Գլխավոր » Politics, Լրահոս, Հասարակություն, Հարցազրույցներ, Ռուսաստան, Տեղեկատվական անվտանգություն, Քաղաքականություն

Բիբինը հակահայկական, հակառուսական քայլ է կատարում` գուցե դրսի ուժերի հետ համագործակցած

Հունիս 26, 2015թ. 22:47
Արման

Հարցազրույց Երեւանի աշխարհաքաղաքական ակումբի խորհրդի ղեկավար Արման Բոշյանի հետ

Քաղաքագետները, մասնավորաբար, օտարազգի, գլուխ են կոտրում հասկանալու, թե իրականում ի՞նչ շարժում է ծավալվում Երևանում, քանի որ զուտ սոցիալական բնույթի մեր խաղաղ ցույցը ոչ մի կերպ չի տեղավորվում նրանց ՙքաղաքագիտական՚ ստանդարտների մեջ. չկան առաջնորդներ, չկա լարված բախում իշխանության ու հասարակության միջև: Հակառակը, հենց ակտիվիստներն են համագործակցում ոստիկանների հետ` անվտանգության համար: Գուցե մենք գործ ունենք օտարի համար անընկալեի երևույթի՞` հայկական նոր շարժման հե՞տ:

-Նոր բան չկա, այն ինչ կատարվում է մեզանում ունի իր հստակ ձևակերպումը` սոցիալական պայթյուն: Իսկ սոցիալական պայթյունը բնական երևույթ է, այն տեղի է ունենում աշխարհի բոլոր երկրներում. տնտեսական, սոցիալական լարված վիճակը հանգում է մի կետի, որից հետո տեղի է ունենում սոցիալական պայթյունը: Այդ կետը մեզանում հոսանքի թանկացումն էր ու մարդիկ ինքնաբուխ փողոց դուրս եկան, այստեղ այլ պատճառներ փնտրելը ճիշտ չէ:
Սկզբում ցուցարարներն անգամ բարձրախոս չունեին: Կար նախաձեռնող խումբ, որը հայտարարություն տեղադրեց ֆեյսբուքում ու սկսվեց այս ինքնաբուխ շարժումը:
Այս պահին, այո, շարժման հստակ լիդերներ չեն երևում, գալիս են քաղաքական գործիչները, հարցազրույցներ են տալիս, ու կարելի է ասել, որ յուրաքանչյուր մասնակից ինչ-որ չափով կազմակերպիչ է:
Բախումներ չկան, որովհետև հիմնականում խաղաղ մարդիկ են հավաքվածները, որոնք բախումների գնալու ո’չ ցանկություն ունեն, ո’չ էլ ագրեսիա կա իրենց մեջ: Այսինքն, սա քաղաքական մայդան չէ, որովհետև չկա իշխանափոխության պահանջ, չկա հեղաշրջման, երկիր քանդելու նպատակ: Սա մարդկանց արդար պահանջն է ու դա շատ պարզ բացատրություն ունի:
Ինչո՞ւ են երիտասարդներն այս պայթյունը իրականացնում, որովհետև նրանք մեր հասարակության ակտիվ մասն են ու անպայմանորեն ուզում են մասնակցել այս սոցիալական արդար պահանջին: Ի դեպ, աստիճանաբար մասսան շատանում է: Ու նաև անհրաժեշտություն է առաջանում զգուշավորության` հնարավոր սադրանքներից:

-Ի՞նչ անել, որ սադրիչները գործելու դաշտ չունենան. կկարողանա՞նք սոցիալական պայքարը պահել խաղաղ ցույցի շրջանակներում, որպեսզի այն չքաղաքականացվի, չուղղորդվի, մանավանդ, որ կան ռադիկալներ, որոնք կազմ ու պատրաստ սպասում են հարմար առիթի:

-Գոյություն չունի այնպիսի սոցիալական պայթյուն, որը քաղտեխնոլոգները, քաղաքական գործիչները և հատուկ ծառայությունները չփորձեն օգտագործել: Նման բան չի լինում, դա կանոն է: Աշխարհի բոլոր կետերում, երբ տեղի են ունեցել բախումներ, դրանք սկզբնական շրջանում կրել են արդարացի բնույթ, քանի որ բողոքի մասնակիցները պարզ, հասարակ ժողովուրդն է: Բայց հետո քաղտեխնոլոգիաների շնորհիվ պայքարը ընդունում էր քաղաքական ենթատեքստ ու տարվում այլ ուղղությամբ: Այս պայքարը բացառություն չի կարող լինել, այսինքն` սադրանքներ կլինեն, սադրիչների միջոցով տարբեր փորձեր կարվեն, որպեսզի կառավարելի դառնա ցույցը, այն ուղղվի այլ պետությունների նպատակների ծառայեցմանը: Այս պահին Բաղրամյան պողոտայում դեռ նման իրավիճակ չկա, բայց նկատվել են փորձեր: Արդեն իսկ եղել են սադրիչներ, որոնց ցույցի մասնակիցները հեռացրել են տարածքից: Կան նաև ցույցը ուղղորդելու առաջին ազդանշանները: Այսօր Բաքվում, Թբիլիսիում Կիևում տեղի են ունեցել ցույցեր` ի սատարում հայկական հեղաշրջման: Դրանք այլևս հրահանգված միտինգներ են: Ես, ճիշտն ասած, չեմ հիշում, որ Բաքուն ու Թբիլիսին ի պաշտպանություն հայ ժողովրդի Հայոց ցեղասպանության ճանաչման հետ կապված ինչ-որ միտինգներ իրականացնեին: Բայց չգիտես ինչու հոսանքի թանկացումն այնքա~ն է անհանգստացրել Ադրբեջանին ու Վրաստանին, որ խիստ մտահոգված են ՙխեղճ հայերի՚ ճակատագրով:
Մյուսը` Կիևն է, այստեղ մի քանի անգամ գների թանկացում է եղել, բայց ես չեմ հիշում, որ իրենք այդ թանկացումների դեմ բողոքեն, մինչդեռ Հայաստանի թանկացումը խի~ստ մտահոգել է կիևյան մայդանի ակտիվիստներին: Նրանք հայտարարում են` սատարում ենք հայկական արդար պայքարը, որպեսզի հայերը ազատվեն ռուսական բռնապետությունից, իմպերիալիզմից: Այս ամենը եռում է ուկրաինայի լրատվամիջոցներում: Նրանց նյութերի հիմնական միտքն այս է` Հայաստանում հեղաշրջում է, մայդան:

-Ուկրաինայից Հայաստան են հասնում ջերմեռանդ ողջույններ.ՆԳ նախարար Ավակովը հանկարծ հիշեց <սիրելի> Հայաստանին ու հեռակա ողջունեց մեր <էլեկտրամայդանը>, և դա այն դեպքում, երբ ցուցարարներից սկսած մինչև քաղաքական գործիչներ բացատրում են` պարոնայք, մեզ մոտ մայդան չկա: Արևմտյան ՙվերլուծաբաներն՚ էլ սեփական երևակայությանը զոռ տված մտքեր են շրջանառում, թե ակտիվիստների դեմ Պուտինը կհանի Հայաստանում գտնվող ռուսական զորքը: Ի դեպ, պարզունակ գործելաոճ է, քանի որ այնքան ակնհայտ է միտումը:

-Իհարկե, սրանք նպատակադրված քայլեր են ու ապացույցն են այն բանի, որ դրսի ուժերը ակտիվորեն փորձում են մեր խաղաղ ցույցերին տալ այլ ուղղվածություն` քաղաքականացնել, ուզում են կառավարել մեր գիտակից ակտիվիստներին ու այդ կերպ լուծել բոլորովին այլ` տարածաշրջանային, աշխարհաքաղաքական հարցեր: Ցուցարարները շատ նորմալ մարդիկ են, բայց կգտնվեն, չէ՞, նաև այնպիսիք, ում ձեռքով կփորձեն սարքել մեկ այլ բան: Ու այսօր արդեն մի քանի ազդանշաններ են հնչել, դրանք ապացուցում են, որ դրսի ուժերը փորձում են խառնվել ներհայաստանյան գործընթացներին: Մասնավորաբար, Լոս Անջելոսում գործող աշխարհաքաղաքական ակումի հայկական բյուրոն, ի դեպ այն օրերս Հայաստանում ներկայացուցչություն է բացել, հայտարարություն է տարածել, որի բովանդակությունն այս է` Հայաստանը պետք է ազատվի թշնամական Ռուսաստանից: Ակումբը Հայաստանի իշխանություններին անգամ նախազգուշացնում է, սպառնում, թե շարժման մասնակիցների դեմ ուղղված անօրինական գործողությունները կառաջացնեն իրենց կոշտ հակազդեցությունը, Հարց` ո՞վ է կոշտ դիմադրություն կազմակերպողը, իրե՞նք: Սա հստակ ազդանշան է, որ դրսի ուժերը սկսել են ակցիան քաղաքականացնելու գործընթաց:

Մի կարևոր խնդրի անդրադառնամ. ՙքաղաքացիական հասարակություն՚ ասվածը արևմտյան քաղտեխնոլոգների ստեղծած տերմինն է: Սա ոչ մի կապ չունի ազգ, ժողովուրդ հասկացողության հետ, բայց իրենք դա փոխարինում են ազգին, ժողովրդին: Ու անհասկանալի է դառնում, թե ո՞ր ազգի շահերն է ներկայացնում ՙքաղաքացիական հասարակություն՚ ասվածը, հայրենասեեր են, թեե ոչ: ՙՔաղաքացիական հասարակության՚ տերմինի տակ քաղաքացիական պատերազմներ են հրահրվել աշխարհի բոլոր երկրներում` Եգիպտոսից սկսած, մինչև Լիբիա և Ուկրաինա:

Արևմտյան տեխնոլոգները <քաղաքացիական հասարակություն> ասելով նկատի ունեն քաղաքացիների ակտիվ դիրքորոշում` հասարկական նշանակության հարցերի շուրջ: Բայց ակտիվ դիրքորոշումը բավարար չէ: Հետևաբար, ՙքաղաքացիական հասարակություն՚ սխալ տերմինը պետք է փոխարինել ՙգիտակից հասարակություն՚ տերմինով: Իսկ երբ հասարակությունը գիտակից է, նա չի կարող մանիպուլացվել, նրան շատ դժվար է խաբելը: Գիտակից հասարակությունը` ելնելով իր ազգային, պետական շահերից, կդրսևորի կառուցողական միտումներ: Սա շատ կարևոր է: Գիտակից մարդիկ են մեր ցուցարարները, բայց նրանց շարքերում շատ են նաև դեռահասները, ու եթե այս ամենը երկար ձգվի, հայտը չեղյալ չհայտարարվի, ապա սադրիչներ կհայտնվեն: Ուզենք, թե չուզենք մեր արդար պահանջը դրսի ուժերը քաղաքականացնում են:

-Ո՞րն է ելքը:

-Մեր իշխանությունները Ռուսաստանի հետ միասին կարող են կանխել այս ամենը` հետ կանչելով սակագնի բարձրացման պահանջը: Բայց ինչպե՞ս հասնել դրա իրականացմանը: Երկրի նախագահը չի կարող ինչ-որ բան անել, քանի որ իրավասու չէ պարտադրել Հանրային խորհրդին, մյուս կողմից էլ ՀԷՑ-ը մասնավոր կազմակերպություն է, որին տիրում է ռուսական ԻՆՏԵՐ ՌՍՕ ԵԷՍե ՓԲԸ-ն, խնդրում եմ սրան չկապել Ռուսաստան պետության հետ: Այսինքն, մենք գործ ունենք մասնավոր բիզնեսի հետ, որը կա’մ միտունավոր, կա’մ ակամա տապալում է Հայաստան պետության ներքին կայունությունը: Ես մի նամակ գրեցի այս կազմակերպությանը, բացատրեցի, որ մեկ օրվա տնտեսական շահը չի կարող գերակշռել աշխարհաքաղաքական շահերին, ասացի, հետ կանչեք ձեր պահանջը, որպեսզի մեր երկրի կայունությունը չվտանգվի: Օրեր անց լրատվամիջոցներում հայտնվեց ԻՆՏԵՐ ՌՍՕ ԵԷՍ-ի հայտարությունը, գրել էին` մենք զբաղվում ենք բիզնեսով, մեզ չեն հետաքրքրում քաղաքական միտինգները: Այսինքն, իրենց չի հետաքրքրում Հայաստանում առաջացած տնտեսական լարվածությունը: Բայց խոշոր բիզնեսը չի կարող հակապետական քայլերի դիմել, իսկ ԻՆՏԵՐ ՌՍՕ ԵԷՍ-ը Հայաստանում իրականացնում է խոշոր բիզնես ու նման պահանջով կատարում հակահայկական, հակառուսական քայլ: Ու եթե իրենք, այնուամենայնիվ իմանալով այս ամենը շարունակում են գնալ այդ ճանապարհով, կնշանակի որոշ խոշոր կապիտալիստներ, ԻՆՏԵՐ ՌՍՕ ԵԷՍ-ն ու ՀԷՑ-ը շահագրգռված են, որ Հայաստանում վիճակը ապակայունանա:

ՀԷՑ-ի գլխավոր տնօրեն Եվգենի Բիբինը, հայտնի է, որ Ռուսաստանի լիբերալ-ժողովրդավարական կուսակցության համակիրն է, ունի արևմտյան դիրքորոշումներ: Այս տեղեկատվությունը ինչ-որ բան մեզ չի հուշո՞ւմ:

-Փաստն այն է, որ Բիբինն այսօր հակառուսական քայլ է կատարում, տապալում է հայ-ռուսական հարաբերությունները: Ի միջայլոց, մասնավոր բիզնեսը չի կարող քաղաքականությունից զերծ մնալ, ու երբ Բիբինն ասում է` ես միայն բիզնեսով եմ զբաղվում ու քաղաքականությունն իմ գործը չէ, ես նրան պատասխանում եմ` պարո’ն Բիբին, դու հակապետական գործոնեությամբ ես զբաղված ու քեզանով պետք է իրավապահ մարմինները զբաղվեն:
Իսկ առհասարակ մեր մեծագույն սխալն այն էր, որ 1991-ին ընտրեցինք կապիտալիզմը ու մեր ստարտեգիական ոլորտները վաճառեցինք մասնավոր մարդկանց: Հիմա ինչո՞ւ ենք զարմանում, որ այդ մասնավոր անձը հետապնդում է կա’մ իր սեփական շահերը, կամ օգտվելով պահից քաղաքական հարցեր լուծում` թքած ունենալով մեր ժողովրդի շահը: Ես կոչ եմ անում` ստատեգիական ոլորտների ազգայնացման հարցը դարձնել պետական կարևորության հարց: 25 տարվա փորձը ցույց տվեց, որ մասնավոր խոշոր բիզնեսը գործում է մեր պետության շահերի դեմ, հակառակ դեպքում, մեր տնտեսությունը չէր տապալվի: Դառնալով` ո՞րն է ելքը հարցին, ասեմ` այս պահին պետք է չեղյալ հայտարարվի սակագնի բարձրացման հայտը, ու այդ պահանջով Բաղրամյան եկած մարդիկ կդադարեցնեն ցույցը, իսկ պողոտայում կմնան միայն պրովակատորները:

ԱՐՄԻՆԵ ՍԻՄՈՆՅԱՆ

Տպելու տարբերակ Տպելու տարբերակ

Դիտել Politics, Լրահոս, Հասարակություն, Հարցազրույցներ, Ռուսաստան, Տեղեկատվական անվտանգություն, Քաղաքականություն բաժնի բոլոր նյութերը



Digg this!Add to del.icio.us!Stumble this!Add to Techorati!Share on Facebook!Seed Newsvine!Reddit!Add to Yahoo!

Մեկնաբանությունները թույլատրված չեն