Գլխավոր » Society, Առողջապահություն, Լրահոս, Հասարակություն, Վերլուծական

ԿԳ նախարարությունը դիմել է Պարենի համաշխարհային ծրագրի գրասենյակ` պարզելու, թե ինչ տարրեր են հավելված դպրոցականներին տրվող սննդին

Մայիս 14, 2015թ. 00:17
Դպրոց

Մեր դպրոցականներին տրվող կասկածելի կամ նույնիսկ վտանգավոր սննդի առնչությամբ այս պահին պաշտոնապես դեռ հստակեցում չկա: Ինչպես արդեն տեղեկացրել ենք, «Պարենի համաշխարհային ծրագիր»-ը (ՊՀԾ) Հայաստանում ՀՀ կրթության և գիտության նախարարության աջակցությամբ 2010 թվականից իրականացնում է «Դպրոցական սնունդ» ծրագիրը, որով ՊՀԾ-ն Հայաստանի 6 մարզերում՝ Գեղարքունիքում, Տավուշում, Լոռիում, Շիրակում, Արագածոտնում և Արմավիրում, տարրական դասարանների 50 000 աշակերտների տալիս է տաք սննդարար ապուր կամ շիլա ու հաց: Երեխաներին տրվող սնունդը հարստացված է, այսպես կոչված, սննդարար տարրերով:

Այս կապակցությամբ «Հանուն առողջ սննդի» քաղաքացիական նախաձեռնության հայտարարության մեջ մասնավորապես նշված է. «Նույն փաստաթղթում կարդում ենք հետևյալը. թե՛ Ռուսաստանի Դաշնության Գյուղատնտեսության նախարարությունը, և թե՛ Իսրայելի Միջազգային զարգացման համագործակցության կենտրոնը (ՄԱՇԱՎ) ընդունում են, որ երեխաներին տրվող սննդարար տարրերով հարստացված նախաճաշերը նպաստում են նրանց զարգացմանը և սնուցման կարգավիճակի բարելավմանը:

Ի՞նչ սննդարար տարրերի մասին է խոսքը: Այդ մասին գտնում ենք նաև ՊՀԾ-ի կայքում (http://www.wfp.org/node/3399/4428/404319) :

Ինչու՞ են իրենց մոտ ալյուրի ֆորտիֆիկացումը մերժող Ռուսաստանն ու Իսրայելը ֆինանսավորում մի ծրագիր, որով մեր դպրոցական երեխաներին ֆորտիֆիկացված ալյուր է տրվում: Տարբեր մարզերում ապրող մեր նախաձեռնության անդամներից տեղեկացանք, որ դպրոցներին տրվող ալյուրը ռուսական «Алтайские мельницы» ընկերության արտադրանքն է, որը նաև ֆորտիֆիկացված ալյուր է արտադրում արտահանման նպատակով (www.altaimills.ru/products/flour/bakery-flour/fortified-flour.html):

Ալյուրին հավելված են ՝ Содержание витаминов на 1 кг:

• Тиамин (Витамин В1): 4,4 мг

• Рибофлавин (Витамин В2): 2,6 мг

• Ниацин: 35,0 мг

• Фолиевая кислота: 1,0 мг

• Железо: 15,0 мг

• Цинк: 30,0 мг

• Витамин А: 1,0 мг

• Витамин В12: 0,008 мг

Փաստորեն 2010 թվականից մեր 50.000 երեխաներին առանց ծնողների համաձայնության ալյուրի հետ խառնած պրեմիքսներով են կերակրում, ընդ որում նաև սինթետիկ դեղանյութ՝ ֆոլաթթու, պարունակող»:

Մարդկանց օրգանիզմում ֆոլաթթվի ավելցուկը կարող է հանգեցնել քաղցկեղի և այլ հիվանդությունների (http://nyut.am/archives/377678): Տեղեկացրել ենք նաև, որ դպրոցականներին տրվող վտանգավոր սննդի առնչությամբ ՀՀ քննչական կոմիտեի նախագահին հանցագործության մասին հաղորդում է ներկայացվել (http://nyut.am/archives/365246:

Քանի որ այս խնդրի առնչությամբ ՀՀ կրթության և գիտության նախարարություն ուղղված մեր 17.04.2015թ. հարցմանը թերի, մասնակի պատասխան էր տրվել (այդ մասին հրապարակումը` «Կասկածելի սննդի բաղադրության առնչությամբ մեզ առաջարկում են դիմել ՀՀ առողջապահության և գյուղատնտեսության նախարարություններ», http://nyut.am/archives/370293 ), մասնավորապես` «Որտեղից՞ է ներկրվում «Դպրոցական սնունդ» ծրագրով Հայաստանի հանրակրթական դպրոցներին տրվող ալյուրը, և ո՞ր ընկերության արտադրանքն է այն» հարցի պատասխանն ընդհանրապես չէինք ստացել, ստիպված եղանք երկրորդ հարցմամբ մեր հարցը կրկնել: Առաջացան նաև նոր հարցեր, որոնք նույնպես ուղղեցինք ՀՀ ԿԳ նախարար Արմեն Աշոտյանին: Արդեն ստացել ենք մեր հարցման կապակցությամբ ՀՀ ԿԳՆ աշխատակազմի ղեկավար Մհեր Ղազարյանի պատասխանը, որում նախորդ պատասխանում անպատասխան թողնված վերոնշյալ հարցի առնչությամբ գրված է.

«Ներկրվող սննդամթերքի ծագման երկրի և միկրոտարրերով հարստացման վերաբերյալ հայտնում եմ, որ ՀՀ ԿԳ նախարարությունը դիմել է ՄԱԿ-ի պարենի համաշխարհային ծրագրի հայաստանյան գրասենյակ: Պատասխան ստանալուն պես Ձեզ կտեղեկացնենք լրացուցիչ»:

Այս պատասխանից ստացվում է, որ նախարարությունը մինչ այդ տեղյակ չի եղել «Դպրոցական սնունդ» ծրագրով աշակերտներին տրվող սննդամթերքի ծագման երկրի, արտադրող ընկերության և ինչ-ինչ նյութերով հարստացված լինելու վերաբերյալ, կամ էլ եթե նույնիսկ տեղյակ է եղել, որ սննդամթերքում կան հավելումներ, չի իմացել, թե ինչ հավելումներ են դրանք, և միայն մեր հարցումից հետո է փորձում ստանալ այդ հարցերի պատասխանը, ինչն, իհարկե, ավելի վաղ պետք է աներ: Դե ինչ, ինչպես ասում են, ավելի լավ է ուշ, քան երբեք:

Բացի վերոնշյալ «Դպրոցական սնունդ» ծրագրից, ՀՀ կառավարության 2014թ. որոշմամբ և կառավարության ֆինանսավորմամբ ՀՀ մարզերից այժմ արդեն երեքում իրականացվում է նաև «Կայուն դպրոցական սնունդ» ծրագիրը (ոչ պաշտոնապես այն կոչում են նաև «Ազգային դպրոցական սնունդ» ծրագիր): Մեզ և, ընդհանրապես, հանրությանը, նկատի ունենալով «Դպրոցական սնունդ» ծրագրի հետ կապված վերոնշյալ ու տագնապի տեղիք տվող տեղեկատվությունը, բնականաբար, հետաքրքրում է նաև, թե 2014 թվականից ՀՀ կառավարության ֆինանսավորմամբ «Կայուն դպրոցական սնունդ» ծրագրի շրջանակում Վայոց Ձորի, Սյունիքի և Արարատի մարզերի դպրոցականներից յուրաքանչյուրին որոշակի ի՞նչ սննդամթերք է տրվել ու տրվում, ի՞նչ չափաբաժիններով, «Կայուն դպրոցական սնունդ» ծրագրի շրջանակում դպրոցականներին տրվող սննդամթերքի (սննդատեսակներից յուրաքանչյուրի) 1 կիլոգրամը (լիտրը) կամ մեկ բաժինը որոշակի ինչ՞ նյութերով է հարստացված, որքա՞ն են կազմում այդ նյութերի չափաքանակները 1 կիլոգրամում (լիտրում) կամ սննդատեսակներից յուրաքանչյուրի մեկ չափաբաժնի մեջ: Ի պատասխան մեր այս հարցերի, ՀՀ ԿԳՆ աշխատակազմի ղեկավարը տեղեկացրել է.

«ՀՀ Վայոց Ձորի մարզի, Սյունիքի և Արարատի մարզերում իրականացվող «Կայուն դպրոցական սնունդ» ծրագրի շրջանակներում պետական բյուջեից դպրոցականների սննդի բազային ֆինանսավորումը մեկ սովորողի համար կազմում է օրական 140 դրամ, որը հաշվարկվում է օրական 200մլ հյութ և 50 գրամ թխվածք չափաբաժիններով: Սննդամթերքի ձեռբերումը իրականացնում են ուսումնական հաստատությունները: Երեխաների նախաճաշի բազմազանությունը ապահովելու նպատակով դպրոցի տնօրինության ընտրությամբ երեխաներին կարող են հատկացվել նաև կակաո, կեֆիր, յոգուրտ, կաթ և այլն»:

Քանի որ Սննդամթերքի ձեռբերումը իրականացնում են ուսումնական հաստատությունները, մնում է պարզել, թե հիշյալ մարզերի դպրոցների տնօրեններն արդյոք ձեռք չե՞ն բերում «Алтайские мельницы» ընկերության` ֆոլաթթվի և այլ նյութերի հավելում ունեցող ալյուրից պատրաստված թխվածք:

Արթուր Հովհաննիսյան
Nyut.am

Տպելու տարբերակ Տպելու տարբերակ

Դիտել Society, Առողջապահություն, Լրահոս, Հասարակություն, Վերլուծական բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն