Գլխավոր » Politics, Լրահոս, Քաղաքականություն

Օհանյան-Ծառուկյան հնարավոր դաշինքների միջև կլինի՞ համագործակցություն

Հունվար 20, 2017թ. 18:47
Արամ Գասպարի Սարգսյան

Հարցազրույց Հայաստանի դեմոկրատական կուսակցության նախագահ ԱՐԱՄ ՍԱՐԳՍՅԱՆԻ հետ
Հայտարարվեց՝ <<Համախմբում>>, Հայաստանի Դեմոկրատական կուսակցության  և <<Երրորդ հանրապետություն>> կուսակցությունների միավորման ու դաշինքով հանդես գալու մասին. ինչո՞ւ որոշեցիք այդ ձևաչափով հանդես գալ, ո՞րն է այս դաշինքի նպատակը:
– Նպատակների մասին խոսելիս երբեմն ինձ հարցնում են՝ 7 տոկոսի շեմը հաղթահարելու նպատակ ունե՞ք: Բոլորի համար պարզ ու հասկանալի ասեմ, որ խորհրդարանում ինչ-որ տեղեր զբաղեցնելու համար չենք համագործակցում ու դաշինք ստեղծում, մենք այն քաղաքական գործիչներն ու կուսակցությունները չենք, որոնց գերնպատակը լինի ամեն գնով խորհրդարանում տեղ գրավելը, մանդատ ձեռք բերելն ու դրանով բավարարվելը: Խոսեմ անձամբ իմ անունից. ես դրա կարիքն ու ցանկությունը չունեմ, եթե ունենայի՝ կլինեի նաև գործող խորհրդարանում: Մեր նպատակը սպասվող ընտրություններում հստակ հաղթանակ տանելն է: Հակառակ դեպքում անիմաստ կլինի մեր մասնակցությունը:
Իսկ թե ինչո՞ւ ենք միավորում մեր ուժերը, խնդիրը շատ հստակ է. համակարգը թույլ չի տալիս անել այն, ինչն անհրաժեշտ է Հայաստանի Հանրապետությանը, թույլ չի տալիս, որ մենք մեզ պաշտպանված զգանք: Այս համակարգը մեր երկիրը տանում է ամայացման: Ուրեմն, այս իրավիճակում մեր նման քաղաքական ուժերը պետք է ձգտեն միմիայն հաղթանակի, որպեսզի կարողանանք քայլ առ քայլ համակարգ փոխել: Սա է մեր նպատակը:
-Երեք ուժերի համախմբումը համարվեց խոցելի, ավելին՝ կանխատեսվում է, եթե հաղթանակեք ու մտնեք խորհրդարան, այնտեղ չեք կարող ներքին միասնությամբ ամուր դաշինք լինել ու կարժանանաք ՀԱԿ-ի և <<Ժառանգության>> անփառունակ ճակատագրին, քանի որ ունեք աշխարհաքաղաքական տարբեր ընկալումներ, և չունեք գաղափարական ընդհանրություններ:
– Փորձ է արվում շահարկել այս հարցը, բայց դա ինձ քիչ է հետաքրքրում: Երկրում այսօր իրավիճակն այնպիսին է, որ խոսել աշխարհաքաղաքական կամ տնտեսական կացութաձևի ընտրության մասին՝ կլինի նոնսեն: Ինչո՞ւ, որովհետև երկրի առաջնային խնդիրը կայունությունն ու տնտեսական զարգացումն է, որը պետք է իրականացվի հակաճգնաժամային քայլերով: Եթե հակաճգնաժամային ծրագիրը կյանքի կոչվի ու մենք հասնենք որոշակի հստակ արդյունքների, երկրում հաստատվի այնպիսի համակարգ, ինչը թույլ կտա մեզ գնալ ժողովրդավարական սկզբունքների հաստատման ճանապարհով, ապա ես ձեզ հավատացնում եմ, որ մենք կբաժանվենք ու ամեն մեկս կգնա իր գաղափարական <<բնակարանը>>:
Խոսքն այն մասին, որ երկրի վիճակով մտահոգվածները պետք է հասկանան, որ այսօր ժամանակը չէ, որ մենք նստենք, որոշենք պետք է գնանք սոցիալիստական ճանապարհո՞վ, թե՞ նեոլիբերալական, որովհետև առաջին հերթին պետք է կարգավորենք տնտեսական վիճակը, պետությանը վերադարձնենք նրա ամենակարևոր՝ կարգավորիչ, մասամբ նաև կառավարող դերը: Ահա թե ինչու, մենք մի կողմ ենք դնում մյուս բոլոր հարցերը, այդ թվում և աշխարհաքաղաքական կողմնորոշումներն ու առաջնորդվում միայն պետական շահերով: Իսկ այն ուժերը, որոնք այս իրավիճակում կառաջնորդվեն իրենց սեփական շահերով ու կանտեսեն պետության վիճակը՝ ցույց կտան իրենց քաղաքականության վտանգավորությունը, Հայաստանի ապագայով մտահոգված չլինելը:
Կարո՞ղ ենք ասել, որ <<Համախմբում>>, Դեմկուս, <<Երրորդ Հանրապետություն>> կուսակցությունների դաշինքով սկսվեց Սեյրան Օհանյանի քաղաքականություն մուտք գործելու գործընթացը: Եվ հաջորդ քայլը կլինի այն, որ Օհանյանը կմիանա հիշյալ դաշինքին՝ գլխավորելով այն:
-Գաղտնիք չէ, որ մենք Սեյրան Օհանյանի հետ համագործակցում ենք ու այդ մասին նաև ասել ենք հրապարակավ: Թե ինչպիսի՞ ձևաչափով ու ինչպիսի՞ դերակատարմամբ հանդես կգա Սեյրան Օհանյանը, առաջիկայում նա այդ մասին անձամբ կհայտարարի: Այսօր իր փոխարեն ոչ ոք չի կարող դա ասել: Համենայնդեպս, ես կարող եմ իմ կուսակցության անունից ասել, որ համագործակցում ենք Սեյրան Օհանյանի հետ:
Գագիկ Ծառուկյանի վերադարձը թերևս մեծ ազդեցություն կունենա քաղաքական դաշտի վերադասավորումների վրա, գուցեև կխառնի ընդդիմության խաղաքարտերը: Այդ առումով, հնարավո՞ր է, որ Օհանյան-Ծառուկյան անձերի շուրջ ձևավորվելիք դաշինքները ինչ-որ փուլում  համագործակցել:
-Նախ, մենք չենք համախմբվում անձերի շուրջ: Անձնավորելով երևույթը ես ուզում եմ, միաժամանակ, չմոռանանք, որ միավորվել են քաղաքական կուսակցություններ, որոնք համաձայնություն են ձեռք բերել ծրագրային դրույթների, հստակ սկզբունքների շուրջ: Եվ սա ամենից կարևոր հարցն է: Այդ քաղաքական կուսակցություններն ունեն իրենց նպատակները, ծրագրերը, ինչն էլ արտացոլված է մեր տարածած հայտարարության մեջ: Ինչ վերաբերում է Գագիկ Ծառուկյանի դեռ ստեղծվելիք դաշինքի հետ մեր համագործակցությանը, այո, ես չեմ բացառում, որ կարող է լինել նման համագործակցությունը: Տեսնենք, ամեն ինչ կախված է նպատակներից: Ժամանակը ցույց կտա մենք կկարողանա՞նք համադրել մեր սկզբունքները:
Դժվար, թե լինի մեխանիկական որևէ գործողություն, համոզված եմ, որ համագործակցությունը կլինի միայն նպատակային: Այս պահին դեռ իրավասու չեմ ավելին ասելու, կքննարկենք, կտեսնենք, թե ինչպիսի՞ զարգացումներ կլինեն առաջիկայում, որից հետո կկայացնենք որոշում:
Ի դեպ, երեք ուժերի ու Ծառուկյանի հայտարարությունները հնչեցին նույն օրը, պատահականությո՞ւն էր սա: Եվ հետո, բովանդակային առումով ևս տեքստերը բավական մոտ են՝ արտագաղթ, տնտեսության վատ վիճակ, համակարգային փոփոխությունների հասնելու անհրաժետություն: Սա ինչի՞ մասին է վկայում:
-Այո, ստացվեց այնպես, որ նույն օրը, գրեթե նույն ժամերին մեկմեկու հաջորդեցին մեր ու Գագիկ Ծառուկյանի հայտարարությունները, բայց դա, իհարկե, պատահականություն էր: Իսկ հայտարարությունների բովանդակության համահունչ լինելու մեջ զարմանալու բան չկա: Դա փաստում է այն մասին, որ այսօրվա Հայաստանում կուտակված են հենց այդ հիմնահարցերը: Ու բոլորը դա գիտեն, հասկանում են, թե ի՞նչ վիճակ է երկրում, և ուզում են ուղիներ գտնել իրավիճակից դուրս գալու:
Սպասվող ընտրությունների բացառիկությունը նաև այն է, որ ընդդիմադիր դաշտում այս պահի դրությամբ առնվազն երեք դաշինքներ են ձևավորվել, այն դեպքում, երբ նախորդ ընտրություններում անգամ մեկի ծնունդը շատ դժվար էր տեղի ունենում: Սա չի՞ խանգարի ընդդիմությանը, իրարից ձայներ փախցնելու պատճառ չի՞ դառնա, ինչից էլ, բնականաբար, կօգտվի իշխանությունը:
-Մենք իրավունք չունենք մեխանիկորեն վերաբերվել այդ հարցերին: Ի՞նչ է նշանակում՝ ամբողջ ընդդիմադիր դաշտը պետք է միավորվի ու միասնաբար հանդես գա: Ի՞նչ է նշանակում, թե չեն կարող լինել մի քանի ընդդիմադիր դաշինքներ: Մենք <<ֆրոնտ>> ենք ստեղծո՞ւմ, թշնամու դեմ ե՞նք միավորվում ու գնում պատերազմի՞: Եկեք պարզ խոսենք, եթե ընդդիմության ներսում կան քաղաքական նպատակներին հասնելու հետ կապված տարաձայնություններ ինչո՞ւ նրանց մեջ ևս չպետք է լինի մրցակցությունը: Ի վերջո, թող ժողովուրդը որոշի, թե ո՞վ է ավելի ճիշտ ճանապարհ առաջարկող ուժը: Իսկ եթե ընդդիմադիր մի քանի դաշինքների առկայությունը պետք է պատճառ դառնա, որ ժողովուրդը գնա ու իր ձայնը տա իշխանությանը, ապա դա իր իրավունքն է:
-Ձեր տարածած հայտարարության վերջին տողում գրում եք՝ դաշինքը բաց է և պատրաստ է համագործակցել քաղաքական այլ ուժերի հետ. ի՞նչ չափորոշիչներով կառաջնորդվեք համագործակից ուժերի ընտրության հարցում: Ի դեպ, արդեն կոնկրետ անուններ են շրջանառվում՝ թե ձեր դաշինքին միանալու ցանկություն ունեն  <<Ազգային համաձայնություն>> կուսակցության նախագահ Արամ Հարությունյանը, Տիգրան Կարապետյանը:
-Նախ չափոշիչների մասին, դրանք հստակ նշված են մեր հայտարարության մեջ: Գրված է, թե հանուն ինչի՞ ենք մասնակցելու ընտրություններին: Մենք արձանագրում ենք մեզանում առկա համատարած կոռուպցիայի, տնտեսաքաղաքական մենատիրության, պետական կառավարման արդյունավետության ցածր մակարդակի, մեր պետության հետընթացի, արտագաղթի և այլնի մասին: Ասում ենք, որ ուզում ենք Հայաստանում նոր որակի իշխանություն ձևավորել, ինչը հանրության ճնշող մեծամասնության պահանջն է: Հետևաբար, այն ուժերը, որոնք կիսում են մեր մտահոգությունները և տեսակետները, մեր դաշինքի դուռը նրանց առաջ բաց է։ Անուններ թվարկեցիք, թող նրանց կողմից լինեն հայտարարություններ, որից հետո կխոսենք: Կարծում եմ, որ այդ ուժերը կարող են մեզ հետ միավորվել:
Բայց այսօր բոլոր ընդդիմադիրների հայտարարություններում նույն խոսքերն են, նույն մտքերը՝ տնետեսության վատ վիճակի, ահագնացող կոռուպցիայի ու արտագաղթի մասին: Ընտրողը ո՞նց տարբերակի, ո՞նց որոշի՝ ո՞ր ուժն է այդ խնդիրների իրական լուծողը:
-Մեկ շաբաթ անց տեղի կունենա Հայաստանի դեմոկրատական կուսակցության  համագումարը, ուր ես կհնչեցնեմ մեր հստակ դիրքորոշումը, և լսողները կհասկանան, որ մենք մեր տեսլականն ունեցող քաղաքական ուժ ենք, որն հենց իր ասելիքով տարբերվում է մյուսներից:

Մի բան հստակ է, ո՞ր քաղաքական ուժն էլ այսօր գա իշխանության, պետք է անպայման համակարգ փոխի, քանի որ այս համակարգով հնարավոր չի լինի ոչինչ անել: Հակառակ դեպքում, դա կլինի ընդամենը իշխանափոխություն, ինչպես մասին սիրում են որոշ ուժեր խոսել: Իսկ դա նշանակում է՝ գործող իշխանության փոխարինում մեկ ուրիշ ուժով, ու վերջ:
Ասելքս այն է, որ առանց համակարգային փոփոխությունների նոր բան անել հնարավոր չէ, այս համակարագը դատապարտված է: Նրանք, ովքեր այս հարցում մեզ հետ համակարծիք են՝ թող գան ու միանան մեր դաշինքին:
ԱՐՄԻՆԵ ՍԻՄՈՆՅԱՆ

Տպելու տարբերակ Տպելու տարբերակ

Դիտել Politics, Լրահոս, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն