթափված եք, որ ստեղծվող դաշինքում ընդգրկված են՝ ինչպես դուք եք գրել ֆեյսբուքում՝ « աշխարհաքաղաքական հակադիր կողմնորոշումներ» ունեցող, «արժեքային ծայրահեղ տարբեր բևեռներում գտնվող» ուժեր, անձինք: Ի դեպ, այս երևույթը արդարացիորեն քննադատվում է ու անգամ ստացել է իր անունը՝ «քաղաքական աջափսանդալ»:
-Գիտեք, ես դեմ չեմ, որ տարբեր դիրքորոշումներ ունեցողներ համախմբվեն հանուն իշխանափոխության, հանուն գլոբալ հարցերի լուծման՝ կոռուպցիայի դեմ պայքարից մինչև արցախյան հիմնախնդրի արդարացի լուծում: Բայց միևնույն ժամանակ, երբ ստեղծվող դաշինքում կա աշխարհաքաղաքական խառնաշփոթ ու չկա հստակություն, թե ո՞րն է առաջնայինը, ո՞ւմ ասելիքն է լինելու որոշիչը, սա կարող է ցանկացած դաշինքի համար լինել շատ վտանգավոր, ընդհուպ մինչև կազմալուծող: Ինչո՞ւ եմ ես կարևորում դաշինքի առանջորդի անձը. եթե դաշինքում հավաքվեն տարբեր կարծիքներ ունեցող մարդիկ, սակայն ես վստահեմ առաջնորդին, ապա կիմանամ, որ բազմակարծության մեջ, ի վերջո, կլինի լավագույն ընտրությունը: Իսկ եթե ես առաջնորդի հարցում ունենամ կասկածներ, ապա ձեր ասած «աջափսանդալը» կդառնա շատ վտանգավոր: Այսօրվա իշխանության վերարտադրությունից ավելի վտանգավոր բան քիչ եմ պատկերացնում, որ կա, բայց, այո, նաև չեմ ուզում, որ ի սկզբան լինի վտանգ, որ իշխանափոխություն անող դաշինքը պարտության մեծ հավանականություն ունենա, կամ էլ, պատկերավոր ասած՝ դևին սպանողը հաղթանակի պարագայում ինքը դև դառնա:
-Սեյրան Օհանկյանի լիդերության հարցը ձեզ համար կարող է լինել այնքան սկզբունքային, որ որոշեք անգամ դո՞ւրս գալ «Համախմբում»-ից:
-Մի բան գիտեմ, որ ես չեմ լինի այն դաշինքում, չեմ մասնակցի այն քաղաքական միավորման աշխատանքներին, որը չի համապատասխանի իմ պատկերցումներին և չի փարատի իմ բոլոր վերապահումները:
Ձեր հայտարարությունը դիտվեց նաև անձնական նկրտումների հետևանք, այսպես՝ պայման եք դրել, որ ձեր անունը լինի համամասնական ցուցակում՝ Վարդան Օսկանյանից անմիջապես հետո, մինչդեռ ձեր պայմանը մերժվել է, ինչն էլ պատճառ է դարձել նման դժգոհության:
-Համանման քննակումների ժամանակ ես իմ կուսակիցներին ասել եմ, որ ես խորհրդարանում մանդատ չեմ ուզում և եթե նույնիսկ լինեմ ցուցակում, ապա իմ մանդատը զիձելու եմ ինձանից հետո եկող կուսակցինբ կամ դաշնբակցին: Այնպես որ , այդ տեսակի էժանագին շահարկունմներ կարելի է ստանալ մամուլում՝ 100-ից 200 դոլար վճարելով:
Արմինե Սիմոնյան

Տպելու տարբերակ Տպելու տարբերակ

Դիտել TOP, Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն