Գլխավոր » TOP, Լրահոս, Հարցազրույցներ, Քաղաքականություն

Ի՞նչ եք ուզում թաղային հեղինակություններից կամ մականունավորներից, ինչո՞ւ եք այդ մարդկանց մեղադրում, գնացեք հասարակությանը մեղադրեք

Հունվար 24, 2017թ. 22:21
համլետ Հարությունյան

Հարցազրույց ՀՀԿ խորհրդարանական խմբակցության պատգամավոր ՀԱՄԼԵՏ ՀԱՐՈՒԹՅՈՒՆՅԱՆԻ հետ
Ընդդիմնադիր քաղաքական գործիչներ, կազմակերպություններ հանդես են գալիս իշխանությանն ուղղված կոչով՝ փոխել Ազգային ժողովի ընտրությունների օրը՝ ապրիլի 2-ը: Մի կողմից խնդիրը համարվում է իրավական. ապրիլի 2-ին անցակցնելը համարվում է հակասահմանադարական քայլ, մյուս կողմից հարցը դիտարկվում է բարյական հարթության մեջ՝ քառօրյա պատերազմի համատեքստում: Դուք ի՞նչ եք մտածում այս մասին:
– Ինձ համար ընդունելի է այն, ինչն իրավական է, այն, ինչը համապատասախանում է օրենքի պահանջներին: Ես չեմ ցանկանա, որ նախընտրական փուլում լինեն շահարկման տեղիք տվող հարցեր: Եվ մենք արդեն իսկ տեսնում ենք, որ կան շահակողներ, որոնք հայտարարում են, թե հակասահմանադրականության հիմք է դրվում: Չպետք է թույլ տալ, որ այս մտայնությունը խորանա:
Մյուս կողմից, ինձ համար իրոք ցանկալի կլիներ, որ ընտությունների անցկացման օրը նշանակված չլիներ ապրիլի 2-ին: Ես ևս դա ասում եմ նկատի ուենալով խնդրի բարոյական կողմը:
-Այդ դեպքում հնարավո՞ր է, որ ՀՀԿ-ում քննարկվի ընտրությունների օրվա փոփոխման հարցը:
-Դեռ տեղյակ չեմ, թե ի՞նչ տրամադրություններ կան կուսակցությունում, հետևաբար չեմ կարող ասել, թե հարցն ի՞նչ ընթացք կստանա: Ձեր հարցին ես այս պահին պատասխանում եմ ոչ թե որպես ՀՀԿ անդամ, այլ որպես քաղաքացի, հայ մարդ, որը հարգում է օրենքը: Կարծում եմ, այս հարցում իր հստակ խոսքը պետք է ասի համապատասխան կառույցը՝ Սահմանադրական դատարանը և ոչ թե առանձին անհատներ:
Դեռ չի հրապարակվել ՀՀԿ-ի ընտրական ցուցակը, բայց այն արդեն իսկ քննադատության առարկա է դառնում. շրջանառվող լուրերի համաձայն նրանում կարող են լինել քրեական անցյալ ունեցողներ, թաղային հեղինակություններ, որոնց ՀՀԿ-ն կօգտագործի ձայներ հավաքելու նպատակով, կրկին ճանապարհ է բացվո՞ւմ նման անձանց համար: Սա ձեզ չի՞ մտահոգում:
-Քանի դեռ ցուցակները չեն հրապարակվել, քանի դեռ պարզ չի դարձել թե ովքե՞ր են նրանցում ընդգրկված մարդիկ, ես որևէ փաստ չունենենալով չեմ կարող ինչ-որ կարծիք հայտնել: Իմ տեղեկատվության համաձայն ՀՀԿ-ի ընտրացուցակները դեռևս վերջնականորեն կազմված չեն: Մեր ժողովուրդը բոլորին լավ է ճանաչում, գիտի ո՞վ է թաղային հեղինակություն, ո՞վ ՝ ոչ, այնպես որ, ցուցակների հրապարակումից հետո միայն թող հայտնի իր կարծիքը: Գուցե ցուցակներում ոչ մի թաղային հեղինակություն էլ չկա, ինչո՞ւ ենք դեռ ջուրը չմտած՝ բոբիկանում: Արդյոք միտումնավոր չե՞ն նման լուրեր տարածվում:
Ես ունեմ երկարատև քաղաքական տարիների փորձ, ամեն ինչ տեսել եմ, տարբեր մարդիկ եմ տեսել նաև խորհրդարանում, այնպես որ, եթե կրկին տարբեր մարդկանց տեսնեմ որևէ բանից ո՛չ կզարմանամ, ո՛չ կտխրեմ, ո՛չ էլ կուրախանամ:
Իսկ իմ մտահոգությունը ոչ թե կլինի նրանից, որ կրկին խաղի մեջ են մտնում թաղային հեղինակությունները, այլ մտահոգվում եմ, որ այդ մարդիկ ունեն ռեյտինգ, մտահոգվում եմ, որ մեր ժողովուրդը գնում ու այդ մարդկանց է իր ձայնը տալիս: Ի՞նչ եք ուզում թաղային հեղինակություններից կամ մականունավորներից, ինչո՞ւ եք այդ մարդկանց մեղադրում, գնացեք հասարակությանը մեղադրեք, որ նման մարդիկ իրենց մոտ մեծ հեղինակություն են վայելում: Ու քանի որ վայելում են այդ մարդիկ էլ մտածում են՝ մամուլն ի՜նչ ուզում է թող իմ մասին գրի, թող որքա՜ն ուզում է խոսի, եթե ես ժողովրդի մոտ ռեյտինգ ունեմ՝ կարևորը դա է:

Յուրաքանչյուր ՀՀ քաղաքացի ունի ընտրելու և ընտրվելու իրավունք: Ենթադրենք մարդը մականուն ունի, իրավունք չունի՞ իր թեկնածությունը դնելու, պատգամավոր դառնալու: Եթե ժողովուրդն էլ իրեն համարում է ռեյտինգ ունեցող մարդ՝ չթողնե՞նք, որ մասնակցի ընտրություններին: Կամ մամուլն ասում է՝ այս կամ այն մարդն ունի քրեական հեղինակություն, ասում եք ու անցնում առաջ, բայց քրեական հեղինակություն եք համարում մարդկանց, որոնք ոչ մի անգամ դատվածություն չունեն: Իսկ եթե դատված չեն, ո՞վ է որոշողը, որ այդ մարդը քրեական հանցագործ է, կամ մամուլի խոսքով՝ քրեական հեղինակություն է:

Ասում են՝ տեսեք Միհրան Պողոսյանը մասնակցելու է ընտրություններին: Ի՞նչ վատ բան է անում Պողոսյանը, թող մասնակցի, իսկ ո՞վ ասաց, որ նա քրեական հանցագործ է, Պողոսյանը գեներալ-մայոր մարդ է, գեղեցիկ արտաքին ունի, լավ մարդ է, ինչպե՞ս կարելի է մարդուն պիտակավորել ու վիրավորել: Կամ ծաղրում եմ մականունավորներին, մարդն ի՞նչ անի որ իր մականունը Շշի Մելո է, բայց ես նրա հետ աշխատել եմ ու նրա նման պարկեշտ մարդ չեմ տեսել: Որ  մականուն ունի՝ մերժե՞նք:

Մականունավորները կամ թաղի տղերքը թող մեկ այլ որոտներում իրենց դրսևորեն, իսկ խորհրդարանը թողնեն քաղաքական գործիչներին, ուժերին, չէ՞ որ այն, ի վերջո, քաղաքական մարմին է, պարտադիր է՞, որ հայտնվեն օրենսդիրում: Հետո էլ դժգոհում ենք, որ ներկայանալի պատգամավորներ չունենք կամ քիչ են, որոնք  արդյունավետորեն կաշխատեն միջազգայի կառույցներում:
-Բայց այդ մարդկանց մեր հասարակությունն է խորհրդարան գործուղում, ուրեմն դուք գործ ունեք հասարակության ու նրա ընտրության հետ: Ես ձեզ կարճ, կոնկրետ ասում եմ՝ մեր ժողովուրդն օրինակ ինձ չի ընտրելու, բայց այդ մարդկանց կտա իր ձայնը: Ուրեմն, նրանք էլ իրավունք ունեն մտնել խորհրդարան:
Թող մեր ժողովուրդը գնա ու իր ձայնը տա այն մարդուն ում կհամար արժանի ու երկրի համար պիտանի մարդ: Ես որպես ընտրող այս սկզբունքով եմ կատարելու իմ ընտրությունը:
Ընդդիմությունը շարունակում է մեղադրել ՀՀԿ-ն, թե իր վերատադրության համար ներդրեց «ռեյտինգայինե կոչված ընտրակարգը, քանի որ հույսը, մի կողմից, ընտրական հայտնի տեխնոլոգիաներն են, մյուս կողմից «ռեյտինգայինե թեկնածուների փողի պարկերը: Ի՞նչ կասեք ձեզ հասցեագրվող քննադատության մասին:
-Եկեք հիշենք՝ ընդդիմությունը չէ՞ր 4+4+4 ձևաչափով բանակցում իշխանության հետ: Փոխարենն այսօր նման հայտարարություններ անելու, թող ժամանակին պնդեին, որ այդ ընտրակարգը պետք է հանել, քննադատեին, եթե իշխանությունը չհամաձայներ՝ թող դուրս գային քննարկումներից և հրաժարվեին ստորագրել ընտրական օրենսգրքի տակ: Ուզում եմ ասել, թող ամիսներ առաջ բոլոր հնարավոր տարբերակներով պայքարեին ռեյտինգային ընտրակարգի դեմ: Չեն արել, հակառակը՝ ես որքան հիշում եմ ԸՕ-ի շուրջ շատ լավ էլ կոնսենսուս ստացվեց, դա եղել է իրենց համաձայնությունը: Եվ ի՞նչ է ստացվում՝ ընտրություններից երկու ամիս առաջ սկսել են աղմկել, թե գիտե՞ք ռեյտինգայինը լավ բան չէ: Նոր են գլխի ընկե՞լ: Ուշ է արդեն, գնացքը շարժվել է: Նման  հայտարարությունները ես ընդամենը դիտում եմ նախընտրական քայլ, ուրիշ ոչինչ: Ինչ վերաբերում է ՀՀԿ-ին ուղղվող մեղադրանքնին, թե սև տեխնոլոգիաներ են կիրառվելու,  փողի պարկեր  մեջտեղ կգան, ասեմ, որ իմ կարծիքով բուն ընտրական  գործընթացները խախտումներով չեն լինի: Իսկ թե փողերը ո՞վ կբաժանի, ինչպե՞ս  կբաժանեն, կբաժանե՞ն, թե՞ չէ,  խորհուրդ կտամ նման կարծիքներ հայտնելուց առաջ նախ մտածել, որ գոյություն ունի անմեղության կանխավարկած:

Ես կարծում եմ, որ բուն ընտրական գործընթացները կանցնեն թափանցիկ, արդար, իսկ այդ հայտնի կարուսելները չեն լինի:  Խորհուրդ կտամ նման լուրեր տարածող ուժերին լծվել նախընտրական գործընթացների մեջ ու զբաղվել սեփական գործերով:

Ասվում է, թե Գագիկ Ծառուկյանի քաղաքական վերադարձը  ոչ միայն ընդդիմադիր  հատվածի խաղաքարտերն է խառնել, այլ  ՀՀԿ-ի ու իշխող ուժը մեծ վտանգ է զգում նրա մուտքից: Այդպես է՞:

-Ինչո՞ւ պետք է Ծառուկյանը խառնի ՀՀԿ-ի խաղաքարտերը. ՀՀԿ-ն ունի իր  ընտրազանգվածը, Ծառուկյանն իրենը: Հանրապետականը որևէ մեկից կամ որևէ ուժից վախենալու խնդիր չունի, քանի որ ՀՀԿ-ն ունի իր կայուն ընտրազանգվածը, հզոր կուսակցություն է, ունի տասնամյակների պատմություն: Նման կայացած քաղաքական ուժը չի կարող վախենալ ընդամենը երեկ՝ ոտքի վրա կազմավորված դաշինքներից:

Ընդդիմադիր դաշտում մի կողմ են դրվել գաղափարական տարակածություններն ու փորձ է արվում  մեկ ճակատ ձևավորել, որը կգլխավորեն երկու անձինք՝ պաշտպանության նախկին նախարար Սեյրան Օհանյանն ու Գագիկ Ծառուկյանը։ Առաջին անգամ ՀՀԿ-ն գործ կունենա ոչ թե մանր- մունր ընդդիմադիր բեկորների, այլ միասնական ուժի հետ:

-Եվ ես ողջունում եմ այդ համախմբումը, քաղաքական դաշտի կայացման համար դա շատ կարևոր քայլ է: Կունենանք միավորված հզոր ընդդիմություն: ՀՀԿ-ն մեկ անգամ չէ, որ կանգնել է նման փորձությունների  առաջ: ՀՀԿ-ի ներքին ռեսուրներն այնքան  հզոր են, որ բոլոր ուժերը մոբիլիզացելու դեպքում մեր կուսակցությունը կկարողանա  իր տեղը կգրավել  քաղաքական դաշտում:

Շատ հարգում եմ Սեյրան Օհանյանին  որպես զինվորական գործիչի, բայց եթե դուք ինձ հարցնեք, թե  ովքե՞ր են նրա ընտրազանգվածը՝ ես կդժվարանամ պատասախանել, որովհետև մի քանի ամսվա քաղաքական գործիչի մասին կարծիքս  կարող է խոբուսիկ լինել: Բայց այն, որ նա ունի մեծ  հեղինակություն ու իր հետևից մարդիկ կտանի՝ կասկածից վեր է: Մինչդեռ Ծառուկյանի մասին կարող եմ վստահաբար ասել,  որ նա ունի հզոր ընտրազանգված: Իզուր չէ, որ ժամանակին, երբ նա  ղեկավարն էր ԲՀԿ-ն,  վերջինս դարձավ քաղաքական երկրոդ ուժը խորհրդարանում:

Ամեն դեպքում ընդդիմադի ձայները կարող են մի քանի ուղղությամբ բաշխվել, դրանց մի մասը կգնա Ելք դաշինքի  ուղղությամբ, մյուսները ԲՀԿ-ի, մնացածը կբաշվեն մյուսների մեջ: Բանն այն է,որ որքան էլ ընդդիմությունը փորձի միավորվել, միևնույն է, ձայները բաժանվելու են մի քանի մասի: Սպասենք դեռ ժամանակ կա ու այս ընթացքում շատ ջրեր են հոսելու:

Ինձ համար մեկ բան հստակ է՝, որ  այս  ընտությունները բոլոր ուժերի համար՝ թե՛ ՀՀԿ-ի, թե ՀՅԴ-ի թե՛ խորհրդարանական ու արտախորհրդարանական ընդդիմության, լուրջ  փորձություն է լինելու:

-Լինելով տարիներ փորձառություն ունեցեղ քաղաքական գոխիչ, ըստ ձեզ ի՞նչ պատկեր կունենա ապագա խորհրդարանը:

-Մեր քաղաքական կյանքը նոր փուլ է թևակոխում և՛ բովանդակային, և՛ գոծելակերպի առումով: Ոմանք չեն գիտակցում սահմանադրական փոփոխությունների դերը, ուշադրություն չեն դարձնում, որ  նոր շրջան է սկսվում  Հայաստան պետության համար: Հետևաբար, հանձին նոր խորհրդարանի մենք գործ կունենանք քաղաքական նոր տիպի, նոր որակի ակումբի  հետ,  որի գործառույթները բոլորովին կտարբերվեն նախկին խորհրդարաններից: Աստված տա, որ այս նոր փուլն արդյունավետ լինի մեր ժողովրդի, մեր պետականության համար: Լավ կլինի, որ արագ  հաջողությունների հասնենք,  բայց եթե անգամ քայլերը լինեն դանդաղ մենք մեկ քայլ անգամ  հետ գնալու հնարավարություն չունենք: Հայտնի խոսք կար՝ ոչ մի քայլ  հետ՝ հետևում Մոսկվան է, իսկ այսօր մենք պետք է ասենք՝ ոչ մի քայլ հետ,  քանի որ հետևում անդունդ է: Հետևաբար, մեր քայլերը միմիայն դեպի առաջ են ուղղվելու, մենք պարտավոր ենք դա անել:

Ա. ՀԱՐՈՒԹՅՈՒՆՅԱՆ

 

Տպելու տարբերակ Տպելու տարբերակ

Դիտել TOP, Լրահոս, Հարցազրույցներ, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն